ବଜେଟ୍ 2023: ଶିକ୍ଷା ପାଇଁ କଣ ରହିଛି ବଜେଟ୍, ଏକଲବ୍ୟ ମଡେଲ ଆବାସିକ ବିଦ୍ୟାଳୟରେ ବମ୍ପର ନିଯୁକ୍ତି

ଅର୍ଥମନ୍ତ୍ରୀ ନିର୍ମଳା ସୀତାରମଣ 2023-24 ବର୍ଷ ପାଇଁ ବାର୍ଷିକ ବଜେଟରେ ଶିକ୍ଷା ବଜେଟରେ 8% ବୃଦ୍ଧି ଘୋଷଣା କରିଛନ୍ତି । 2022-23 ମସିହାରେ ଏଥିପାଇଁ 1.04 ଲକ୍ଷ କୋଟି ଟଙ୍କାର ବ୍ୟବସ୍ଥା ଥିଲା, ଆଗାମୀ ଆର୍ଥିକ ବର୍ଷ ପାଇଁ 1.12 ଲକ୍ଷ କୋଟି ଟଙ୍କା କରାଯାଇଛି ।

Updated: Wednesday, February 1, 2023, 17:27 [IST]

ନୂଆଦିଲ୍ଲୀ: ଅର୍ଥମନ୍ତ୍ରୀ ନିର୍ମଳା ସୀତାରମଣ 2023-24 ବର୍ଷ ପାଇଁ ବାର୍ଷିକ ବଜେଟରେ ଶିକ୍ଷା ବଜେଟରେ 8% ବୃଦ୍ଧି ଘୋଷଣା କରିଛନ୍ତି । 2022-23 ମସିହାରେ ଏଥିପାଇଁ 1.04 ଲକ୍ଷ କୋଟି ଟଙ୍କାର ବ୍ୟବସ୍ଥା ଥିଲା, ଯାହା ଆଗାମୀ ଆର୍ଥିକ ବର୍ଷ ପାଇଁ 1.12 ଲକ୍ଷ କୋଟି ଟଙ୍କାକୁ ବୃଦ୍ଧି କରାଯାଇଛି । ଏଥିମଧ୍ୟରୁ ବିଦ୍ୟାଳୟ ଶିକ୍ଷା ବିଭାଗକୁ 68,804 କୋଟି ଏବଂ ଉଚ୍ଚଶିକ୍ଷା ବିଭାଗ 44,094 କୋଟି ଟଙ୍କା ପାଇବେ ।

ଉଲ୍ଲେଖଥାଉ କି, ଗତଥର ଦିଆଯାଇଥିବା ପରି ଶିକ୍ଷା ମନ୍ତ୍ରଣାଳୟର ସବୁଠୁ ବଡ ଯୋଜନା ସର୍ବ ଶିକ୍ଷା ଅଭିଯାନକୁ ଗତ ବର୍ଷ ମିଳିଥିବା ସମାନ ରାଶି ପ୍ରଦାନ କରିବାକୁ ଘୋଷଣା କରାଯାଇଛି । ଏହି ଯୋଜନା ପାଇଁ ଏଥର 37,453 କୋଟି ଟଙ୍କା ପ୍ରଦାନ କରାଯାଇଛି, ଯାହା 2022-23 ଆର୍ଥିକ ବର୍ଷରେ 37,383 କୋଟି ଟଙ୍କା ଥିଲା । କିନ୍ତୁ, ଏହି ବଜେଟରେ ଅର୍ଥମନ୍ତ୍ରୀ ଏପରି କିଛି ଘୋଷଣା କରିଛନ୍ତି ଯାହା ମହାମାରୀ ସମୟରେ ପ୍ରଭାବିତ ଛାତ୍ରମାନଙ୍କ ପାଇଁ ବହୁତ ଲାଭଦାୟକ ହେବାର ସମ୍ଭାବନା ରହିଛି ।

ଅର୍ଥମନ୍ତ୍ରୀ ନିର୍ମଳା ସୀତାରମଣ ବଜେଟ୍ ଅଭିଭାଷଣରେ ଶିଶୁ ଏବଂ କିଶୋରମାନଙ୍କ ପାଇଁ ନ୍ୟାସନାଲ ଡିଜିଟାଲ ଲାଇବ୍ରେରୀ ପ୍ରତିଷ୍ଠା କରିବାକୁ ଘୋଷଣା କରିଛନ୍ତି । 2018 ରେ ମଧ୍ୟ ଏହା ଘୋଷଣା କରାଯାଇଥିଲା ଏବଂ ଆଇଆଇଟି ଖରାଗପୁର ମଧ୍ୟ ଏକ ଜାତୀୟ ଡିଜିଟାଲ୍ ଲାଇବ୍ରେରୀ ଚଳାଉଛି । ତେବେ ବର୍ତ୍ତମାନର ବ୍ୟବସ୍ଥା ଏବଂ ନୂତନ ଘୋଷଣା ମଧ୍ୟରେ ପାର୍ଥକ୍ୟ କ'ଣ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ ।

ବଜେଟ୍ ଘୋଷଣା ଅନୁଯାୟୀ, ପାଠ୍ୟକ୍ରମ ବିନିମୟ, ନିରନ୍ତର ବୃତ୍ତିଗତ ବିକାଶ, ଡିପଷ୍ଟିକ୍ ସର୍ଭେ ଏବଂ ସୂଚନା ଏବଂ ଯୋଗାଯୋଗ ପ୍ରଯୁକ୍ତିବିଦ୍ୟା (ଆଇସିଟି) ର କାର୍ଯ୍ୟକାରିତା ଉପରେ ଶିକ୍ଷକ ତାଲିମ ଏକ ଅଭିନବ ଉପାୟରେ ନବୀକରଣ କରାଯିବ । ଏଥିପାଇଁ ଜିଲ୍ଲା ଶିକ୍ଷା ଏବଂ ତାଲିମ ପ୍ରତିଷ୍ଠାନଗୁଡିକ ଉତ୍କୃଷ୍ଟ ତଥା ଜୀବନ୍ତ ଅନୁଷ୍ଠାନ ଭାବରେ ବିକଶିତ ହେବ । ଏଥି ସହିତ ଡାକ୍ତରୀ ଶିକ୍ଷାକୁ ପ୍ରୋତ୍ସାହିତ କରିବା ପାଇଁ 157 ଟି ନୂତନ ନର୍ସିଂ କଲେଜ ପ୍ରତିଷ୍ଠା କରାଯିବ ଏବଂ ଚିକିତ୍ସା ଉପକରଣର ତାଲିମ ପାଇଁ ନୂତନ କାର୍ଯ୍ୟକ୍ରମ ଆରମ୍ଭ ହେବ ।

ଚଳିତ ବର୍ଷର ବଜେଟରେ ଶିକ୍ଷା ସମ୍ବନ୍ଧରେ ଦିଆଯାଇଥିବା ଏକ ବଡ ଘୋଷଣାରେ ରହିଛି ଏକଲବ୍ୟ ମଡେଲ ଆବାସିକ ବିଦ୍ୟାଳୟ । ଏଥିପାଇଁ କେନ୍ଦ୍ର ସରକାର ଆସନ୍ତା 3 ବର୍ଷରେ 38,800 ଶିକ୍ଷକ ଏବଂ ସହାୟକ କର୍ମଚାରୀ ନିଯୁକ୍ତି କରିବେ । ଏହା ଫଳରେ ଦେଶର 740 ଏକଲବ୍ୟ ମଡେଲ ଆବାସିକ ବିଦ୍ୟାଳୟରେ ପଢୁଥିବା 3.5 ଲକ୍ଷ ଆଦିବାସୀ ଛାତ୍ରଛାତ୍ରୀ ଉପକୃତ ହେବେ ।