ରାହୁଲ ଗାନ୍ଧୀଙ୍କ ଭାଷଣ ଓ ଆଦାନୀ ପ୍ରସଙ୍ଗରେ ମୁହାଁମୁହିଁ ହେଲେ ଶାସକ-ବିରୋଧୀ, ମୁଲତବୀ ହେଲା ଉଭୟ ଗୃହ

ଗୃହରେ ଉତ୍ତେଜନା ଦେଖାଦେବାରୁ ଲୋକସଭାର ପ୍ରକ୍ରିୟା ମାର୍ଚ୍ଚ 20 ସୋମବାର ପର୍ଯ୍ୟନ୍ତ ମୁଲତବୀ ରଖାଯାଇଛି । ଏଥିସହିତ ରାଜ୍ୟସଭାରେ ମଧ୍ୟ ହଙ୍ଗାମା ଦେଖାଦେବାରୁ ଗୃହକୁ ମାର୍ଚ୍ଚ 20 ପର୍ଯ୍ୟନ୍ତ ମୁଲତବୀ ଘୋଷଣା କରାଯାଇଛି ।

Updated: Friday, March 17, 2023, 14:46 [IST]

ନୂଆଦିଲ୍ଲୀ : ସଂସଦର ବଜେଟ୍ ଅଧିବେଶନର ଦ୍ୱିତୀୟ ପର୍ଯ୍ୟାୟ ଆରମ୍ଭରୁ ଗୋଟିଏ ଦିନ ମଧ୍ୟ ଗୃହ ସ୍ୱାଭାବିକ ଭାବେ ଚାଲି ପାରିନାହିଁ । ପ୍ରତିଦିନ ଗୃହରେ ଶାସକ - ବିରୋଧୀଙ୍କ ହଙ୍ଗାମା ଯୋଗୁଁ ଗୃହ କାର୍ଯ୍ୟରେ ବାଧା ସୃଷ୍ଟି ହେଉଛି । ଏପରିକି ପ୍ରତ୍ୟେକ ଦିନ ଉଭୟ ସଦନକୁ ବାରମ୍ବାର ମୁଲତବୀ ଘୋଷଣା କରାଯାଉଛି ।

ଦ୍ୱିତୀୟ ପର୍ଯ୍ୟାୟ ଅଧିବେଶନ ଆରମ୍ଭରୁ ସରକାର ଏବଂ ବିରୋଧୀ ବିଭିନ୍ନ ପ୍ରସଙ୍ଗକୁ ନେଇ ମୁହାଁମୁହିଁ ହେଉଛନ୍ତି । ଶାସକ ବିଜେପିର ସଦସ୍ୟ ମାନେ ରାହୁଲ ଗାନ୍ଧୀ ଳଣ୍ଡନରେ ଦେଇଥିବା ଭାଷଣକୁ ନେଇ ଗୃହରେ ହଟ୍ଟଗୋଲ କରୁଥିବା ବେଳେ ବିରୋଧୀ ଆଦାନୀ ପ୍ରସଙ୍ଗରେ ସରକାରକୁ ଘେରି ରହିଛନ୍ତି ।

ଏହି ସମୟରେ ଶୁକ୍ରବାର ଦିନ ମଧ୍ୟ ଲୋକସଭାରେ ଭାରତୀୟ ଜନତା ପାର୍ଟିର ସାଂସଦମାନେ ଲଣ୍ଡନରେ କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କ ଭାଷଣକୁ ବିରୋଧ କରି ତାଙ୍କଠାରୁ କ୍ଷମା ଦାବି କରିଥିଲେ । ଗୃହରେ ଉତ୍ତେଜନା ଦେଖାଦେବାରୁ ଲୋକସଭାର ପ୍ରକ୍ରିୟା ମାର୍ଚ୍ଚ 20 ସୋମବାର ପର୍ଯ୍ୟନ୍ତ ମୁଲତବୀ ରଖାଯାଇଛି । ଏଥିସହିତ ରାଜ୍ୟସଭାରେ ମଧ୍ୟ ହଙ୍ଗାମା ଦେଖାଦେବାରୁ ଗୃହକୁ ମାର୍ଚ୍ଚ 20 ପର୍ଯ୍ୟନ୍ତ ମୁଲତବୀ ଘୋଷଣା କରାଯାଇଛି ।

ରାଜ୍ୟସଭାରେ ବିରୋଧୀମାନେ ଆଦାନୀ ଗୋଷ୍ଠୀ ଉପରେ ହିଣ୍ଡେନବର୍ଗ ରିପୋର୍ଟ ପ୍ରସଙ୍ଗ ଉଠାଇ ଏହି ଘଟଣାର ତଦନ୍ତ ପାଇଁ ମିଳିତ ସଂସଦ ଗଠନ କରିବାକୁ ଦାବି କରିଥିଲେ । ବିରୋଧୀଦଳ କହିଛନ୍ତି ଯେ ଦେଶ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଗୌତମ ଆଦାନୀଙ୍କ ମଧ୍ୟରେ ବନ୍ଧୁତ୍ୱର ପରିଣାମର ଶିକାର ହେଉଛି । ଏହା ପରେ ଗୃହରେ ଉତ୍ତେଜନା ବୃଦ୍ଧି ପାଇଥିଲା । ଫଳରେ ରାଜ୍ୟସଭା ପ୍ରକ୍ରିୟା ସୋମବାର ପର୍ଯ୍ୟନ୍ତ ମୁଲତବୀ ରଖାଯାଇଛି ।

ଗୃହ ମୁଲତବୀ ହେବା ପରେ ବିରୋଧୀମାନେ ସଂସଦ ପରିସରରେ ବସି ବିକ୍ଷୋଭ ପ୍ରଦର୍ଶନ କରି ସରକାରଙ୍କ ବିରୋଧରେ ସ୍ଲୋଗାନ ଦେଇଥିଲେ । ବିରୋଧୀ ଦଳ କହିଛନ୍ତି ଯେ ମିଳିତ ସଂସଦୀୟ କମିଟି ଗଠନ ଦ୍ୱାରା ବିଜେପିର ପ୍ରକୃତ ଚେହେରା ପ୍ରକାଶ ପାଇବ, ତେଣୁ ସେମାନେ ଏହି ପ୍ରସଙ୍ଗରୁ ଦୂରେଇ ଯାଉଛନ୍ତି ।

ଉଲ୍ଲେଖଯୋଗ୍ୟ, ଲଣ୍ଡନରେ ତାଙ୍କ ଭାଷଣରେ କଂଗ୍ରେସ ସାଂସଦ ରାହୁଲ ଗାନ୍ଧୀ କହିଥିଲେ ଯେ ଭାରତରେ ବିରୋଧୀଙ୍କୁ ସଂସଦ ଭିତରେ କହିବାକୁ ଅନୁମତି ନାହିଁ । ସେ କହିଛନ୍ତି ଯେ ଯେତେବେଳେ ବିରୋଧୀ ସରକାରଙ୍କୁ ପ୍ରଶ୍ନ କରନ୍ତି ସେତେବେଳେ ସେମାନଙ୍କର ମାଇକ ବନ୍ଦ କରିଦିଆଯାଏ ।

ରାହୁଲ ଗାନ୍ଧୀଙ୍କ ଏହି ବିବୃତ୍ତିରେ କେନ୍ଦ୍ର ସରକାର ଏବଂ ବିଜେପି ଦୃଢ ଆପତ୍ତି ଜଣାଇ କହିଛନ୍ତି ଯେ ସେ ବିଦେଶ ଯାଇ ଭାରତୀୟ ଗଣତନ୍ତ୍ର ଏବଂ ଭାରତ ସଂସଦକୁ ଅପମାନିତ କରିଛନ୍ତି । ଏଥି ସହ ରାହୁଲ ଗାନ୍ଧୀଙ୍କ ପକ୍ଷରେ ଆସି କଂଗ୍ରେସ କହିଛି ଯେ ରାହୁଲ ଗାନ୍ଧୀ କିଛି କହି ନାହାଁନ୍ତି ଯେଉଁଥିପାଇଁ ତାଙ୍କୁ କ୍ଷମା ମାଗିବାକୁ ପଡିବ । କଂଗ୍ରେସ କହିଛି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିଜେ ବିଦେଶରେ ଏଭଳି ବିବୃତ୍ତି ଦେଇଛନ୍ତି ତେଣୁ ସେ ପ୍ରଥମେ କ୍ଷମା ମାଗିବା ଉଚିତ୍ ।