ଅଭିଯୁକ୍ତ ଶାହାରୁଖକୁ ହତ୍ୟା କରିବା ବ୍ୟକ୍ତିଙ୍କୁ ମିଳିବ 11 ଲକ୍ଷ ଟଙ୍କା, ଘୋଷଣା କଲେ ହନୁମାନଗଡ଼ୀ ମହନ୍ତ ରାଜୁ ଦାସ
ମହନ୍ତ ଘୋଷଣା କରିଛନ୍ତି ଯେ ଯିଏ ପେଟ୍ରୋଲରେ ନିଆଁ ଲଗାଇ ଦୁମକା ଘଟଣାର ଅଭିଯୁକ୍ତ ଶାହାରୁଖକୁ ହତ୍ୟା କରିବ, ତାକୁ 11 ଲକ୍ଷ ପୁରସ୍କାର ଦିଆଯିବ ।
ଅଯୋଧ୍ୟା : ଏକ ତରଫା ପ୍ରେମରେ ଶାହାରୁଖ ନାମକ ବ୍ୟକ୍ତି ଝାଡଖଣ୍ଡର ଦୁମକା ଜିଲ୍ଲାର ଦ୍ୱାଦଶ ଶ୍ରେଣୀର ଛାତ୍ରୀଙ୍କୁ ଜୀବନ୍ତ ଜାଳି ହତ୍ୟା କରିଛି । ଏହି ଜଘନ୍ୟ ଘଟଣା ପରେ ସମଗ୍ର ରାଜ୍ୟରେ ଅସନ୍ତୋଷ ଦେଖାଦେଇଛି । ଏପରିକି ଅସନ୍ତୋଷର ନିଆଁରେ ରାଜନୀତି ମଧ୍ୟ ଉତ୍ତପ୍ତ ହେବା ପରେ ବର୍ତ୍ତମାନ ଉତ୍ତରପ୍ରଦେଶର ଅଯୋଧ୍ୟାରେ ମଧ୍ୟ ଏହି ଘଟଣାକୁ ନେଇ ଅସନ୍ତୋଷ ବୃଦ୍ଧି ପାଇଛି । ଦ୍ୱାଦଶ ଛାତ୍ରୀଙ୍କୁ ନିଆଁ ଲଗାଇ ହତ୍ୟା କରିଥିବା ଅଭିଯୁକ୍ତ ଶାହାରୁଖ ବିରୋଧରେ ସାଧୁ ଓ ସନ୍ଥମାନଙ୍କ ମଧ୍ୟରେ ଅସନ୍ତୋଷ ରହିଛି ।
ଅଭିଯୁକ୍ତକୁ ହତ୍ୟା କଲେ ମିଳିବ 11 ଲକ୍ଷ
ଅଯୋଧ୍ୟା ହନୁମାନଗଡ଼ୀର ମହନ୍ତ ରାଜୁ ଦାସ ଛାତ୍ରୀଙ୍କୁ ଜୀବନ୍ତ ଜଳାଇ ହତ୍ୟା କରିଥିବା ଶାହାରୁଖକୁ ହତ୍ୟା କରିବା ବ୍ୟକ୍ତିଙ୍କୁ ପୁରସ୍କୃତ କରିବାର ଏକ ବଡ ଘୋଷଣା କରିଛନ୍ତି । ଆଜ ତକ୍ ର ଖବର ଅନୁଯାୟୀ ମହନ୍ତ ରାଜୁ ଦାସ କହିଛନ୍ତି, 'ଦୁମକା ଘଟଣାର ଶିକାର ହୋଇଥିବା ଛାତ୍ରୀ କହିଥିଲେ ଯେ ମୁଁ ଯନ୍ତ୍ରଣା ପାଇ ମରୁଛି । ସେହିଭଳି ତାକୁ ମଧ୍ୟ ଦଣ୍ଡ ଦିଆଯିବା ଉଚିତ୍ ।' ମହନ୍ତ ଘୋଷଣା କରିଛନ୍ତି ଯେ ଯିଏ ପେଟ୍ରୋଲରେ ନିଆଁ ଲଗାଇ ଦୁମକା ଘଟଣାର ଅଭିଯୁକ୍ତ ଶାହାରୁଖକୁ ହତ୍ୟା କରିବ, ତାକୁ 11 ଲକ୍ଷ ପୁରସ୍କାର ଦିଆଯିବ ।
ସୂଚନାଯୋଗ୍ୟ, ଏହି ସମଗ୍ର ପ୍ରସଙ୍ଗ ଝାଡଖଣ୍ଡର ଦୁମକା ଜିଲ୍ଲାର ଜରୁଆଡୀହ ଅଞ୍ଚଳର । ଜଣେ ଦ୍ୱାଦଶ ଶ୍ରେଣୀ ଛାତ୍ରୀଙ୍କୁ ଅନେକ ମାସ ଧରି ସେହି ଅଞ୍ଚଳର ବାସିନ୍ଦା ଶାହାରୁଖ ହଇରାଣ କରୁଥିଲା । ପ୍ରେମ ଓ ବିବାହ ପାଇଁ ଶାହାରୁଖ ବାରମ୍ବାର ଚାପ ପକାଉଥିଲା । ବାଳିକା ଜଣକ ପ୍ରସ୍ତାବକୁ ପ୍ରତ୍ୟାଖ୍ୟାନ କରିଥିଲେ । ଏହା ପରେ ଶାହାରୁଖ ତାଙ୍କୁ ଜୀବନ୍ତ ଜାଳିଦେବାକୁ ଧମକ ଦେଇଥିଲେ । 23 ଅଗଷ୍ଟ ସକାଳେ, ଯେତେବେଳେ ସମସ୍ତେ ଶୋଇଥିଲେ, ଶାହାରୁଖ ଘରେ ପଶି ପେଟ୍ରୋଲ ଢାଳି ଅଙ୍କିତାଙ୍କୁ ଜୀବନ୍ତ ଜାଳି ଦେଇଥିଲା । ଚିକିତ୍ସା ସମୟରେ ତାଙ୍କର ମୃତ୍ୟୁ ଘଟିଥିଲା ।
ଦ୍ୱାଦଶ ଶ୍ରେଣୀର ଛାତ୍ରୀଙ୍କ ମୃତ୍ୟୁ ପରେ ଦୁମକା ଠାରୁ ଉତ୍ତରପ୍ରଦେଶ ପର୍ଯ୍ୟନ୍ତ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି । ସୋଶାଲ ମିଡିଆରେ ମଧ୍ୟ ଛାତ୍ରୀଙ୍କ ପାଇଁ ନ୍ୟାୟ ଦାବି ହୋଇଛି । ଲୋକଙ୍କ ବିରୋଧକୁ ଦୃଷ୍ଟିରେ ରଖି ଦୁମକାରେ 144 ଧାରା ଲାଗୁ କରାଯାଇଥିଲା । ଏହି ପ୍ରସଙ୍ଗରେ ରାଜନୀତି ମଧ୍ୟ ଆରମ୍ଭ ହୋଇଥିଲା । ବିଶ୍ୱ ହିନ୍ଦୁ ପରିଷଦ ଏବଂ ବଜରଙ୍ଗ ଦଳର କାର୍ଯ୍ୟକର୍ତ୍ତାମାନେ ରବିବାର ଦିନ ଦୁମକା ସହରର ଦୁଧାନୀ ଛକରେ ବିରୋଧ ପ୍ରଦର୍ଶନ କରିଥିଲେ । ବିଜେପି ମଧ୍ୟ ଏହି ଘଟଣାକୁ ତୀବ୍ର ନିନ୍ଦା କରିବା ସହ ଝାଡଖଣ୍ଡର ଆଇନ ଶୃଙ୍ଖଳା ପରିସ୍ଥିତି ଉପରେ ପ୍ରଶ୍ନ କରିଛି ।
Click it and Unblock the Notifications
Sign in with Google