ସ୍କୁଲ ପାଠ୍ୟକ୍ରମରେ ସ୍ଥାନ ପାଇବ 'ବନ୍ଦେ ଉତ୍କଳ ଜନନୀ'

କାନ୍ତକବି ଲକ୍ଷ୍ମୀକାନ୍ତ ମହାପାତ୍ରଙ୍କ କାଳଜୟୀ କୃତି ଏବେ ସ୍କୁଲ ପାଠ୍ୟକ୍ରମରେ ସ୍ଥାନ ପାଇବ । ନବମ ଓ ଦଶମ ଶ୍ରେଣୀରେ ପାଠ୍ୟକ୍ରମରେ ଏହାକୁ ସ୍ଥାନ ଦେବାକୁ ଆଜି ମୁଖ୍ୟମନ୍ତ୍ରୀ ଅନୁମୋଦନ କରିଛନ୍ତି ।

Published: Friday, November 13, 2020, 15:47 [IST]

ଭୁବନେଶ୍ୱର : ଓଡ଼ିଆ ଜାତୀୟତା ଭାବକୁ ସୁଦୃଢ଼ କରିବା ସହ କୋଟି କୋଟି ଓଡି଼ଆ ଜାତିର ମହାନତାକୁ ପରିଚିତ କରାଉଥିବା ସଙ୍ଗୀତ ହେଉଛି 'ବନ୍ଦେ ଉତ୍କଳ ଜନନୀ' । କାନ୍ତକବି ଲକ୍ଷ୍ମୀକାନ୍ତ ମହାପାତ୍ରଙ୍କ ଏହି କାଳଜୟୀ କୃତି ଏବେ ସ୍କୁଲ ପାଠ୍ୟକ୍ରମରେ ସ୍ଥାନ ପାଇବ । ନବମ ଓ ଦଶମ ଶ୍ରେଣୀରେ ପାଠ୍ୟକ୍ରମରେ ଏହାକୁ ସ୍ଥାନ ଦେବାକୁ ଆଜି ମୁଖ୍ୟମନ୍ତ୍ରୀ ଅନୁମୋଦନ କରିଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅନୁମୋଦନ ପରେ ଏନେଇ ସରକାରୀ ବିଜ୍ଞପ୍ତି ପ୍ରକାଶ ପାଇଛି ।

ସୂଚନାଥାଉକି, ନିକଟରେ ରାଜ୍ୟ ସରକାର 'ବନ୍ଦେ ଉତ୍କଳ ଜନନୀ' ସଙ୍ଗୀତକୁ ରାଜ୍ୟ ସଙ୍ଗୀତର ମାନ୍ୟତା ଦେଇଛନ୍ତି । କୋଭିଡ୍ ଯୋଦ୍ଧାମାନଙ୍କୁ ସମ୍ମାନ ଜଣେଇବା ପାଇଁ ସାରା ବିଶ୍ୱରେ ଗତ ମେ 30 ତାରିଖରେ ସମସ୍ତେ ଏକା ସାଙ୍ଗରେ 'ବନ୍ଦେ ଉତ୍କଳ ଜନନୀ' ଗାନ କରିଥିଲେ । ଏବେ ଏହି ସଙ୍ଗୀତରେ ଆଉ ଏକ ପାଦ ଆଗକୁ ବଢିଛନ୍ତି ରାଜ୍ୟ ସରକାର । ସ୍କୁଲ ପାଠ୍ୟକ୍ରମରେ ଏହାକୁ ସ୍ଥାନ ଦେଇଛନ୍ତି । ନବମ ଓ ଦଶମ ଶ୍ରେଣୀର ଛାତ୍ରଛାତ୍ରୀଙ୍କ ମଧ୍ୟରେ ଜାତୀୟତା ଭାବକୁ ସୁଦୃଢ କରିବା ଓ ଏ ଜାତିର ମହାନତା ବିଷୟରେ ଅବଗତ କରାଇବା ଏହି ସଙ୍ଗୀତର ମୂଳ ଉଦ୍ଦେଶ୍ୟ ବୋଲି କୁହାଯାଇଛି ।

Published On November 13, 2020