କାବୁଲ ବିସ୍ଫୋରଣ : କାବୁଲ ଆକ୍ରମଣରେ ପ୍ରାଣ ହରାଇଥିବା ବ୍ୟକ୍ତିଙ୍କ ସମ୍ମାନାର୍ଥେ ଅର୍ଦ୍ଧନମିତ ରହିବ ଆମେରିକାର ପତାକା

ଗୁରୁବାର ଦିନ କାବୁଲ ବିମାନବନ୍ଦର ନିକଟରେ ଦୁଇଜଣ ଆତ୍ମଘାତୀ ବିସ୍ଫୋରଣକାରୀ ଏବଂ ବନ୍ଧୁକଧାରୀଙ୍କ ଦ୍ୱାରା ହୋଇଥିବା ଆକ୍ରମଣରେ 60 ରୁ ଅଧିକ ଲୋକଙ୍କର ମୃତ୍ୟୁ ହୋଇଥିବା ବେଳେ 200 ରୁ ଅଧିକ ଲୋକ ଆହତ ହୋଇଛନ୍ତି ।

Updated: Friday, August 27, 2021, 12:08 [IST]

ୱାଶିଂଟନ୍ : ଗୁରୁବାର ଦିନ କାବୁଲ ବିମାନବନ୍ଦର ନିକଟରେ ଦୁଇଜଣ ଆତ୍ମଘାତୀ ବିସ୍ଫୋରଣକାରୀ ଏବଂ ବନ୍ଧୁକଧାରୀଙ୍କ ଦ୍ୱାରା ହୋଇଥିବା ଆକ୍ରମଣରେ 60 ରୁ ଅଧିକ ଲୋକଙ୍କର ମୃତ୍ୟୁ ହୋଇଥିବା ବେଳେ 200 ରୁ ଅଧିକ ଲୋକ ଆହତ ହୋଇଛନ୍ତି । ପେଣ୍ଟାଗନ୍ କହିଛି ଯେ କାବୁଲ ବିମାନବନ୍ଦର ବାହାରେ ହୋଇଥିବା ଆକ୍ରମଣରେ 13 ଜଣ ଆମେରିକୀୟ ସୈନିକଙ୍କର ପ୍ରାଣ ହାନୀ ହୋଇଥିବା ବେଳେ 18 ଜଣ ଆହତ ହୋଇଛନ୍ତି । କାବୁଲ ବିମାନବନ୍ଦରରେ ହୋଇଥିବା ମାରାତ୍ମକ ଆତ୍ମଘାତୀ ଆକ୍ରମଣ ପାଇଁ ଆତଙ୍କବାଦୀ ସଂଗଠନ ଆଇଏସ୍ଆଇଏସ୍ ର ଖୋରାସାନ ଗୋଷ୍ଠୀ ନିଜକୁ ଦାୟୀ କରିଛି ।

ହ୍ୱାଇଟ ହାଉସ ପକ୍ଷରୁ ଏକ ବିବୃତ୍ତି ଜାରି କରାଯାଇଛି ଯେ କାବୁଲରେ ହୋଇଥିବା ଆତଙ୍କବାଦୀ ଆକ୍ରମଣରେ ପୀଡିତଙ୍କ ସମ୍ମାନାର୍ଥେ ଅଗଷ୍ଟ 30 ତାରିଖ ସନ୍ଧ୍ୟା ପର୍ଯ୍ୟନ୍ତ ଆମେରିକାର ପତାକା ଅର୍ଦ୍ଧନମିତ ରହିବ । ହ୍ୱାଇଟ ହାଉସ ଏହା ମଧ୍ୟ କହିଛି ଯେ ଗତ 24 ଘଣ୍ଟା ମଧ୍ୟରେ 13,400 ଲୋକଙ୍କୁ ଆଫଗାନିସ୍ତାନରୁ ସ୍ଥାନାନ୍ତର କରାଯାଇଛି ।

ପୂର୍ବରୁ ଆମେରିକାର ରାଷ୍ଟ୍ରପତି ଜୋ ବାଇଡେନ ଏହି ଆକ୍ରମଣକୁ ନିନ୍ଦା କରି କହିଛନ୍ତି ଯେ ଆମେ ବିସ୍ପୋରଣକାରୀକୁ କ୍ଷମା କରିବୁ ନାହିଁ, ଆମେ ଭୁଲି ପାରିବୁ ନାହିଁ, ସେମାନଙ୍କୁ ଏହାର ମୂଲ୍ୟ ଦେବାକୁ ପଡିବ । ସେମାନଙ୍କୁ ଯେକୌଣସି ସ୍ଥାନରୁ ଖୋଜି ମାରିବୁ । ତେବେ ଏଥି ସହ ରାଷ୍ଟ୍ରପତି ବାଇଡେନ ଆହୁରି ମଧ୍ୟ କହିଛନ୍ତି ଯେ ତାଲିବାନ ଏବଂ ଆଇଏସଆଇଏସ ମଧ୍ୟରେ ସମ୍ପର୍କର ପ୍ରମାଣ ଆମେ ପାଇ ନାହୁଁ ।

ଏହା ଆତଙ୍କବାଦୀ କାର୍ଯ୍ୟ: ତାଲିବାନ

ଗତକାଲି ବିଳମ୍ବିତ ରାତିରେ ତାଲିବାନର ମୁଖପାତ୍ର ଜବିହୁଲ୍ଲା ମୁଜାହିଦ୍ ଏହା ଆତଙ୍କବାଦୀ କାର୍ଯ୍ୟ ବୋଲି ଏକ ବିବୃତ୍ତି ଜାରି କରିଛନ୍ତି । ଏହି ଆକ୍ରମଣକୁ ନେଇ ଆମେ ସନ୍ଦେହ ପ୍ରକାଶ କରିଥିଲୁ । ଏହା ସହିତ ଆମେରିକାର ଅଧିକାରୀମାନଙ୍କୁ ମଧ୍ୟ ଆଇଏସଆଇଏସର ଏହି ସମ୍ଭାବ୍ୟ ଆକ୍ରମଣ ବିଷୟରେ ଅବଗତ କରାଯାଇଥିଲା । ସେ ଆହୁରି ମଧ୍ୟ କହିଛନ୍ତି ଯେ ତାଲିବାନ ଅନ୍ତର୍ଜାତୀୟ ସମୁଦାୟ ପାଇଁ ପ୍ରତିବଦ୍ଧ । ଏଥି ସହିତ ସେ ଆଫଗାନିସ୍ତାନକୁ ଆତଙ୍କବାଦୀଙ୍କ ଆଶ୍ରୟସ୍ଥଳୀ ହେବାକୁ ଦେବେ ନାହିଁ ବୋଲି କହିଛନ୍ତି ।

ଏଥି ସହ ଭାରତ ମଧ୍ୟ ଏହି ଆକ୍ରମଣକୁ ଦୃଢ ନିନ୍ଦା କରିବା ସହ ଆତଙ୍କବାଦ ବିରୋଧରେ ଏକଜୁଟ ହେବା ଆବଶ୍ୟକ ବୋଲି କହିଛି । ବୈଦେଶିକ ବ୍ୟାପାର ମନ୍ତ୍ରଣାଳୟ ପକ୍ଷରୁ ଜାରି ବିବୃତ୍ତିରେ କୁହାଯାଇଛି ଯେ କାବୁଲରେ ହୋଇଥିବା ବୋମା ବିସ୍ଫୋରଣକୁ ଭାରତ ଦୃଢ ନିନ୍ଦା କରୁଛି । ଏହି ଆତଙ୍କବାଦୀ ଆକ୍ରମଣରେ ପୀଡିତଙ୍କ ପରିବାର ପ୍ରତି ଆମେ ସମବେଦନା ଜଣାଉଛୁ ।

ISIS-K କିମ୍ବା ଖୋରାସାନ୍ ଗୋଷ୍ଠୀ କ'ଣ ?

ଆମେ ଆପଣଙ୍କୁ କହିରଖୁଛୁ ଯେ 2012 ମସିହାରେ ଖୋରାସାନ ଅଞ୍ଚଳରେ କିଛି ବିଦ୍ରୋହୀ ଇରାନ, ତୁର୍କମେନିସ୍ତାନ, ଆଫଗାନିସ୍ତାନ ସୀମାରେ ଏକ ସଂଗଠନ ଗଠନ କରିଥିଲେ, ଯାହା ସ୍ୱାଧୀନତା ନାମରେ ଆକ୍ରମଣ କରୁଥିଲା ଏବଂ ଦୁଇ ବର୍ଷ ମଧ୍ୟରେ ଆତଙ୍କବାଦ ସହିତ ସମକକ୍ଷ ହୋଇପାରିଥିଲା । 2014 ମସିହାରେ, ଏହି ସଂଗଠନ ଆଇଏସ୍ଆଇଏସ୍ ସହିତ ମିଶି ଥିଲା । ଏହାର ନାମ ଆଇଏସ୍ଆଇଏସ୍-କେ ଅର୍ଥାତ୍ ଖୋରାସାନ୍ ଦଳ, ଯାହା ବର୍ତ୍ତମାନ ଏକ ବିପଜ୍ଜନକ ସଂଗଠନରେ ଜଣାଶୁଣା, ଦକ୍ଷିଣ ଏସିଆରେ ଏହାର ଏକ ବଡ଼ ନେଟୱାର୍କ ଅଛି ।