ଆସାମ ବନ୍ୟାରେ 22 ଟି ଜିଲ୍ଲା ପ୍ରଭାବିତ, ପାଣି ଘେରରେ 5 ଲକ୍ଷ ଲୋକ, ଜଣଙ୍କର ମୃତ୍ୟୁ

Updated: Friday, June 23, 2023, 14:28 [IST]

Assam Flood : ଆସାମରେ ଗମ୍ଭାର ହେବାରେ ଲାଗିଛି ବନ୍ୟା ପରିସ୍ଥିତି । ରାଜ୍ୟରେ ବନ୍ୟା ପରିସ୍ଥିତି ଯୋଗୁଁ 22 ଜିଲ୍ଲା ପ୍ରଭାବିତ ହୋଇଛି । ଏପରିକି ବନ୍ୟା ଯୋଗୁଁ ଜଣଙ୍କର ମୃତ୍ୟୁ ହୋଇଥିବାବେଳେ ପ୍ରାୟ ପାଞ୍ଚ ଲକ୍ଷ ଲୋକ ପ୍ରଭାବିତ ହୋଇଛନ୍ତି । ବ୍ରହ୍ମପୁତ୍ର ସମେତ ଅନେକ ନଦୀ ରାଜ୍ୟର ବିଭିନ୍ନ ସ୍ଥାନରେ ବିପଦ ସଙ୍କେତ ଉପରେ ପ୍ରବାହିତ ହେଉଛି ।

ଅନ୍ୟପକ୍ଷରେ ଆସନ୍ତା କିଛି ଦିନ ମଧ୍ୟରେ ପ୍ରବଳ ବର୍ଷା ହେବ ବୋଲି ଭାରତ ପାଣିପାଗ ବିଭାଗ (ଆଇଏମଡି) ପୂର୍ବାନୁମାନ କରିଛି, ଯେଉଁଥିପାଇଁ ଜଳ ସ୍ତର ଆହୁରି ବଢିପାରେ ବୋଲି ଆଶଙ୍କା କରାଯାଉଛି । ବନ୍ୟା ଯୋଗୁଁ ଜଣଙ୍କର ମୃତ୍ୟୁ ହୋଇଥିବା ସୂଚନା ମିଳିଛି । ଆସାମ ରାଜ୍ୟ ବିପର୍ଯ୍ୟୟ ପରିଚାଳନା ପ୍ରାଧିକରଣ (ASDMA) ରିପୋର୍ଟ ଅନୁଯାୟୀ ଗୁରୁବାର ସନ୍ଧ୍ୟା ପର୍ଯ୍ୟନ୍ତ ବନ୍ୟା ଯୋଗୁଁ 4.95 ଲକ୍ଷ ଲୋକ ପ୍ରଭାବିତ ହୋଇଥିଲେ ।

କେନ୍ଦ୍ରୀୟ ଜଳ ଆୟୋଗ (ସିଡବ୍ଲୁସି) ର ଏକ ରିପୋର୍ଟରେ ଦର୍ଶାଯାଇଛି ଯେ ନେମାଟିଘାଟ (ଜୋରହାଟ) ଏବଂ ଧୁବ୍ରିରେ ବ୍ରହ୍ମପୁତ୍ର ବିପଦ ସ୍ତର ଉପରେ ପ୍ରବାହିତ ହେଉଛି । ପୁଥିମାରି (କାମ୍ରୁପ), ପାଗ୍ଲାଗିଆ (ନାଲବାରୀ) ଏବଂ ମାନସ (ବାରପେଟା) ପରି ଅନ୍ୟ ନଦୀଗୁଡ଼ିକ ମଧ୍ୟ ରେଡ୍ ଆଲର୍ଟ ଉପରେ ପ୍ରବାହିତ ହେଉଥିଲା । ବନ୍ୟା ଜଳ ଘରେ ପ୍ରବେଶ କରୁଥିବାରୁ ଅନେକ ଲୋକ ନିରାପଦ ସ୍ଥାନକୁ ଯିବାକୁ ବାଧ୍ୟ ହୋଇଛନ୍ତି ।

ପାଣିପାଗ ବିଭାଗ ଶୁକ୍ରବାର ଦିନ ୟେଲୋ ୱାର୍ଣ୍ଣିଂ ଜାରି କରି ଲୋକଙ୍କୁ ସତର୍କ ରହିବାକୁ ଏବଂ ରାଜ୍ୟର କେତେକ ଅଞ୍ଚଳରେ ପ୍ରବଳ ବର୍ଷା ଓ ଝଡ ବିଷୟରେ ଅପଡେଟ୍ ରହିବାକୁ ପରାମର୍ଶ ଦେଇଛି । ସାତୋଟି ଜିଲ୍ଲାର 83 ଟି ରିଲିଫ କ୍ୟାମ୍ପରେ 14,000 ରୁ ଅଧିକ ଲୋକ ରହୁଛନ୍ତି । 79 ଟି ରିଲିଫ୍ ବଣ୍ଟନ କେନ୍ଦ୍ର ମଧ୍ୟ କାର୍ଯ୍ୟକ୍ଷମ ଅଛି ।

ASDMA ରିପୋର୍ଟରେ କୁହାଯାଇଛି ଯେ ସୋନିଟପୁର, ବଙ୍ଗାଇଗାଓଁ, ଡାରାଙ୍ଗ, ଧୁବ୍ରି, ଲାଖିମପୁର, ମୋରିଗାଓଁ, ନାଲବାରୀ, ଦକ୍ଷିଣ ସଲମାରା ଏବଂ ଉଦଲଗୁରିରେ ବ୍ୟାପକ କ୍ଷୟକ୍ଷତି ହୋଇଛି । ପ୍ରବଳ ବର୍ଷା ବଙ୍ଗାଇଗାଓଁ ଏବଂ ଡିମାରେ ଭୂସ୍ଖଳନ ହୋଇଛି । ଏହି ବନ୍ୟାରେ ବାରପେଟା, ସୋନିଟପୁର, ଡାରାଙ୍ଗ, ନାଲବାରୀ, ବକସା, ଚିରଙ୍ଗ, ଧୁବ୍ରି, କୋକ୍ରାଜହର, ଲାଖିମପୁର, ଉଦଲଗୁରୀ, ବଙ୍ଗାଇଗାଓଁ, ଧମାଜୀ ଏବଂ ଦିବ୍ରୁଗଡରେ ଥିବା ବନ୍ଧ, ରାସ୍ତା, ବ୍ରିଜ ଏବଂ ଅନ୍ୟାନ୍ୟ ଭିତ୍ତିଭୂମି ନଷ୍ଟ ହୋଇଯାଇଛି ।

ASDMA ରିପୋର୍ଟରେ କୁହାଯାଇଛି ଯେ ବାରପେଟା, ଡାରଙ୍ଗ, ଜୋରହାଟ, କାମ୍ରୁପ ମହାନଗର ନିଗମ ଏବଂ କୋକରାଜହାର ଜିଲ୍ଲାର ଅନେକ ସ୍ଥାନରେ ସହରାଞ୍ଚଳ ଜଳମଗ୍ନ ହୋଇଛି । ପାରାମିଲିଟାରୀ ଫୋର୍ସ, NDRF, SDRF, ଅଗ୍ନି ଏବଂ ଜରୁରୀକାଳୀନ ସେବା (F&ES), ନାଗରିକ ପ୍ରଶାସନ, ଏନଜିଓ ଏବଂ ସ୍ଥାନୀୟ ଲୋକ ଉଦ୍ଧାର ଓ ରିଲିଫ କାର୍ଯ୍ୟରେ ନିୟୋଜିତ ଅଛନ୍ତି ।