ବାହାନଗା ଟ୍ରେନ୍ ଦୁର୍ଘଟଣା : ଏବେ ବି ଚିହ୍ନଟ ହୋଇ ପାରୁନି 81 ମୃତଦେହ, DNA ରିପୋର୍ଟ ଅପେକ୍ଷାରେ ପରିବାର ଲୋକ

Updated: Sunday, June 25, 2023, 16:09 [IST]

ଭୁବନେଶ୍ୱର : ବାହାନଗା ମର୍ମନ୍ତୁଦ ଟ୍ରେନ ଦୁର୍ଘଟଣାକୁ ତିନି ସପ୍ତାହ ପରେ ବିତିଗଲାଣି । ଏତେ ଦିନ ପରେ ବି ପରିବାର ଲୋକ ପାଇପାରୁନହାଁନ୍ତି ସମ୍ପର୍କୀୟଙ୍କ ମୃତଦେହ । ମୃତ ଦେହ ନେଲେ ଅନ୍ତିମ ସଂସ୍କାର କରିବାକୁ ଅନେଇ ବସିଛନ୍ତି ପରିବାର ଲୋକ ଓ ସମ୍ପର୍କୀୟ । ଏବେ ବି 81 ମୃତଦେହ ଚିହ୍ନଟ ହୋଇପାରି ନାହିଁ ।

ମୃତଦେହ ଚିହ୍ନଟ ପାଇଁ DNA ପରୀକ୍ଷା କରାଯାଉଥିବାରୁ, ଏପର୍ଯ୍ୟନ୍ତ ଆସି ପାରୁନାହିଁ ରିପୋର୍ଟ । ଫଳରେ ମୃତ୍ୟୁ ହେବାର ତିନି ସପ୍ତାହ ପରେ ମଧ୍ୟ ହୋଇ ପାରି ନାହିଁ ଅନ୍ତିମ ସଂସ୍କାର । ଚିହ୍ନଟ ହୋଇପାରିନଥିବା ମୃତକଙ୍କ ପରିବାର ଏବେ ଡିଏନ୍ଏ ପରୀକ୍ଷା ରିପୋର୍ଟକୁ ଅପେକ୍ଷା କରିଛନ୍ତି । ରାଜ୍ୟ ବାହାର ଲୋକ ଏମ୍ସ ପାଖାପାଖି ଭଡା ନେଇ ଅପେକ୍ଷା କରି ରହିଛନ୍ତି ।

ନୂଆଦିଲ୍ଲୀ ସ୍ଥିତ ସେଣ୍ଟ୍ରାଲ ଫରେନ୍ସିକ ସାଇନ୍ସ ଲାବୋରେଟୋରୀ (ସିଏଫ୍ଏସ୍ଏଲ୍)ରୁ ପରୀକ୍ଷା ରିପୋର୍ଟ ଆସିବା ନେଇ ଏବେ ବି ଅନିଶ୍ଚିତତା ଲାଗି ରହିଛି । ଭୁବନେଶ୍ୱର ଏମ୍ସରେ କଣ୍ଟେନରରେ ଏବେବି 81 ମୃତ ଦେହ ରହିଛି । ରିଚୟ ମିଳିନଥିବାରୁ ହସ୍ତାନ୍ତର କରିବାକୁ ଅନ୍ୟ କୌଣସି ବିକଳ୍ପ ନାହିଁ ବୋଲି କୁହାଯାଉଛି ।

ଏପରିକି ଏମ୍ସ ନିକଟରେ ରାଜ୍ୟ ବାହାରୁ 35 ଜଣ ସେମାନଙ୍କ ସମ୍ପର୍କୀୟଙ୍କ ମୃତ ଦେହ ନେବାକୁ ଅପେକ୍ଷା କରି ରହିଛନ୍ତି । ଡିଏନ୍ଏ ରିପୋର୍ଟ ଆସିବାରେ ବିଳମ୍ବ ହେବାରୁ ଅନ୍ୟ 15 ଜଣ ଘରକୁ ଚାଲି ଯାଇଛନ୍ତି ବୋଲି ଜଣାପଡ଼ିଛି । ଏପରି ପରିସ୍ଥିତିରେ ଏହା କାର୍ଯ୍ୟକୁ ତ୍ୟରାନ୍ୱିତ କରି ସମ୍ପର୍କୀୟଙ୍କୁ ମୃତଦେହ ହସ୍ତାନ୍ତର କରାଯାଉ ବୋଲି ସେମାନେ ଦାବି କରିଛନ୍ତି ।