40 ଲକ୍ଷ ଟ୍ରାକ୍ଟର ସହିତ ସଂସଦ ଘେରିବେ କୃଷକ : ରାକେଶ ଟିକାୟିତ୍
ଏଥର ଚାରି ଲକ୍ଷ ବଦଳରେ 40 ଲକ୍ଷ ଟ୍ରାକ୍ଟର ନେଇ ସଂସଦ ଘେରାଉ କରାଯିବ । ଏଥିସହ କୃଷକମାନେ ଇଣ୍ଡିଆ ଗେଟ୍ ଚାରିପାଖରେ ଥିବା ପାର୍କରେ ହଳ କରିବେ । ପରେ ସେମାନେ ସେଠାରେ ଫସଲ ଚାଷ କରିବେ ।
ନୂଆଦିଲ୍ଲୀ : ଗତ 90 ଦିନ ଧରି ଜାତୀୟ ରାଜଧାନୀ ଦିଲ୍ଲୀ ସୀମାରେ କେନ୍ଦ୍ର ସରକାରଙ୍କ ନୂଆ କୃଷକ ଆଇନକୁ ବିରୋଧ କରି କୃଷକ ମାନେ ଆନ୍ଦୋଳନ କରିଆସୁଛନ୍ତି । ମୋଦୀ ସରକାର ନୂତନ କୃଷି ଆଇନ ପ୍ରତ୍ୟାହାର ନ କରିବା ପର୍ଯ୍ୟନ୍ତ ସେମାନେ ଆନ୍ଦୋଳନ ଜାରି ରଖିବେ ବୋଲି କୃଷକମାନେ ସ୍ପଷ୍ଟ କରିଛନ୍ତି । ଏହି ସମୟରେ, ମଙ୍ଗଳବାର ଦିନ କୃଷକ ନେତା ରାକେଶ ଟିକାୟିତ୍ ରାଜସ୍ଥାନର ସିକରରେ ପହଞ୍ଚି ୟୁନାଇଟେଡ କିସାନ ମୋର୍ଚ୍ଚାର ମହାପଞ୍ଚାୟତରେ ଭାଗ ନେଇଥିଲେ । ଏହି କିଷାନ ମହାପଞ୍ଚାୟତରେ ରାକେଶ ମୋଦୀ ସରକାରଙ୍କ କଡ଼ା ସମାଲୋଚନା କରିଛନ୍ତି । ଏଥିସହ କୃଷକମାନଙ୍କୁ ଆଉ ଏକ ଟ୍ରାକ୍ଟର ରାଲି ପାଇଁ ପ୍ରସ୍ତୁତ ହେବାକୁ ଆହ୍ୱାନ କରିଛନ୍ତି ।
କିଷାନ ମହାପଞ୍ଚାୟତରେ ରାକେଶ ଟିକାୟିତ୍ କହିଛନ୍ତି, ଯଦି କେନ୍ଦ୍ର ସରକାର ତିନୋଟି ନୂତନ କୃଷି ଆଇନକୁ ରଦ୍ଦ ନକରନ୍ତି ତେବେ ଆନ୍ଦୋଳନକାରୀ କୃଷକମାନେ ସଂସଦ ଘେରାଉ କରିବେ । କୃଷକମାନେ ଏଥିପାଇଁ ସମ୍ପୂର୍ଣ୍ଣ ପ୍ରସ୍ତୁତ ରୁହନ୍ତୁ, ସେମାନଙ୍କୁ ଯେକୌଣସି ସମୟରେ ଦିଲ୍ଲୀ ଆସିବାକୁ ଡାକରା ଦିଆଯଆଇପାରେ । ସେ ଆହୁରି ମଧ୍ୟ କହିଛନ୍ତି, ଏଥର ଚାରି ଲକ୍ଷ ବଦଳରେ 40 ଲକ୍ଷ ଟ୍ରାକ୍ଟର ନେଇ ସଂସଦ ଘେରାଉ କରାଯିବ । ଏଥିସହ କୃଷକମାନେ ଇଣ୍ଡିଆ ଗେଟ୍ ଚାରିପାଖରେ ଥିବା ପାର୍କରେ ହଳ କରିବେ । ପରେ ସେମାନେ ସେଠାରେ ଫସଲ ଚାଷ କରିବେ । ତେବେ ସଂସଦ ଘେରାଉ ନେଇ ୟୁନାଇଟେଡ୍ ଫ୍ରଣ୍ଟର ନେତାମାନେ ଏପର୍ଯ୍ୟନ୍ତ ତାରିଖ ସ୍ଥିର କରିନାହାଁନ୍ତି ।
ଏହି ସଭାରେ ବିକେୟୁ ନେତା ଟିକାୟିତ୍ ଆହୁରି କହିଛନ୍ତି, 26 ଜାନୁଆରୀରେ ଦେଶର ଚାଷୀଙ୍କୁ ବଦନାମ କରିବା ପାଇଁ ଷଡ଼ଯନ୍ତ୍ର ହୋଇଥିଲା । ଦେଶର ପ୍ରତ୍ୟେକ କୃଷକ ଏହି ଦେଶର ନେତାଙ୍କୁ ନୁହଁ ବରଂ ଦେଶର ତ୍ରିରଙ୍ଗାକୁ ଭଲ ପାଆନ୍ତି । ସେ କେନ୍ଦ୍ର ସରକାରଙ୍କୁ ଟାର୍ଗେଟ୍ କରି କହିଛନ୍ତି, ଯଦି ସରକାର ଶୀଘ୍ର ଏହି ନୂତନ ନିୟମ ପ୍ରତ୍ୟାହାର ନକରନ୍ତି ତେବେ ସେମାନେ ବଡ ବଡ କମ୍ପାନୀର ଗୋଦାମ ଧ୍ୱଂସ କରିଦେବେ । ଏଥିପାଇଁ ସଂଯୁକ୍ତ ମୋର୍ଚ୍ଚା ବହୁତ ଶୀଘ୍ର ତାରିଖ ସ୍ଥିର କରିବ । ସିକର ବ୍ୟତୀତ ଟିକାୟିତ୍ ମଙ୍ଗଳବାର ଦିନ ଚୁରୁ ଜିଲ୍ଲାର ସର୍ଦ୍ଦାରସହରରେ ମଧ୍ୟ କିଷାନ ସଭାକୁ ମଧ୍ୟ ସମ୍ବୋଧିତ କରିଛନ୍ତି । ଯେଉଁଥିରେ ସ୍ୱରାଜ ଆନ୍ଦୋଳନର ଯୋଗେନ୍ଦ୍ର ଯାଦବଙ୍କ ସମେତ ଅନେକ ନେତା ଉପସ୍ଥିତ ଥିଲେ ।
Click it and Unblock the Notifications
Sign in with Google