ସବୁ ଶନିବାର ଛୁଟି : ଡିସେମ୍ବରରୁ 75 ପ୍ରତିଶତ କର୍ମଚାରୀଙ୍କୁ ନେଇ କାମ କରିବ ଟ୍ୱିନସିଟି

ଆସନ୍ତା ଡିସେମ୍ବର ମାସରେ 75 ପ୍ରତିଶତ କର୍ମଚାରୀଙ୍କୁ ନେଇ କାର୍ଯ୍ୟାଳୟ ଚାଲିବାକୁ ନିର୍ଦ୍ଦେଶନାମା ଜାରି ହୋଇଛି ।

Updated: Sunday, November 29, 2020, 22:49 [IST]

ଭୁବନେଶ୍ୱର : ରାଜ୍ୟରେ ଦିନକୁ ଦିନ କମିବାରେ ଲାଗିଛି କରୋନା ସଂକ୍ରମଣ । ଏହି ସମୟରେ ସରକାରୀ କାର୍ଯ୍ୟାଳୟରେ କାମ ସ୍ୱାଭାବିକ କରିବାକୁ ନିର୍ଦ୍ଦେଶନାମା ଜାରି କରିଛି ସାଧାରଣ ପ୍ରଶାସନ ବିଭାଗ (GAPG)। ଆସନ୍ତା ଡିସେମ୍ବର ମାସରେ 75 ପ୍ରତିଶତ କର୍ମଚାରୀଙ୍କୁ ନେଇ କାର୍ଯ୍ୟାଳୟ ଚାଲିବାକୁ ନିର୍ଦ୍ଦେଶନାମା ଜାରି ହୋଇଛି । ଟ୍ୱିନସିଟିରେ ଥିବା ସମସ୍ତ ସରକାରୀ କାର୍ଯ୍ୟାଳୟ ଓ ଅଧସ୍ତନ କାର୍ଯ୍ୟାଳୟରେ ଏହି ନିର୍ଦ୍ଦେଶନାମା ପାଳନ କରିବାକୁ କୁହାଯାଇଛି । ଅପରପକ୍ଷରେ ଶନିବାର ଦିନ ସାରା ରାଜ୍ୟରେ ଥିବା ସମସ୍ତ ସରକାରୀ କାର୍ଯ୍ୟାଳୟ ବନ୍ଦ ରହିବ ।

ଭୁବନେଶ୍ୱର- କଟକରେ ଗ୍ରୁପ-ଏ ଅଧିକାରୀଙ୍କୁ ମିଶାଇ 75 ପ୍ରତିଶତ କର୍ମଚାରୀଙ୍କୁ ନେଇ ସରକାରୀ କାର୍ଯ୍ୟାଳୟ ଡିସେମ୍ବର ମାସରେ କାମ କରିବ । ତେବେ କେଉଁ ବିଭାଗର କେଉଁ ଅଧିକାରୀ ଓ କର୍ମଚାରୀ କାର୍ଯ୍ୟାଳୟ ଆସିବେ ତାହା ଉପରିସ୍ଥ ଅଧିକାରୀ ନିଷ୍ପତି ନେବେ ।

ତେବେ ଏହି ଟ୍ୱିନ-ସିଟିରେ ଥିବା ଜରୁରୀକାଳୀନ ସେବା ଯେମିତି ଏସଆରସି, ଓଏସଡିଏମଏ କାର୍ଯ୍ୟାଳୟ, ପୁଲିସ, ଅଗ୍ନିଶମ, ସ୍ୱାସ୍ଥ୍ୟ, ପୌର ସଂସ୍ଥା କାର୍ଯ୍ୟାଳୟ ଶଙେ ପ୍ରତିଶତ କର୍ମଚାରୀଙ୍କୁ ନେଇ ସବୁ ଦିନ କାମ କରିବ ବୋଲି ବିଭାଗ ତା ନିର୍ଦ୍ଦେଶନାମାରେ ଉଲ୍ଲେଖ କରିଛି । ସେହିପରି ଜୁନରେ ଜାରି ହୋଇଥିବା କୋଭିଡ୍ କଟକଣା ମାନି କାର୍ଯ୍ୟାଳୟ କାମ ହେବ ।

କୌଣସି କର୍ମଚାରୀଙ୍କ ଠାରେ କୋଭିଡ୍ ଚିହ୍ନଟ ହେଲେ ନିୟମ ମୁତାବକ ପଦକ୍ଷେପ ନିଆଯିବ । ଘରୁ କାମ କରୁଥିବା ଅଧିକାରୀ ଓ କର୍ମଚାରୀଙ୍କୁ ଭିପିଏନ୍ ଯୋଗାଇ ଦିଆଯିବ । ଡ୍ୟୁଟି ଦିଆଯାଇ ନଥିଲେ ଘରୁ କାମ କରୁଥିବା କର୍ମଚାରୀ ବିନା ଅନୁମତିରେ ହେଡକ୍ୱାର୍ଟର ଛାଡି ଯାଇ ପାରିବ ନାହିଁ ଏପରିକି ସେମାନଙ୍କ ମୋବାଇଲ୍ ଫୋନ୍ ସବୁ ସମୟରେ କାମ କରିବା ଆବଶ୍ୟକ ବୋଲି ବିଭାଗ ନିର୍ଦ୍ଦେଶନାମାରେ କହିଛି ।