ରାଲି ଓ ରୋଡ଼ ସୋ ଉପରେ ପ୍ରତିବନ୍ଧକ ଫେବୃଆରୀ 11 ଯାଏଁ ବୃଦ୍ଧି, କୋହଳ ହେଲା କଟକଣା

ଉତ୍ତର ପ୍ରଦେଶ, ଉତ୍ତରାଖଣ୍ଡ, ପଞ୍ଜାବ, ଗୋଆ ଓ ମଣିପୁରରେ ହେବାକୁ ଥିବା ବିଧାନସଭା ନିର୍ବାଚନ ପୂର୍ବରୁ ରାଲି ଓ ରୋଡ଼ ସୋ ଉପରେ ଥିବା ପ୍ରତିବନ୍ଧକ ଅବଧିକୁ ଫେବୃଆରୀ 11 ତାରିଖ ଯାଏଁ ବୃଦ୍ଧି କରିଛନ୍ତି ନିର୍ବାଚନ କମିଶନ ।

Published: Monday, January 31, 2022, 17:24 [IST]

ନୂଆଦିଲ୍ଲୀ : ଉତ୍ତର ପ୍ରଦେଶ, ଉତ୍ତରାଖଣ୍ଡ, ପଞ୍ଜାବ, ଗୋଆ ଓ ମଣିପୁରରେ ହେବାକୁ ଥିବା ବିଧାନସଭା ନିର୍ବାଚନ ପୂର୍ବରୁ ରାଲି ଓ ରୋଡ଼ ସୋ ଉପରେ ଥିବା ପ୍ରତିବନ୍ଧକ ଅବଧିକୁ ଫେବୃଆରୀ 11 ତାରିଖ ଯାଏଁ ବୃଦ୍ଧି କରିଛନ୍ତି ନିର୍ବାଚନ କମିଶନ । କରୋନା ତୃତୀୟ ଲହର ମଧ୍ୟରେ ଏହି ନିର୍ବାଚନ ଅନୁଷ୍ଠିତତ ହେଉଥିବାରୁ ନିର୍ଚାଚନ କମିଶନ ଏହି ସମସ୍ତ କଟକଣା ଜାରି କରିଛନ୍ତି ।

କିନ୍ତୁ ପୂର୍ବରୁ ଥିବା କେତେକ କଟକଣାକୁ ସମାନ୍ୟ କୋହଳ କରିଛନ୍ତି ନିର୍ବାଚନ କମିଶନ । ରାଜନୈତିକ ଦଳ ଗୁଡ଼ିକ ସର୍ବାଧିକ 1000 ଲୋକଙ୍କୁ ନେଇ ଖୋଲା ସ୍ଥାନରେ ଜନ ସମାବେଶ କରିପାରିବେ । ଏଥିସହିତ ଡୋର ଟୁ ଡୋର କ୍ୟାମ୍ପେନକୁ ନେଇ ଧାର୍ଯ୍ୟ ସଂଖ୍ୟାକୁ 20 କୁ ବୃଦ୍ଧି କରାଯାଇଛି । ଏହା ପୂର୍ବରୁ 10 ଜଣ ଥିଲା । ସୁରକ୍ଷାକର୍ମୀ ମଧ୍ୟ ଡୋର ଟୁ ଡୋର କ୍ୟାମ୍ପେନ୍‌ରେ ସାମିଲ ହୋଇପାରିବେ । ତେବେ ବନ୍ଦ କୋଠରୀ କିମ୍ବା ଆବଦ୍ଧ ସ୍ଥାନରେ 500 ଲୋକଙ୍କୁ ନେଇ ବୈଠକ କରିପାରବାର ଅନୁମତି ରହିଛି । ସାଧାରଣ ନିର୍ବାଚନ ଅନୁଷ୍ଠିତ ହେବାକୁ ଥିବା 5 ରାଜ୍ୟର ସ୍ୱାସ୍ଥ୍ୟମନ୍ତ୍ରୀ ଓ ମୁଖ୍ୟ ସଚିବଙ୍କ ସହ ଭିଡିଓ କନ୍‌ଫରେନ୍ସିଂ ଜରିଆରେ ଆଲୋଚନା ପରେ ଏଭଳି ନିଷ୍ପତ୍ତି ନେଇଛନ୍ତି ।

ଆଲୋଚନାରେ ଟିକାକରଣର ସ୍ଥିତି, ପୋଲିଂ କାର୍ଯ୍ୟରେ ନିୟୋଜିତ ହେବାକୁ ଥିବା କର୍ମଚାରୀଙ୍କ ଟିକାକରଣ ସମ୍ପର୍କରେ ନିର୍ବାଚନ କମିଶନଙ୍କୁ ରାଜ୍ୟମାନେ ଅବଗତ କରାଇଥିଲେ । ପ୍ରାପ୍ତ ସୂଚନା ମୁତାବକ ସଂକ୍ରମଣ ହାର କମିବା ସହ ହସ୍ପିଟାଲରେ ଭର୍ତ୍ତି ସଂଖ୍ୟା ମଧ୍ୟ କମିଥିବା କହିଛନ୍ତି ନିର୍ବାଚନ କମିଶନ ।
ତେବେ ଏସବୁ କରିବାବେଳେ କୋଭିଡ ନିୟମ ପାଳନ କରାଯିବ ବୋଲି ଆୟୋଗ କଡ଼ା ନିର୍ଦ୍ଦେଶ ଦେଇଛନ୍ତି । ତେବେ ଫେବୃଆରୀ 11 ପର୍ଯ୍ୟନ୍ତ କୌଣସି ରୋଡ ସୋ, ସାଇକେଲ ବା ବାଇକ ରାଲିକୁ ଅନୁମତି ଦିଆଯିବ ନାହିଁ ।

Published On January 31, 2022