କୋଭିଡ୍ ହସ୍ପିଟାଲ ଆଇସିୟୁ ରେ ଅଗ୍ନିକାଣ୍ଡ, 13 ମୃତ

ମହାରାଷ୍ଟ୍ରର ବିଜୟ ବଲ୍ଲଭ ହସ୍ପିଟାଲ ଆଇସିୟୁ ୱାର୍ଡରେ ବଡଧରଣର ଅଗ୍ନିକାଣ୍ଡ ହୋଇଛି । ପ୍ରାଥମିକ ସୂଚନା ଅନୁସାରେ, କୋଭିଡ୍ ହସ୍ପିଟାଲର ଆଇସିୟୁରେ ଥିବା 13 ଜଣ କରୋନା ଆକ୍ରାନ୍ତଙ୍କ ମୃତ୍ୟୁ ହୋଇଛି । ଗୁରୁତର 21ଜଣଙ୍କୁ ଅନ୍ୟତ୍ର ସ୍ଥାନାନ୍ତର କରାଯାଇଛି ।

Updated: Friday, April 23, 2021, 12:53 [IST]

ମୁମ୍ବାଇ : ମହାରାଷ୍ଟ୍ରର ବିଜୟ ବଲ୍ଲଭ ହସ୍ପିଟାଲ ଆଇସିୟୁ ୱାର୍ଡରେ ବଡଧରଣର ଅଗ୍ନିକାଣ୍ଡ ହୋଇଛି । ପ୍ରାଥମିକ ସୂଚନା ଅନୁସାରେ, କୋଭିଡ୍ ହସ୍ପିଟାଲର ଆଇସିୟୁରେ ଥିବା 13 ଜଣ କରୋନା ଆକ୍ରାନ୍ତଙ୍କ ମୃତ୍ୟୁ ହୋଇଛି । ନିଆଁରୁ ବର୍ତ୍ତିଯାଇଥିବା 21ଜଣଙ୍କୁ ଅନ୍ୟତ୍ର ସ୍ଥାନାନ୍ତର କରାଯାଇଛି ।

ଶୁକ୍ରବାର ମୁମ୍ବାଇର ପଶ୍ଚିମ ବିରାର୍‌ ଅଞ୍ଚଳରେ ଥିବା ବିଜୟବଲ୍ଲଭ ହସ୍ପିଟାଲ୍‌ରେ ସର୍ଟସର୍କିଟ୍ ହୋଇ ରାତି ପ୍ରାୟ 3.15 ମିନିଟରେ ନିଆଁ ଲାଗିଯାଇଥିଲା । ଘଟଣାସ୍ଥଳରେ ଦମକଳ ବାହିନୀ ପହଞ୍ଚି ଭୋର୍‌ 5.30 ସୁଦ୍ଧା ନିଆଁ ଲିଭାଇବାରେ ସମର୍ଥ ହୋଇଥିଲେ । 'ଇଣ୍ଟେନ୍‌ସିଭ୍‌ କେୟାର୍‌ ୟୁନିଟ୍‌'ରେ 17ଜଣ ରୋଗୀ ଥିବା କଥା ଅଗ୍ନିଶମ ବିଭାଗ ସୁନିଶ୍ଚିତ କରିଛି । ପରେ ଆଉ ଜଣେ ରୋଗୀଙ୍କର ମୃତ୍ୟୁ ଘଟିଛି ବୋଲି କୁହାଯାଉଛି ।

ଅଗ୍ନିଶମ ବିଭାଗ ଭାସାଇ ବିରାଟ ମ୍ୟୁନିସିପାଲ କର୍ପୋରେସନ ଦ୍ୱାରା ପ୍ରକାଶିତ ମୃତକଙ୍କ ତାଲିକା ଅନୁଯାୟୀ, 14 ରୋଗୀଙ୍କ ମଧ୍ୟରୁ 5 ଜଣ ମହିଳା ଅଗ୍ନିକାଣ୍ଡରେ ପ୍ରାଣ ହରାଇଛନ୍ତି । ଜଣେ 23 ବର୍ଷ ବୟସ୍କ ବ୍ୟକ୍ତି ଥିଲେ | ସବୁଠାରୁ ବୟସ୍କ ଜଣେ 68 ବର୍ଷ ବୟସ୍କ ବ୍ୟକ୍ତିଙ୍କର ମଧ୍ୟ ମୃତ୍ୟୁ ହୋଇଛି ।

ମୃତ କୋଭିଡ୍‌-19 ଆକ୍ରାନ୍ତ ରୋଗୀମାନେ ଏଭଳି ପୋଡ଼ି ଯାଇଛନ୍ତି ଯେ, ସେମାନଙ୍କୁ ଚିହ୍ନିବା କଷ୍ଟକର ହୋଇପଡ଼ିଛି । 'କୋଭିଡ୍‌ ହସ୍ପିଟାଲ୍‌' ଭାବେ କାର୍ଯ୍ୟ କରୁଥିବା ବିଜୟ ବଲ୍ଲଭ ହସ୍ପିଟାଲ୍‌ ହେଉଛି ଏକ ଘରୋଇ ସଂସ୍ଥାନ । ଅଗ୍ନିକାଣ୍ଡ ସମ୍ପର୍କରେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ତଦନ୍ତାଦେଶ ଦେଇଛନ୍ତି।

PM @narendramodi has approved an ex-gratia of Rs. 2 lakh each from PMNRF for the next of kin of those who have lost their lives due to the hospital fire in Virar, Maharashtra. Rs. 50,000 would be given to those seriously injured.
— PMO India (@PMOIndia) April 23, 2021

ଏହି ଘଟଣାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦୁଃଖ ପ୍ରକାଶ କରିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପ୍ରଧାନମନ୍ତ୍ରୀଙ୍କ ଜାତୀୟ ରିଲିଫ ପାଣ୍ଠିରୁ ମୃତକଙ୍କ ପରିବାରକୁ 2 ଲକ୍ଷ ଟଙ୍କା ଏବଂ ଏହି ଦୁର୍ଘଟଣାରେ ଗୁରୁତର ଆହତଙ୍କ ପାଇଁ 50,000 ଟଙ୍କା ସହାୟତା ରାଶି ଘୋଷଣା କରିଛନ୍ତି । ଏହି ସୂଚନା ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (ପିଏମଓ ଅଫିସ୍) ତରଫରୁ ଦିଆଯାଇଛି ।

ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭିରାର ଅଗ୍ନିକାଣ୍ଡ ଘଟଣାରେ ମୃତକଙ୍କୁ ନେଇ ଶୋକବ୍ୟକ୍ତ କରିଛନ୍ତି । ମୃତକଙ୍କ ପରିବାରକୁ ମୁଖ୍ୟମନ୍ତ୍ରୀ ସମବେଦନା ଜଣାଇବା ସହ ଅନ୍ୟମାନଙ୍କ ଆଶୁ ଆରୋଗ୍ୟ କାମନା କରିଛନ୍ତି ।