ଯୁଦ୍ଧ ଶେଷ କରିବା ପାଇଁ ପରମାଣୁ ବୋମାର ବ୍ୟବହାର କରିପାରନ୍ତି ପୁଟିନ୍

ଆମେରିକାର ଗୁପ୍ତଚର ବିଭାଗ ଚେତାବନୀ ଦେଇଛି ଯେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ୟୁକ୍ରେନ ଯୁଦ୍ଧକୁ ଶେଷ କରିବା ପାଇଁ ଆଣବିକ ଅସ୍ତ୍ର ବ୍ୟବହାର କରିପାରିନ୍ତି ।

Published: Saturday, March 11, 2023, 17:43 [IST]

ରୁଷ ଏବଂ ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧକୁ ଏକ ବର୍ଷରୁ ଅଧିକ ସମୟ ହୋଇସାରିଲାଣି । କିନ୍ତୁ ଏପର୍ଯ୍ୟନ୍ତ ଏହା ସମାପ୍ତ ହେବାର ନାମ ନେଉନାହିଁ । ଏହି ସମୟରେ ବର୍ତ୍ତମାନ ଆମେରିକୀୟ ଗୁପ୍ତଚର ବିଭାଗ ଏକ ବଡ଼ ଦାବି କରିଛି । ବୁଧବାର ପ୍ରକାଶିତ 'ବାର୍ଷିକ ଧମକ ମୂଲ୍ୟାଙ୍କନ' ରିପୋର୍ଟରେ ଆମେରିକାର ଗୁପ୍ତଚର ବିଭାଗ ଚେତାବନୀ ଦେଇଛି ଯେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ୟୁକ୍ରେନ ଯୁଦ୍ଧକୁ ଶେଷ କରିବା ପାଇଁ ଆଣବିକ ଅସ୍ତ୍ର ବ୍ୟବହାର କରିପାରିନ୍ତି ।

ଆମେରିକାର ଗୁପ୍ତଚର ମୁଖ୍ୟ ଇରୱିନ୍ ହେନ୍ସ ଦାବି କରିଛନ୍ତି ଯେ ଲମ୍ବା ସମୟ ଧରି ଚାଲିଥିବା ଯୁଦ୍ଧ ହେତୁ ରୁଷର କ୍ଷତି ବୃଦ୍ଧି ପାଉଛି । ବର୍ତ୍ତମାନ ପର୍ଯ୍ୟନ୍ତ ଏହି ଯୁଦ୍ଧରେ ହଜାର ହଜାର ରୁଷୀୟ ସୈନିକ ପ୍ରାଣ ହରାଇଛନ୍ତି । କେବଳ ଏତିକି ନୁହେଁ, ରୁଷ ମଧ୍ୟ ଆର୍ଥିକ କ୍ଷତିର ସମ୍ମୁଖୀନ ହେଉଛି । ପାଶ୍ଚାତ୍ୟ ପ୍ରତିବନ୍ଧକ ଯୋଗୁଁ ଏହାର ବିଦେଶୀ ସମ୍ପତ୍ତି ଅକାମୀ ହୋଇଯାଇଛି । ଏଭଳି ପରିସ୍ଥିତିରେ ପୁଟିନ ଏଥିରୁ ମୁକ୍ତି ପାଇବା ପାଇଁ ଏବଂ ତାଙ୍କ ଲୋକଙ୍କ ବିଶ୍ୱାସ ଫେରାଇ ଆଣିବା ପାଇଁ ଆଣବିକ ଅସ୍ତ୍ର ବ୍ୟବହାର କରିପାରନ୍ତି ।

ଆମେରିକାର ଗୁପ୍ତଚର ବିଭାଗର ରିପୋର୍ଟରେ ଦର୍ଶାଯାଇଛି ଯେ ପୁଟିନ ତିନି ଦିନ ମଧ୍ୟରେ ଯୁଦ୍ଧ ଶେଷ କରିବାକୁ ଚିନ୍ତା କରୁଥିଲେ କିନ୍ତୁ ବର୍ତ୍ତମାନ ଏହା ଏକ ବର୍ଷରୁ ଅଧିକ ସମୟ ଧରି ଚାଲିଛି । ରିପୋର୍ଟ ଅନୁଯାୟୀ, ରୁଷର ସୈନ୍ୟବାହିନୀ ଏକ ବର୍ଷ ପୂର୍ବରୁ ଯେଉଁ ପରିସ୍ଥିତିର ସାମ୍ନା କରୁଥିଲେ ବର୍ତ୍ତନାନ ମଧ୍ୟ ସମାନ ପରିସ୍ଥିତିର ସମ୍ମୁଖୀନ ହେଉଛନ୍ତି । ଏଭଳି ପରିସ୍ଥିତିରେ ସେ ବର୍ତ୍ତମାନ ପରମାଣୁ ବୋମା ବ୍ୟବହାର କରି ଯୁଦ୍ଧକୁ ଶେଷ କରିପାରିବେ । ଏହି କାରଣରୁ, ୟୁକ୍ରେନର ଚିନ୍ତା ମଧ୍ୟ ପୂର୍ବ ଅପେକ୍ଷା ଅଧିକ ବୃଦ୍ଧି ପାଇଛି ।

ଏହାପୂର୍ବରୁ ଗୁରୁବାର ଦିନ ରୁଷ ପୁଣି ଥରେ ୟୁକ୍ରେନ ଉପରେ ଏକ ବଡ଼ ଆକ୍ରମଣ କରିଥିଲା । ରୁଷ କ୍ଷେପଣାସ୍ତ୍ର ସହିତ ୟୁକ୍ରେନର ଅନେକ ସହରରେ ଶକ୍ତି କେନ୍ଦ୍ର ଉପରେ ଆକ୍ରମଣ କରିଥିଲା । ସାମ୍ପ୍ରତିକ ସମୟରେ ୟୁକ୍ରେନ ଉପରେ ଏହା ରୁଷର ସବୁଠାରୁ ବଡ ଆକ୍ରମଣ ଥିଲା ଯାହାକି ଅନେକ ଘଣ୍ଟା ଧରି ଚାଲିଥିଲା । ଏହି ସମୟରେ ଆବାସିକ ଅଞ୍ଚଳକୁ ମଧ୍ୟ ଟାର୍ଗେଟ କରାଯାଇଥିବା ଅଭିଯୋଗ ହୋଇଥିଲା । ଏଥିରେ ୟୁକ୍ରେନର ରାଜଧାନୀ କ୍ୱିଭ୍ କୁ ମଧ୍ୟ ଟାର୍ଗେଟ କରାଯାଇଥିଲା । ଏହି ସମୟରେ, ୟୁକ୍ରେନରେ ବାୟୁ ପ୍ରତିରକ୍ଷା ପ୍ରଣାଳୀ ସକ୍ରିୟ ହୋଇଥିଲା । ୟୁକ୍ରେନ ଅଧିକାରୀମାନେ ଏପର୍ଯ୍ୟନ୍ତ କୌଣସି କ୍ଷୟକ୍ଷତି ନିଶ୍ଚିତ କରିନାହାଁନ୍ତି ।

Published On March 11, 2023