ବୈବାହିକ ବଳାତ୍କାର ମାମଲାରେ ଦିଲ୍ଲୀ ହାଇକୋର୍ଟରେ କେନ୍ଦ୍ରର ପକ୍ଷ : ପାଶ୍ଚାତ୍ୟ ଦେଶକୁ ଅଖି ବୁଜି ଅନୁସରଣ କରି ପାରିବୁ ନାହିଁ

ଆବେଦନକୁ ବିରୋଧ କରି କେନ୍ଦ୍ର ସରକାର କହିଛନ୍ତି ଯେ ଯଦି ଏହାକୁ ଅପରାଧ ବର୍ଗରେ ରଖାଯାଏ, ତେବେ ମହିଳାମାନେ ନିଜ ସ୍ୱାମୀଙ୍କୁ ହଇରାଣ କରିବା କିମ୍ବା ବ୍ଲାକମେଲ କରିବା ପାଇଁ ଏହି ଆଇନକୁ ସହଜରେ ବ୍ୟବହାର କରିପାରିବେ ।

Updated: Saturday, January 29, 2022, 18:29 [IST]

ନୂଆଦିଲ୍ଲୀ : କରୋନା ମହାମାରୀ ସମୟରେ ଲଗାଯାଇଥିବା ଲକଡାଉନ୍ ଯୋଗୁଁ ଦେଶରେ ବୈବାହିକ ବଳାତ୍କାର ମାମଲା ଯଥେଷ୍ଟ ବୃଦ୍ଧି ପାଇଛି । ବୈବାହିକ ବଳାତ୍କାରକୁ ଆଇନଗତ ଅପରାଧ ବୋଲି ଘୋଷଣା କରିବାର ଚାହିଦା ବଢିଚାଲିଛି । ଆଜି ଅର୍ଥାତ୍ ଶନିବାର ଦିନ ଦିଲ୍ଲୀ ହାଇକୋର୍ଟ ବୈବାହିକ ବଳାତ୍କାର ମାମଲାରେ ଏକ ପିଟିସନର ଶୁଣାଣି କରିଛନ୍ତି ।

ଗଣମାଧ୍ୟମର ରିପୋର୍ଟ ଅନୁଯାୟୀ, ଏହି ଆବେଦନକୁ ବିରୋଧ କରି କେନ୍ଦ୍ର ସରକାର କହିଛନ୍ତି ଯେ ଯଦି ଏହାକୁ ଅପରାଧ ବର୍ଗରେ ରଖାଯାଏ, ତେବେ ମହିଳାମାନେ ନିଜ ସ୍ୱାମୀଙ୍କୁ ହଇରାଣ କରିବା କିମ୍ବା ବ୍ଲାକମେଲ କରିବା ପାଇଁ ଏହି ଆଇନକୁ ସହଜରେ ବ୍ୟବହାର କରିପାରିବେ । ଏହି ପ୍ରସଙ୍ଗରେ ପାଶ୍ଚାତ୍ୟ ଦେଶଗୁଡ଼ିକୁ ଅନ୍ଧ ଭାବରେ ଅନୁସରଣ କରିବା ଉଚିତ ନୁହେଁ ବୋଲି କେନ୍ଦ୍ର ଦିଲ୍ଲୀ ହାଇକୋର୍ଟଙ୍କୁ କହିଛି ।

ଜଷ୍ଟିସ ରାଜୀବ ଶକଦରଙ୍କ ନେତୃତ୍ୱରେ ଏକ ଖଣ୍ଡପୀଠ ସମ୍ମୁଖରେ କେନ୍ଦ୍ର ସରକାର ଯୁକ୍ତି ଦର୍ଶାଇଥିଲେ ଯେ ସ୍ୱାମୀ-ସ୍ତ୍ରୀଙ୍କ ମଧ୍ୟରେ ଯୌନ ସମ୍ପର୍କକୁ ଏକ ବୈବାହିକ ସଂପର୍କରେ ସମ୍ମତିର ବିଷୟ ଭାବେ ଗ୍ରହଣ କରାଯାଇପାରିବ ନାହିଁ । ଏହାକୁ ବିବାହ ପ୍ରସଙ୍ଗରୁ ଅଲଗା କରାଯାଇପାରିବ ନାହିଁ । ବୈବାହିକ ବଳାତ୍କାର ଅନ୍ୟ ଦେଶରେ ଆଇନ ବର୍ଗରେ ରଖାଯାଇଥାଇପାରେ କିନ୍ତୁ ଭାରତର ନିଜସ୍ୱ ମାମଲା ରହିଛି ବୋଲି କହିଛି କେନ୍ଦ୍ର ।

ସାକ୍ଷରତା, ଅର୍ଥନୈତିକ ଦୁର୍ବଳତା, ମହିଳା ସଶକ୍ତିକରଣର ଅଭାବ, ଭାରତରେ ଦାରିଦ୍ର୍ୟ ଭଳି ଅନେକ କାରଣ ରହିଛି ବୋଲି କେନ୍ଦ୍ର ସରକାର କହିଛନ୍ତି । ତେଣୁ ଭାରତ ଏହି ପ୍ରସଙ୍ଗରେ ଅତି ଯତ୍ନର ସହ ଆଗକୁ ବଢିବା ଉଚିତ୍ । ଜଷ୍ଟିସ ସି ହରି ଶଙ୍କର ମଧ୍ୟ ଏହି ଆବେଦନ ଉପରେ ଶୁଣାଣି କରୁଥିବା ଖଣ୍ଡପୀଠରେ ଅଛନ୍ତି ।

କେନ୍ଦ୍ର ନିଜର ଯୁକ୍ତିରେ କହିଛି ଦୁଇ ଜଣ ଅପରିଚିତ ବ୍ୟକ୍ତିଙ୍କ ମଧ୍ୟରେ ବଳାତ୍କାର ଏବଂ ବିବାହ ପରେ ସ୍ୱାମୀ-ସ୍ତ୍ରୀଙ୍କ ମଧ୍ୟରେ ଶାରୀରିକ ସମ୍ପର୍କ ମାମଲା ସମାନ ହୋଇପାରିବ ନାହିଁ । ତେବେ ବିବାହ ପରେ ଅଭିଯୁକ୍ତ ସ୍ୱାମୀଙ୍କୁ ଦଣ୍ଡ ଦେବା ପାଇଁ ଆଇପିସିର ଧାରା 376 ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରିବ ।