ରାଜସ୍ଥାନରେ ଆତ୍ମସମର୍ପଣ କରିପାରେ ଅମୃତପାଲ, ହନୁମାନଗଡର ସନ୍ତପୁରାରେ ଜାରି ରହିଛି ସର୍ଚ୍ଚ ଅପରେସନ

Published: Friday, April 14, 2023, 14:56 [IST]

ଜୟପୁର : ୱାରିସ୍ ଦେ ପଞ୍ଜାବର ମୁଖ୍ୟ ଅମୃତପାଲ ସିଂହ ଆତ୍ମସମର୍ପଣ କରିପାରେ । ରାଜସ୍ଥାନର ହନୁମାନଗଡ ଜିଲ୍ଲାର ସନ୍ତପୁରା ଗାଁରେ ଲୁଚି ରହିଥିବା ଖବର ପାଇବା ପରେ ସର୍ଚ୍ଚ ଅପରେସନ୍ ଜାରି ରହିଛି । ପଞ୍ଜାବ, ରାଜସ୍ଥାନ ଏବଂ ହରିୟାଣା ପୋଲିସ ସମେତ କେନ୍ଦ୍ରୀୟ ଏଜେନ୍ସିମାନେ ଏଠାରେ କ୍ୟାମ୍ପ କରି ସର୍ଚ୍ଚ ଅପରେସନ୍ କରୁଛନ୍ତି । ସେ କୌଣସି ଏକ ଗୁରୁଦ୍ୱାରରେ ଆତ୍ମସମର୍ପଣ କରିପାରେ ବୋଲି ମଧ୍ୟ ଖବର ସାମ୍ନାକୁ ଆସୁଛି ।

ରାଜସ୍ଥାନ ଡିଜିପି ଉମେଶ ମିଶ୍ରଙ୍କ ଅନୁଯାୟୀ, ଅମୃତପାଲ ରାଜସ୍ଥାନ ସୀମାରେ ପ୍ରବେଶ କରିଥିବା ଖବର ପାଇବା ପରେ ବୁଧବାର ରାତି 12 ଟାରୁ ସର୍ଚ୍ଚ ଅପରେସନ କରାଯାଇଛି । ଶୁକ୍ରବାର ମଧ୍ୟ ସର୍ଚ୍ଚ ଅପରେସନ୍ ଜାରି ରହିପାରେ । ତେବେ ସେ ରାଜସ୍ଥାନ ସୀମାରେ ପ୍ରବେଶ କରିଛି କି ନାହିଁ ତାହା ଏପର୍ଯ୍ୟନ୍ତ ନିଶ୍ଚିତ ହୋଇନାହିଁ । ସର୍ଚ୍ଚ ଅପରେସନ୍ ଶେଷ ହେବା ପରେ ପରିସ୍ଥିତି ସ୍ପଷ୍ଟ ହେବ ।

ସୂଚନା ଅନୁଯାୟୀ, ତିନୋଟି ରାଜ୍ୟର କେନ୍ଦ୍ରୀୟ ଏଜେନ୍ସି ଏବଂ ପୋଲିସ ହନୁମାନଗଡ ଜିଲ୍ଲାର ସାଙ୍ଗରିଆ ଅଞ୍ଚଳର ସନ୍ତପୁରା ଗ୍ରାମରେ ପହଞ୍ଚିଥିଲେ । ପ୍ରାୟ 30 ଟି ଗାଡିର ଏକ କନଭେନ ସନ୍ତପୁରା ଗାଁରେ ପହଞ୍ଚି ସର୍ଚ୍ଚ ଅପରେସନ୍ ଆରମ୍ଭ କରିଥିଲେ ।

ରାଜସ୍ଥାନ ପତ୍ରିକାରେ ଜଣେ ପୋଲିସ ଅଧିକାରୀ ନାମ ଗୋପନ ରଖିବା ସର୍ତ୍ତରେ ପ୍ରକାଶିତ ଖବର ଅନୁଯାୟୀ, ଅମୃତପାଲ ବୈଶାଖୀ ଅବସରରେ ହନୁମାନଗଡ ଜିଲ୍ଲାର କୌଣସି ଗୁରୁଦ୍ୱାରରେ ଆତ୍ମସମର୍ପଣ କରିପାରେ ବୋଲି ଉଲ୍ଲେଖ ରହିଛି । ସେ ବିକାନେରରେ ଲୁଚି ରହିଥିବାର ସନ୍ଦେହ କରାଯାଉଛି । ଏଭଳି ପରିସ୍ଥିତିରେ ବିକାନେର ପୋଲିସ ମଧ୍ୟ ଆଲର୍ଟ ମୋଡ଼ରେ ରହିଛି । ଅନ୍ୟପକ୍ଷରେ, ଅମୃତପାଲକୁ ହୋଶିଆରପୁରରେ ଆଶ୍ରୟ ଦେଇଥିବା ଦୁଇ ଭାଇଙ୍କୁ ପଞ୍ଜାବ ପୋଲିସ ଗିରଫ କରିଛି ।

Published On April 14, 2023