ମୋଦୀଙ୍କ ଉପରେ ବିବିସି ଡକ୍ୟୁମେଣ୍ଟାରୀ ସେୟାର୍ କରିଥିବା ୟୁଟ୍ୟୁବ୍ ଏବଂ ଟ୍ୱିଟ୍ କୁ ବ୍ଲକ୍ କଲା କେନ୍ଦ୍ର

ବିବିସି ଡକ୍ୟୁମେଣ୍ଟାରୀ "ଇଣ୍ଡିଆ: ଦ ମୋଦୀ କ୍ୱେଶ୍ଚିନ୍" ର ପ୍ରଥମ ଏପିସୋଡ୍ ସେୟାର କରିଥିବା ଅନେକ ୟୁଟ୍ୟୁବ୍ ଭିଡିଓକୁ ବ୍ଲକ୍ କରିଦିଆଯାଇଛି ।

Published: Saturday, January 21, 2023, 18:24 [IST]

ନୂଆଦିଲ୍ଲୀ: ବିବିସି ଡକ୍ୟୁମେଣ୍ଟାରୀ "ଇଣ୍ଡିଆ: ଦ ମୋଦୀ କ୍ୱେଶ୍ଚିନ୍" ର ପ୍ରଥମ ଏପିସୋଡ୍ ସେୟାର କରିଥିବା ଅନେକ ୟୁଟ୍ୟୁବ୍ ଭିଡିଓକୁ ବ୍ଲକ୍ କରିଦିଆଯାଇଛି । ୟୁଟ୍ୟୁବ୍ ଭିଡିଓ ସହିତ, ୟୁଟ୍ୟୁବ୍ ଭିଡିଓ ଲିଙ୍କ୍ ଥିବା 50 ରୁ ଅଧିକ ଟ୍ୱିଟ୍ କୁ ବ୍ଲକ୍ କରିବାକୁ ଟ୍ୱିଟରକୁ ନିର୍ଦ୍ଦେଶ ଦେଇଛି କେନ୍ଦ୍ର ।

ସୂଚନା ଏବଂ ପ୍ରସାରଣ ସଚିବ ଶୁକ୍ରବାର ଦିନ ଆଇଟି ନିୟମ, 2021 ଅନୁଯାୟୀ ଜରୁରୀକାଳୀନ ଶକ୍ତି ବ୍ୟବହାର କରି ନିର୍ଦ୍ଦେଶ ଜାରି କରିବା ପରେ ଏହି ନିଷ୍ପତ୍ତି ନିଆଯାଇଛି । ବ୍ରିଟେନର ଜାତୀୟ ପ୍ରସାରଣକାରୀ ବ୍ରିଟିଶ ବ୍ରଡକାଷ୍ଟିଂ କର୍ପୋରେସନ୍ (ବିବିସି) 2002 ଗୁଜୁରାଟ ଦଙ୍ଗା ସମୟରେ ଗୁଜୁରାଟର ମୁଖ୍ୟମନ୍ତ୍ରୀ ଭାବରେ ପ୍ରଧାନମନ୍ତ୍ରୀଙ୍କ କାର୍ଯ୍ୟକାଳକୁ ଦର୍ଶାଇ ଦୁଇ ଏପିସୋଡ୍ ବିଶିଷ୍ଟ ସିରିଜ୍ ପ୍ରସାରଣ କରିଥିଲା । ଏହାକୁ ନେଇ କେନ୍ଦ୍ର ସରକାର ଅସନ୍ତୋଷ ବ୍ୟକ୍ତ କରିଥିଲେ ଏବଂ ଅନେକ ପ୍ଲାଟଫର୍ମ ଉପରେ ବ୍ୟାନ୍ ଲଗାଇଦିଆଯାଇଛି ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉପରେ ବିବାଦୀୟ ବିବିସି ସିରିଜକୁ ଗୁରୁବାର ଭାରତ ନିନ୍ଦା କରିଛି । ଏହା ସହିତ ଭାରତ ପକ୍ଷରୁ କୁହାଯାଇଥିଲା ଯେ ଏହି ଭିଡିଓ ପ୍ରଧାନମନ୍ତ୍ରୀ ମୋଦୀଙ୍କ ପ୍ରତିମୂର୍ତ୍ତିକୁ ଖରାପ କରିବା ଲକ୍ଷ୍ୟରେ ପ୍ରସ୍ତୁତ କରାଯାଇଛି । ବୈଦେଶିକ ମନ୍ତ୍ରଣାଳୟର ମୁଖପାତ୍ର ଅରିନ୍ଦମ ବାଗଚି ସୂଚନା ଦେଇ କହିଛନ୍ତି ଯେ "ଏକ ନିର୍ଦ୍ଦିଷ୍ଟ ବଦନାମ କାହାଣୀକୁ ଆଗକୁ ବଢାଇବା ପାଇଁ ପରିକଳ୍ପନା କରାଯାଇଛି । ଏହି ଭିଡିଓଟି ସମ୍ପୂର୍ଣ୍ଣ ପକ୍ଷପାତିତ ହୋଇଛି ।"

Published On January 21, 2023