ପର୍ଣ୍ଣ ଭିଡିଓ ମାମଲା : ରାଜ କୁନ୍ଦ୍ରାଙ୍କୁ କୋର୍ଟରୁ ଝଟକା, ଜୁଲାଇ 27 ପର୍ଯ୍ୟନ୍ତ ପୋଲିସ ହେପାଜତକୁ ପଠାଇଲେ କୋର୍ଟ
ବଲିଉଡ ଅଭିନେତ୍ରୀ ଶିଳ୍ପା ଶେଟ୍ଟୀଙ୍କ ସ୍ୱାମୀ ରାଜ କୁନ୍ଦ୍ରାଙ୍କୁ ମୁମ୍ବାଇର ମାଜିଷ୍ଟ୍ରେଟ କୋର୍ଟଙ୍କ ଠାରୁ ଏକ ବଡ଼ ଝଟକା ମିଳିଛି । ତାଙ୍କୁ ପୁଣି ଜୁଲାଇ 27 ପର୍ଯ୍ୟନ୍ତ ପୋଲିସ ହେପାଜତକୁ ପଠାଯାଇଛି ।
ମୁମ୍ବାଇ : ପର୍ଣ୍ଣ ଭିଡ଼ିଓ ସୁଟିଂ ଏବଂ ବିକ୍ରୟ ଅଭିଯୋଗରେ ଗିରଫ ହୋଇଥିବା ଜଣାଶୁଣା ବ୍ୟବସାୟୀ ରାଜ କୁନ୍ଦ୍ରାଙ୍କୁ ପୋଲିସ ହେପାଜତର ଶେଷ ଦିନରେ ଆଜି (ଶୁକ୍ରବାର) କୋର୍ଟରେ ହାଜର କରାଯାଇଥିଲା । ବଲିଉଡ ଅଭିନେତ୍ରୀ ଶିଳ୍ପା ଶେଟ୍ଟୀଙ୍କ ସ୍ୱାମୀ ରାଜ କୁନ୍ଦ୍ରାଙ୍କୁ ମୁମ୍ବାଇର ମାଜିଷ୍ଟ୍ରେଟ କୋର୍ଟଙ୍କ ଠାରୁ ଏକ ବଡ଼ ଝଟକା ମିଳିଛି । ତାଙ୍କୁ ପୁଣି ଜୁଲାଇ 27 ପର୍ଯ୍ୟନ୍ତ ପୋଲିସ ହେପାଜତକୁ ପଠାଯାଇଛି । ରାଜ କୁନ୍ଦ୍ରାଙ୍କ ବ୍ୟତୀତ ତାଙ୍କ ସହଯୋଗୀ ରିଆନ୍ ଥୋର୍ପେଙ୍କ ପୋଲିସ୍ ହେପାଜତ ଅବଧିକୁ ମଧ୍ୟ ବୃଦ୍ଧି କରାଯାଇଛି ।
ରାଜ କୁନ୍ଦ୍ରାଙ୍କୁ 19 ଜୁଲାଇରେ ମୁମ୍ବାଇ ପୋଲିସର କ୍ରାଇମ ଶାଖା ଗିରଫ କରିଥିଲା ଏବଂ ପରେ ତାଙ୍କୁ 23 ଜୁଲାଇ ପର୍ଯ୍ୟନ୍ତ ପୋଲିସ ହେପାଜତକୁ ପଠାଯାଇଥିଲା । ରାଜ କୁନ୍ଦ୍ରା ଏବଂ ରିଆନ୍ ଥୋର୍ପେ ଆଜି ପୁଣି କୋର୍ଟରେ ହାଜର ହୋଇଥିଲେ ଯେଉଁଠାରେ ପୋଲିସ ସେମାନଙ୍କ ହେପାଜତର ଅବଧି ବୃଦ୍ଧି କରିବାକୁ କହିଥିଲା । ପୋଲିସର ଆବେଦନରେ ସହମତି ପ୍ରକାଶ କରି ଜୁଲାଇ 27 ପର୍ଯ୍ୟନ୍ତ କୋର୍ଟ ରାଜ କୁନ୍ଦ୍ରା ଏବଂ ରିଆନ୍ ଥୋର୍ପେଙ୍କୁ ପୋଲିସ ହେପାଜତକୁ ପଠାଇଛନ୍ତି । ଉଭୟଙ୍କୁ କୋର୍ଟରୁ ସିଧା ମହାରାଷ୍ଟ୍ରର ବାୟକୁଲ୍ଲା ଜେଲକୁ ନିଆଯାଇଥିଲା ।
Maharashtra: Police produced Shilpa Shetty's husband & businessman Raj Kundra and Ryan Thorpe before Magistrate Court and sought 7 days further police custody, in connection with a case relating to the production of pornographic films
— ANI (@ANI) July 23, 2021
ଗଣମାଧ୍ୟମ ରିପୋର୍ଟ ଅନୁଯାୟୀ, ପୋଲିସ ଶିଳ୍ପା ଶେଟ୍ଟୀଙ୍କ ସ୍ୱାମୀ ତଥା ବ୍ୟବସାୟୀ ରାଜ କୁନ୍ଦ୍ରା ଏବଂ ରିଆନ୍ ଥୋର୍ପେଙ୍କୁ ମାଜିଷ୍ଟ୍ରେଟ୍ କୋର୍ଟରେ ହାଜର କରିଥିଲେ ଏବଂ ଅଶ୍ଳୀଳ ଚଳଚ୍ଚିତ୍ର ନିର୍ମାଣ ମାମଲାରେ 7 ଦିନ ଅଧିକ ପୋଲିସ ହେପାଜତ ମାଗିଥିଲେ । ମୁମ୍ବାଇ ପୋଲିସ କୋର୍ଟକୁ କହିଛି ଯେ ଅଶ୍ଳୀଳ ଚଳଚିତ୍ରରୁ ଅର୍ଜିତ ଟଙ୍କା ଅନଲାଇନ୍ ବେଟିଂ ପାଇଁ ବ୍ୟବହୃତ ହୋଇଛି ବୋଲି ପୋଲିସ ସନ୍ଦେହ କରୁଛି । ଏହି କାରଣରୁ ରାଜ କୁନ୍ଦ୍ରାଙ୍କ 'ୟେସ୍ ବ୍ୟାଙ୍କ' ଆକାଉଣ୍ଟ ଏବଂ 'ୟୁନାଇଟେଡ୍ ବ୍ୟାଙ୍କ ଅଫ୍ ଆଫ୍ରିକା' ଆକାଉଣ୍ଟ ମଧ୍ୟରେ ହୋଇଥିବା କାରବାରର ଯାଞ୍ଚ କରାଯିବା ଉଚିତ୍ । ଏହି ସମୟରେ ପୋଲିସ ବଲିଉଡ ଅଭିନେତ୍ରୀ ଶିଳ୍ପା ଶେଟ୍ଟୀଙ୍କୁ ମଧ୍ୟ ପଚରାଉଚରା କରିପାରେ ବୋଲି ଖବର ରହିଛି ।