ମନୀଷ ସିସୋଦିଆଙ୍କ ଘରେ ସିବିଆଇ ଚଢାଉ, ଡେପୁଟି ସିଏମ୍ କହିଲେ - 'ତଦନ୍ତରେ ସହଯୋଗ କରିବୁ'

ଦିଲ୍ଲୀର ଉପମୁଖ୍ୟମନ୍ତ୍ରୀ ତଥା ଶିକ୍ଷାମନ୍ତ୍ରୀ ମନୀଷ ସିସୋଦିଆଙ୍କ ଘରେ ସିବିଆଇ ଚଢାଉ ହୋଇଛି । ମନୀଷ ସିସୋଦିଆ ନିଜେ ତାଙ୍କ ଅଫିସିଆଲ୍ ଟ୍ୱିଟର ହ୍ୟାଣ୍ଡେଲରୁ ଏହି ସୂଚନା ଟ୍ୱିଟ୍ କରିଛନ୍ତି ।

ନୂଆଦିଲ୍ଲୀ : ଦିଲ୍ଲୀର ଉପମୁଖ୍ୟମନ୍ତ୍ରୀ ତଥା ଶିକ୍ଷାମନ୍ତ୍ରୀ ମନୀଷ ସିସୋଦିଆଙ୍କ ଘରେ ସିବିଆଇ ଚଢାଉ ହୋଇଛି । ମନୀଷ ସିସୋଦିଆ ନିଜେ ତାଙ୍କ ଅଫିସିଆଲ୍ ଟ୍ୱିଟର ହ୍ୟାଣ୍ଡେଲରୁ ଏହି ସୂଚନା ଟ୍ୱିଟ୍ କରିଛନ୍ତି । ସିବିଆଇ ଚଢାଉ ସମ୍ପର୍କରେ ମନୀଷ ସିସୋଦି ସୂଚନା ଦେଇଥିବାବେଳେ ସେ କେନ୍ଦ୍ର ସରକାରଙ୍କ ଉପରେ ଘୋର ଆକ୍ରମଣ କରିଛନ୍ତି । ଡେପୁଟି ସିଏମ୍ କହିଛନ୍ତି ଯେ, ଯେଉଁମାନେ ଆମ ଦେଶରେ ଭଲ କାମ କରନ୍ତି ସେମାନେ ଏହିପରି ହଇରାଣ ହେଉଛନ୍ତି ।

ଖବର ଅନୁଯାୱୀ ଡେପୁଟି ସିଏମ୍ ମନୀଷ ସିସୋଦିଆ ଏବଂ ଦିଲ୍ଲୀର ତତ୍କାଳୀନ ଏକ୍ସାଇଜ୍ କମିଶନର ଅରବା ଗୋପୀ କୃଷ୍ଣଙ୍କ ସମେତ ସିବିଆଇ ଦିଲ୍ଲୀ ଏବଂ ଏନସିଆରରେ 21 ଟି ସ୍ଥାନ ଉପରେ ଚଢାଉ କରିଛି । କୁହାଯାଉଛି ଯେ ସିବିଆଇର ଏହି ଚଢାଉ ଦିଲ୍ଲୀ ସରକାରଙ୍କ ଏକ୍ସାଇଜ୍ ନୀତିକୁ ନେଇ କରିଛି ।

ବାସ୍ତବରେ, ନିକଟରେ ଦିଲ୍ଲୀର ଲେଫ୍ଟନାଣ୍ଟ ଗଭର୍ଣ୍ଣର ବିନୟ ସକ୍ସେନା ସିବିଆଇ ତଦନ୍ତ ପାଇଁ ସୁପାରିଶ କରିଥିଲେ । ମୁଖ୍ୟ ଶାସନ ସଚିବଙ୍କ ରିପୋର୍ଟ ପରେ ଏଲଜି ଏହି ପଦକ୍ଷେପ ନେଇଥିଲେ । ଏହି ରିପୋର୍ଟରେ ମନୀଷ ସିସୋଦିଆଙ୍କ ଭୂମିକା ଉପରେ ମଧ୍ୟ ପ୍ରଶ୍ନ ଉଠାଯାଇଥିଲା । କୁହାଯାଉଛି ଯେ ଦିଲ୍ଲୀର ଏକ୍ସାଇଜ୍ ବିଭାଗ ମନୀଷ ସିସୋଦିଆଙ୍କ ଅଧୀନରେ ଅଛି ।

ମନୀଷ ସିସୋଦିଆ ଟ୍ୱିଟ୍ କରି ଲେଖିଛନ୍ତି, 'ସିବିଆଇ ଆସିଛି । ତାଙ୍କୁ ସ୍ୱାଗତ । ଆମେ ଦୃଢ ଭାବରେ ସଚ୍ଚୋଟ, ଲକ୍ଷ ଲକ୍ଷ ପିଲାଙ୍କ ଭବିଷ୍ୟତ ଗଠନ କରୁଛୁ । ଏହା ଅତ୍ୟନ୍ତ ଦୁର୍ଭାଗ୍ୟଜନକ ଯେ ଯେଉଁମାନେ ଆମ ଦେଶରେ ଭଲ କାମ କରନ୍ତି ସେମାନେ ଏହିପରି ହଇରାଣ ହରକତ ହେଉଛନ୍ତି । ସେଥିପାଇଁ ଆମ ଦେଶ ଏପର୍ଯ୍ୟନ୍ତ ଏକ ନମ୍ବର ହୋଇପାରି ନାହିଁ ।'

ଏଥି ସହିତ ଦ୍ୱିତୀୟ ଏବଂ ତୃତୀୟ ଟ୍ୱିଟରେ ସେ ଲେଖିଛନ୍ତି ଯେ 'ଆମେ ସିବିଆଇକୁ ସ୍ୱାଗତ କରୁଛୁ । ଯାଞ୍ଚରେ ପୂର୍ଣ୍ଣ ସହଯୋଗ ଦେବୁ ଯାହା ଦ୍ୱାରା ଶୀଘ୍ର ସତ୍ୟ ପ୍ରକାଶ ପାଇବ। ବର୍ତ୍ତମାନ ପର୍ଯ୍ୟନ୍ତ ମୋ ବିରୋଧରେ ଅନେକ ମାମଲା ଦାୟର କରାଯାଇଛି କିନ୍ତୁ କିଛି ବାହାରି ନାହିଁ । ଏଥିରୁ କିଛି ମଧ୍ୟ ବାହାରକୁ ଆସିବ ନାହିଁ । ଦେଶରେ ଭଲ ଶିକ୍ଷା ପାଇଁ ମୋର କାମ ବନ୍ଦ ହୋଇପାରିବ ନାହିଁ । ଦିଲ୍ଲୀର ଶିକ୍ଷା ଏବଂ ସ୍ୱାସ୍ଥ୍ୟର ଚମତ୍କାର କାର୍ଯ୍ୟ ଦ୍ୱାରା ଏହି ଲୋକମାନେ ଅସୁବିଧାରେ ପଡ଼ନ୍ତି । ଶିକ୍ଷା ସ୍ୱାସ୍ଥ୍ୟର ଉତ୍ତମ କାର୍ଯ୍ୟ ବନ୍ଦ କରିବା ପାଇଁ ଦିଲ୍ଲୀର ସ୍ୱାସ୍ଥ୍ୟମନ୍ତ୍ରୀ ତଥା ଶିକ୍ଷା ମନ୍ତ୍ରୀଙ୍କୁ ଗିରଫ କରାଯାଇଛି । ଆମ ଦୁହିଁଙ୍କ ବିରୋଧରେ ମିଥ୍ୟା ଅଭିଯୋଗ ରହିଛି । କୋର୍ଟରେ ସତ୍ୟ ପ୍ରକାଶ ପାଇବ ।

ଡେପୁଟି ସିଏମ୍ ମନୀଷ ସିସୋଦିଆଙ୍କ ଘରେ ସିବିଆଇ ଚଢାଉ ପରେ ଦିଲ୍ଲୀ ସିଏମ୍ ଅରବିନ୍ଦ କେଜ୍ରିୱାଲ ମଧ୍ୟ ଦୁଇଟି ଟ୍ୱିଟ୍ କରିଛନ୍ତି । କେଜ୍ରିୱାଲ ଲେଖିଛନ୍ତି, 'ଯେଉଁ ଦିନ ଦିଲ୍ଲୀର ଶିକ୍ଷା ମଡେଲକୁ ପ୍ରଶଂସା କରାଯାଇଥିଲା ଏବଂ ମନୀଷ ସିସୋଦିଆଙ୍କ ଫଟୋ ଆମେରିକାର ସର୍ବବୃହତ ଖବରକାଗଜ NYT ର ପ୍ରଥମ ପୃଷ୍ଠାରେ ଛପା ଯାଇଥିଲା, ସେହି ଦିନ କେନ୍ଦ୍ର ମନୀଷଙ୍କ ଘରକୁ ସିବିଆଇ ପଠାଇଥିଲା । ସିବିଆଇକୁ ସ୍ୱାଗତ । ସମ୍ପୂର୍ଣ୍ଣ ସହଯୋଗ କରିବୁ । ଅତୀତରେ ମଧ୍ୟ ଅନେକ ଚଢାଉ ହୋଇଛି । କିଛି ବାହାରକୁ ଆସିଲା ନାହିଁ । ବର୍ତ୍ତମାନ ମଧ୍ୟ କିଛି ବାହାରକୁ ଆସିବ ନାହିଁ ।'

କେବଳ ଏତିକି ନୁହେଁ, ଅନ୍ୟ ଏକ ଟ୍ୱିଟ୍ ରେ ସେ ଲେଖିଛନ୍ତି, 'ଦିଲ୍ଲୀର ଶିକ୍ଷା ଏବଂ ସ୍ୱାସ୍ଥ୍ୟ ମଡେଲ ଉପରେ ସମଗ୍ର ବିଶ୍ୱ ଆଲୋଚନା କରୁଛି । ସେମାନେ ଏହାକୁ ବନ୍ଦ କରିବାକୁ ଚାହୁଁଛନ୍ତି । ସେଥିପାଇଁ ଦିଲ୍ଲୀର ସ୍ୱାସ୍ଥ୍ୟ ଓ ଶିକ୍ଷା ମନ୍ତ୍ରୀଙ୍କ ଉପରେ ଆକ୍ରମଣ ଓ ଗିରଫଦାରୀ । ଯିଏ 75 ବର୍ଷରେ ଭଲ କାମ କରିବାକୁ ଚେଷ୍ଟା କରିଛି ତାଙ୍କୁ ଅଟକାଇ ଦିଆଯଆଇଛି । ସେଥିପାଇଁ ଭାରତ ପଛରେ ରହିଛି । ଦିଲ୍ଲୀର ଭଲ କାମ ବନ୍ଦ ହେବାକୁ ଦେବୁ ନାହିଁ ।'

English summary

CBI Raid At Delhi Deputy CM Manish Sisodia's house