ଯୋଡ଼ାରେ ହେବ 4 କି.ମିର ଫ୍ଲାଏଓଭର : ଭିଡିଓ କନଫରେସିଂରେ ଶିଳାନ୍ୟାସ କଲେ ମୁଖ୍ୟମନ୍ତ୍ରୀ

କେନ୍ଦୁଝର ଜିଲ୍ଲା ଯୋଡ଼ା ସହରରେ ଫ୍ଲାଏଓଭର ନିର୍ମାଣ କରାଯିବ ।

Updated: Sunday, November 15, 2020, 19:42 [IST]

ଭୁବନେଶ୍ୱର : କେନ୍ଦୁଝର ଜିଲ୍ଲା ଯୋଡ଼ା ସହରରେ ଫ୍ଲାଏଓଭର ନିର୍ମାଣ କରାଯିବ । ଏଥିପାଇଁ 206 କୋଟି ଟଙ୍କା ବେୟ ଅଟକଳ ରଖାଯାଇଥିବା ବେଳେ ଏହା 4 କିଲୋମିଟର 875 ମିଟର ଦୈର୍ଘ୍ୟ ରହିବ । ଏହି ପ୍ଲାଏଓଭରକୁ ଭିଡିଓ କନଫରେସିଂ ଜରିଆରେ ଆଜି ଶିଳାନ୍ୟାସ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଯୋଡା ସହରର ଡିଏଭି ସ୍କୁଲ ନିକଟ ଜାତୀୟ ରାଜପଥ ଜଙ୍କସନରୁ ଯୋଡା-ବାମେବାରୀ ରାସ୍ତାରେ କମାରଯୋଡା ମେଡିକାଲ୍ ପର୍ଯ୍ୟନ୍ତ ଏହି ଫ୍ଲାଏଓଭର ନିର୍ମିତ ହେବ ।

ନିର୍ମାଣ ହେବାକୁ ଥିବା ଏହି ଫ୍ଲାଏ ଓଭରର ନିର୍ମାଣ ଦାଇତ୍ତ୍ୱ ଓଡିଶା ବ୍ରିଜ୍ କନଷ୍ଟ୍ରକସନ କମ୍ପାନୀ ଲିମିଟେଡ ନେଇଛି । ସର୍ଭିସ ରୋଡ୍, ଆପ୍ରୋଚ୍ ରୋଡ ସହିତ ଫ୍ଲାଏଓଭରରେ ବୈଦିତୁକ ସୁବିଧା, ଜନସ୍ବାସ୍ଥ୍ୟ ସୁବିଧା ସମେତ ଅନ୍ୟାନ ଆନୁସଙ୍ଗିକ ସୁବିଧା ଲୋକଙ୍କ ପାଇଁ ରହିବ । ଆଜି ଆୟୋଜିତ ଏହି ଉତ୍ସବରେ କେନ୍ଦୁଝର ଜିଲ୍ଲାପାଳଙ୍କ କାର୍ଯ୍ୟାଳୟରେ ଦକ୍ଷତା ବିକାଶ ଓ ବୈଷୟିକ ଶିକ୍ଷା ମନ୍ତ୍ରୀ ପ୍ରେମାନନ୍ଦ ନାୟକ, କେନ୍ଦୁଝର ସାଂସଦ ଚନ୍ଦ୍ରାଣୀ ମୁର୍ମୁ, ଘଷିପୁର ବିଧାୟକ ବଦ୍ରିନାରାୟଣ ପାତ୍ର, ଆନନ୍ଦପୁର ବିଧାୟକ ଭାଗିରଥୀ ସେଠୀ, ଚମ୍ପୁଆ ବିଧାୟିକା ମିନାକ୍ଷୀ ମହାନ୍ତ, ଜିଲ୍ଲାପାଳ ଆଶିଷ ଠାକରେ ଓ ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ଉଦ୍ଧବ ଚନ୍ଦ୍ର ମାଝି ପ୍ରମୁଖ ଉପସ୍ଥିତ ରହିଥିଲେ ।