ଲ୍ୟାଣ୍ଡଫଲ କରୁଛି ‘ବିପର୍ଯ୍ୟୟ'

ଅହମ୍ମଦାବାଦ : ସ୍ଥଳଭାଗ ଛୁଇଁବା ଆରମ୍ଭ କରିଛି ବାତ୍ୟା ବିପର୍ଯ୍ୟୟ । ଅତି ଭୀଷଣ ସାମୁଦ୍ରିକ ବାତ୍ୟା ବିପର୍ଯ୍ୟୟର ସ୍ଥଳଭାଗ ଛୁଇଁବା ପ୍ରକ୍ରିୟା ଝଖାଉ ବନ୍ଦର ନିକଟରେ ଆରମ୍ଭ ହୋଇଛି । ଏହା ମଧ୍ୟରାତ୍ରି ପର୍ଯ୍ୟନ୍ତ ଚାଲିବ । ଏ ନେଇ ଭାରତୀୟ ପାଣିପାଗ ବିଭାଗ ମହାନିର୍ଦ୍ଦେଶକ ଡ. ମୃତ୍ୟୁଞ୍ଜୟ ମହାପାତ୍ର ସୂଚନା ଦେଇଛନ୍ତି ।

ଏହି ବାତ୍ୟାର ବାହ୍ୟ ଅଂଶ ସୌରାଷ୍ଟ୍ର ଅଂଚଳକୁ ଛୁଇଁଛି । ଲାଣ୍ଡଫଲ କଚ୍ଛ ଜିଲ୍ଲାର ଝଖାଉ ବନ୍ଦର ନିକଟରେ ହେଉଛି । ତେବେ ବାତ୍ୟାର କେନ୍ଦ୍ରସ୍ଥଳ ଏବେ ବି ଝଖାଉ ଠାରୁ ଦୂରରେ ରହିଛି । ଧୀରେ ଧୀରେ ଏହା ସ୍ଥଳଭାଗ ଆଡ଼କୁ ଅଗ୍ରସର ହେଉଛି । ଏହି ବାତ୍ୟା ପ୍ରଭାବରେ ଏବେ ଗୁଜରାଟର କଚ୍ଛ ଓ ସୌରାଷ୍ଟ୍ର ଅଞ୍ଚଳରେ ଘଣ୍ଟା ପ୍ରତି 120-125 କିଲୋମିଟର ବେଗରେ ପବନ ବହୁଛି ।

ଲାଣ୍ଡଫଲ୍ ପ୍ରକ୍ରିୟା ମଧ୍ୟରାତ୍ରି ପର୍ଯ୍ୟନ୍ତ ଚାଲିବ ଓ ଏହି ସମୟ ସବୁଠାରୁ ବିପଦପୂର୍ଣ୍ଣ ରହିବ । ଏଣୁ ସତର୍କତା ଅବଲମ୍ବନ କରିବାକୁ ପରାମର୍ଶ ଦିଆଯାଇଛି । ଲାଣ୍ଡଫଲ୍ ପରେ ଏହି ବାତ୍ୟା ଧୀରେ ଧୀରେ ଦୂର୍ବଳ ହୋଇଯିବ । ଶୁକ୍ରବାର ସୁଦ୍ଧା ଏହାର ପ୍ରଭାବ ବିଶେଷ ରହିବ ନାହିଁ ବୋଲି ପାଣିପାଗ ବିଭାଗ ପକ୍ଷରୁ କୁହାଯାଇଛି ।

ବାତ୍ୟାକୁ ନେଇ ପ୍ରଶାସନ ସଜାଗ ରହିଥିବା ବେଳେ ଉପକୂଳ ଅଞ୍ଚଳରୁ ପ୍ରାୟ 1 ଲକ୍ଷ ଲୋକଙ୍କୁ ଅନ୍ୟତ୍ର ସ୍ଥାନାନ୍ତର କରାଯାଇଛି । ଗୁଜରାଟର କାଲୋଲ, ଗାନ୍ଧୀନଗରରେ ପ୍ରବଳ ବର୍ଷା ସହ ପବନ ହେଉଥିବା ବେଳେ ବାତ୍ୟା 'ବିପର୍ଯ୍ୟୟ' ପାଇଁ ରେଡ୍ ଆଲର୍ଟ ଜାରି କରାଯାଇଛି ।

English summary

Cyclone Biparjoy Update : Cyclone Started Landfall