ପାକିସ୍ତାନ ସେନା ଉପରେ ବଡ଼ ଅଭିଯୋଗ, ବଳ ପୂର୍ବକ ୨ଜଣଙ୍କୁ.....

ବଲୋଚ ଅଞ୍ଚଳରୁ ପାକିସ୍ତାନ ସେନା ଦ୍ୱାରା ବଳପୂର୍ବକ ଭାବେ ୨ ଜଣ ବ୍ୟକ୍ତିଙ୍କୁ ନିଖୋଜ କରାଯାଇଥିବା ଅଭିଯୋଗ ହୋଇଛି। ସେଠାକାର ମାନବାଧିକାର ସଂଗଠନ ପକ୍ଷରୁ ମିଳିଥିବା ସୂଚନା ଅନୁଯାୟୀ, ପାକିସ୍ତାନ ସେନା ପକ୍ଷରୁ ବଲୋଚ ଅଞ୍ଚଳରୁ ଅନେକ ଲୋକଙ୍କୁ ବଳପୂର୍ବକ ନିଆଯାଇ ପରେ ସେମାନଙ୍କୁ ନିଖୋଜ ଦର୍ଶାଯାଉଥିବା ଅଭିଯୋଗ ହୋଇଛି । ବଲୋଚ ଜାତୀୟ ଆନ୍ଦୋଳନର ମାନବାଧିକାର ଶାଖା ପାଙ୍କ୍‍ ପକ୍ଷରୁ କରାଯାଇଥିବା ଅଭିଯୋଗ ମୁତାବକ କେଚ୍‍ ଜିଲ୍ଲାର ଜଣେ ବ୍ୟକ୍ତିଙ୍କୁ ଗତକାଲି ବଳପୂର୍ବକ ନିଆଯାଇଛି ।

ପ୍ରଥମେ ସଂପୃକ୍ତ ବ୍ୟକ୍ତିଙ୍କ ଘର ଉପରେ ପାକିସ୍ତାନ ସେନା ପକ୍ଷରୁ ଚଢ଼ଉ କରାଯାଇଥିଲା । ସୂଚନା ମୁତାବକ, ଏପର୍ଯ୍ୟନ୍ତ ସଂପୃକ୍ତ ବ୍ୟକ୍ତିଙ୍କ କୌଣସି ଖୋଜ୍‍ ଖବର ମିଳିପାରି ନାହିଁ । ଅନ୍ୟପକ୍ଷରେ ଚଳିତମାସ ୧୮ ତାରିଖରେ ଗଦ୍ଦାର ଜିଲ୍ଲାର ଜଣେ ବ୍ୟକ୍ତିଙ୍କୁ ପାକିସ୍ତାନ ସେନା ବଳପୂର୍ବକ ନେଇଯାଇଥିବା ଅଭିଯୋଗ ହୋଇଛି ।

ସଂପୃକ୍ତ ମାନବାଧିକାର ସଂଗଠନ ପକ୍ଷରୁ ଏଭଳି କାର୍ଯ୍ୟକଳାପ ନେଇ ଅନେକ ଥର ଅଭିଯୋଗ କରାଯାଇଥିଲେ ମଧ୍ୟ କୌଣସି ପଦକ୍ଷେପ ଗ୍ରହଣ କରାଯାଉ ନାହିଁ । ବଲୋଚ ସ୍ଥାନ ଅଞ୍ଚଳରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି କରିବା ଉଦ୍ଦେଶ୍ୟରେ ପାକିସ୍ତାନ ସେନା ପକ୍ଷରୁ ଅପହରଣ ଓ ନିଖୋଜ କରିବା କାର୍ଯ୍ୟକଳାପ ଜାରି ରହିଥିବା ମାନବାଧିକାର ସଂଗଠନ ଅଭିଯୋଗ କରିଛି ।