Toolkit Case : ଦିଶା ରବି କାହିଁକି ପାଇବେ ନାହିଁ ଜାମିନ୍ ? କୋର୍ଟରେ ଉତ୍ତର ରଖିଲା ଦିଲ୍ଲୀ ପୋଲିସ

ଜାମିନକୁ ବିରୋଧ କରି ଦିଲ୍ଲୀ ପୋଲିସ କାନାଡାସ୍ଥିତ ଜଷ୍ଟିସ ପୋଏଟିକ୍ ଫାଉଣ୍ଡେସନର ନାମ ନେଇ କହିଛି ଯେ, ଏହି ସଂଗଠନ ଖାଲିସ୍ତାନ ଆନ୍ଦୋଳନକୁ ସମର୍ଥନ କରୁଛି । ପୋଲିସର ସୂଚନାନୁସାରେ, "ସେମାନେ (ଫାଉଣ୍ଡେସନ) କୃଷକ ଆନ୍ଦୋଳନର ଫାଇଦା ନେବାକୁ ଚାହୁଁଛନ୍ତି ।

Published: Saturday, February 20, 2021, 17:48 [IST]

ନୂଆଦିଲ୍ଲୀ : ଟୁଲକିଟ୍ ମାମଲାରେ ଗିରଫ ହୋଇଥିବା ଜଳବାୟୁ କାର୍ଯ୍ୟକର୍ତ୍ତା ଦିଶା ରବିଙ୍କ ଜାମିନ ଆବେଦନ ନେଇ ଶନିବାର ଦିଲ୍ଲୀର ପଟିଆଲା ହାଉସ୍ କୋର୍ଟରେ ଶୁଣାଣି ହୋଇଛି । ଏହି ଟୁଲକିଟ୍ ଭାରତ ବିରୋଧରେ ଷଡଯନ୍ତ୍ରର ଏକ ଅଂଶ ବୋଲି କହି ଦିଲ୍ଲୀ ପୋଲିସ ଜାମିନକୁ ବିରୋଧ କରିଛି । ଏହା ସେହି ସମସ୍ତ ୱେବସାଇଟ୍ ଗୁଡିକରେ ପ୍ରବେଶ କରିବାର ଏକ ମାଧ୍ୟମ ଯାହା ଭାରତ ଏବଂ ଏହାର ସୈନ୍ୟବାହିନୀକୁ ଅସମ୍ମାନ କରିବା ପାଇଁ ସୃଷ୍ଟି ହୋଇଛି ବୋଲି କହିଛି ଦିଲ୍ଲୀ ପୋଲିସ୍ ।

ଭାରତକୁ ଅସମ୍ମାନ କରିବାର ଯୋଜନାର ଏକ ଅଂଶ

ଏହି ଟୁଲକିଟ୍ ମାମଲାରେ ଦିଶା ରବିଙ୍କ ସହ ଶାନ୍ତନୁ ମୁଲୁକ ଏବଂ ନିକିତା ଯାଦବଙ୍କ ବିରୋଧରେ ଅଭିଯୋଗ ରହିଛି । ଭାରତ ବିରୋଧରେ ଏକ ଆନ୍ତର୍ଜାତୀୟ ଅଭିଯାନ କରିବା ପାଇଁ ସେମାନେ ଏକ ଟୁଲକିଟ୍ ପ୍ରସ୍ତୁତ କରିଥିଲେ ବୋଲି ଦିଲ୍ଲୀ ପୋଲିସ କହିଛି । ସ୍ୱିଡେନର ପରିବେଶ କାର୍ଯ୍ୟକର୍ତ୍ତା ଗ୍ରେଟା ଥନବର୍ଗ ଏହାକୁ ଟୁଇଟ୍ କରିବା ପରେ ଏହି ଟୁଲକିଟ୍ ପ୍ରକାଶ ପାଇଛି । ପରେ ଏହାକୁ ଗ୍ରେଟା ଥନବର୍ଗ ଡିଲିଟ୍ କରିଥିଲେ । ଫେବୃଆରୀ 13 ରେ ଦିଶା ରବିଙ୍କୁ ବେଙ୍ଗାଲୁରୁରୁ ଗିରଫ କରାଯାଇଥିଲା । 26 ଜାନୁଆରୀରେ କୃଷକ ହିଂସା ସହିତ ଏହା ଜଡ଼ିତ ଥିବା ନେଇ ପୋଲିସ ମଧ୍ୟ କହିଛି । 26 ଜାନୁଆରୀରେ ବିଦେଶରେ ରହୁଥିବା ବିଚ୍ଛିନ୍ନତାବାଦୀ ବାହିନୀ ଏହି ହିଂସାରେ ସମ୍ପୃକ୍ତ ଥିବା ପୋଲିସ ଅଭିଯୋଗ କରିଛି । ଏହି ସମୟ ମଧ୍ୟରେ ଟୁଲକିଟ୍ ପ୍ରସ୍ତୁତ କରିଥିବା ଲୋକଙ୍କ ଯୋଜନା ବିପଜ୍ଜନକ ଥିଲା । ପୋଲିସର କହିବାନୁସାରେ, ସେମାନଙ୍କର ଯୋଜନା ଥିଲା ଯେ ଯଦି ହିଂସା ପରେ ପୋଲିସ ହିଂସା କରିଥାନ୍ତା, ତେବେ ଏହା ସୋସିଆଲ ମିଡିଆରେ ପ୍ରସାର କରି ଭାରତକୁ ଅପମାନିତ କରାଯାଇଥିାନ୍ତା ।

ଦିଲ୍ଲୀ ପୋଲିସକୁ କୋର୍ଟଙ୍କ ତିନୋଟି ପ୍ରଶ୍ନ

ରବିବାର ଗିରଫ କରିବା ପରେ ପୋଲିସକୁ 5 ଦିନିଆ ରିମାଣ୍ଡ ମିଳିଥିଲା ଯାହାର ସମୟସୀମା ଶେଷ ହେବା ପରେ ଶୁକ୍ରବାର ଦିନ ଜେଲକୁ ପଠାଯାଇଥିଲା । ଦିଶାଙ୍କୁ ତିହାର ଜେଲରେ ରଖାଯାଇଛି । ଅନ୍ୟ ଅଭିଯୁକ୍ତ ଶାନ୍ତନୁଙ୍କ ସହ ମୁହାଁମୁହିଁ ପଚାରିବା ପାଇଁ ଦିଶାଙ୍କୁ 22 ଫେବୃଆରୀରେ ପୁଣି ରିମାଣ୍ଡରେ ନେବାକୁ ଦିଲ୍ଲୀ ପୋଲିସ ଯୋଜନା କରିଛି । ଦିଶା ରବି ଜାମିନ ଆବେଦନ କରିଥିଲେ । ଶନିବାର ଏହାର ଶୁଣାଣି କରାଯାଇଥିଲା । ଏହି ସମୟରେ ଦିଲ୍ଲୀ ପୋଲିସ ଦିଶାଙ୍କୁ ଜାମିନ ଦେବାକୁ ବିରୋଧ କରିଥିଲା । ଶନିବାର ଦିଶା ରବିଙ୍କ ଜାମିନ ଆବେଦନ ଉପରେ ଶୁଣାଣି କରିବା ସମୟରେ କୋର୍ଟ ମଧ୍ୟ ଟୁଲକିଟ୍ ବିଷୟରେ ପ୍ରଶ୍ନ କରିଥିଲେ । ଏହା ସହିତ କୋର୍ଟ ପ୍ରଶ୍ନ କରିଛନ୍ତି ଯେ ଦିଲ୍ଲୀ ପୋଲିସ କାହିଁକି ଦିଶା ରବିଙ୍କୁ ଜାମିନ ଦେବାକୁ ବିରୋଦ କରୁଛନ୍ତି ? ଅଭିଯୋଜନ ପକ୍ଷର କ'ଣ ରାୟ କହିଛି ? ଦିଶା ରବିଙ୍କ ବିରୋଧରେ କ'ଣ ଅଭିଯୋଗ ରହିଛି ? ତାଙ୍କ ବିରୁଦ୍ଧରେ କ'ଣ ପ୍ରମାଣ ଅଛି ?

ଦିଶା ରବିଙ୍କୁ ଜାମିନ ନ ଦେବାକୁ ପୋଲିସର ଅନୁରୋଧ

ଜାମିନକୁ ବିରୋଧ କରି ଦିଲ୍ଲୀ ପୋଲିସ କାନାଡାସ୍ଥିତ ଜଷ୍ଟିସ ପୋଏଟିକ୍ ଫାଉଣ୍ଡେସନର ନାମ ନେଇ କହିଛି ଯେ, ଏହି ସଂଗଠନ ଖାଲିସ୍ତାନ ଆନ୍ଦୋଳନକୁ ସମର୍ଥନ କରୁଛି । ପୋଲିସର ସୂଚନାନୁସାରେ, "ସେମାନେ (ଫାଉଣ୍ଡେସନ) କୃଷକ ଆନ୍ଦୋଳନର ଫାଇଦା ନେବାକୁ ଚାହୁଁଛନ୍ତି । ଏଥିପାଇଁ ସେମାନଙ୍କୁ ଏକ ଭାରତୀୟ ଚେହେରା ଆବଶ୍ୟକ ଥିଲା, ଯେଉଁଥିରେ ଦିଶା ରବି ସାମିଲ ହୋଇଥିଲେ । ଅଭିଯୁକ୍ତଙ୍କ ମଧ୍ୟରେ ହୋଇଥିବା ଷଡଯନ୍ତ୍ରରେ ଯୋଗଦେବା ଏହି ଟୁଲକିଟ୍ ତିଆରି କରିବାର ଉଦ୍ଦେଶ୍ୟ ଥିଲା ବୋଲି କହିଛି ଦିଲ୍ଲୀ ପୋଲିସ୍ ।

ଦିଲ୍ଲୀ ପୋଲିସ ମଧ୍ୟ କୋର୍ଟଙ୍କୁ ଆହୁରି ମଧ୍ୟ କହିଛି, ଦିଶା ବିରୋଧରେ ପୋଲିସ୍ ପାଖରେ ଯଥେଷ୍ଟ ପ୍ରମାଣ ଅଛି । ଏ ସମ୍ପର୍କରେ ସମସ୍ତ ଦସ୍ତାବିଜ୍ ଏକ ବନ୍ଦ ଲଫାପାରେ ଦେବା ପାଇଁ ପୋଲିସ୍ କୋର୍ଟର ଅନୁମତି ଅନୁମତି ମାଗିଛି । ଗିରଫ ପରେ ଦିଶା ରବି କୋର୍ଟଙ୍କୁ କହିଥିଲେ ଯେ ସେ ଟୁଲକିଟ୍ ତିଆରି କରିନାହାଁନ୍ତି କିନ୍ତୁ ଫେବୃଆରୀ 3 ରେ ଏଥିରେ ତିନି ଧାଡ଼ି ସମ୍ପାଦନ କରିଥିଲେ । ଶୁକ୍ରବାର ଦିନ ଦିଲ୍ଲୀ ହାଇକୋର୍ଟ ଗଣମାଧ୍ୟମର କଭରେଜ ସମ୍ବନ୍ଧରେ ନିର୍ଦ୍ଦେଶ ଆବେଦନ ଶୁଣାଣି ବେଳେ ଗଣମାଧ୍ୟମକୁ ପ୍ରାମାଣିକ ରିପୋର୍ଟ କରିବାକୁ କହିଛନ୍ତି । ଏଥି ସହିତ କୌଣସି ପ୍ରକାରର ଡକ୍ୟୁମେଣ୍ଟ ଲିକ ନକରିବାକୁ ପୋଲିସକୁ ମଧ୍ୟ ନିର୍ଦ୍ଦେଶ ଦେଇଛନ୍ତି କୋର୍ଟ ।

Published On February 20, 2021