ମାଗଣାରେ ଅନଲାଇନରେ ପଢିବେ ପିଲା : ଟିସିଏସ୍ ସହ ଚୁକ୍ତି, ନବମ ଓ ଦଶମ ପିଲାଙ୍କୁ ମାଗଣା ଶିକ୍ଷା

ଅନଲାଇନରେ ସ୍କୁଲ ଛାତ୍ରଛାତ୍ର ଏଣିକି ମାଗଣାରେ ପାଠ ପଢିବେ । ରାଜ୍ୟ ସରକାରଙ୍କ ବିଦ୍ୟାଳୟ ଓ ଗଣଶିକ୍ଷା ବିଭାଗ ଏନେଇ ଟିସିଏସ ସହ ଚୁକ୍ତି ସ୍ୱାକ୍ଷର କରିଛି ।

Published: Friday, November 13, 2020, 16:19 [IST]

ଭୁବନେଶ୍ୱର : ଅନଲାଇନରେ ସ୍କୁଲ ଛାତ୍ରଛାତ୍ର ଏଣିକି ମାଗଣାରେ ପାଠ ପଢିବେ । ରାଜ୍ଯ ସରକାରଙ୍କ ବିଦ୍ୟାଳୟ ଓ ଗଣଶିକ୍ଷା ବିଭାଗ ଏନେଇ ଟିସିଏସ ସହ ଚୁକ୍ତି ସ୍ୱାକ୍ଷର କରିଛି । ନବମ ଓ ଦଶମ ଶ୍ରେଣୀର ଛାତ୍ରଛାତ୍ରୀମାନଙ୍କୁ ମାଗଣାରେ ଟିସିଏସ ଅନଲାଇନରେ ଶିକ୍ଷା ଦେବ । ଏହା କେବଳ 214ଟି ଆଦର୍ଶ ବିଦ୍ୟାଳୟ ଓ 101 ଉତ୍କର୍ଷ ବିଦ୍ୟାଳୟରେ ଲାଗୁ କରାଯିବ । ଏସମ୍ପର୍କରେ ଗଣମାଧ୍ୟମ ଜରିଆରେ ସୂଚନା ଦେଇଛନ୍ତି ବିଦ୍ୟାଳୟ ଓ ଗଣଶିକ୍ଷା ବିଭାଗର ମନ୍ତ୍ରୀ ସମୀର ଦାଶ ।

ମନ୍ତ୍ରୀ କହିଛନ୍ତି ଟିସିଏସ୍ ଦେଶର ଏକ ଆଗ ଧାଡିର ଅନୁଷ୍ଠାନ । ରାଜ୍ୟର ନବମ ଓ ଦଶମ ଶ୍ରେଣୀର ଛାତ୍ରଛାତ୍ରୀମାନଙ୍କୁ ଅନଲାଇନ୍ ପଢାଇବା ପାଇଁ ଟିସିଏସ୍ ଯେଉଁ ଅଫର୍ ଦେଇଥିଲା ତାକୁ ସରକାର ମଞ୍ଜୁରୀ ପ୍ରଦାନ କରିଛନ୍ତି । ଫଳରେ ଆନୁଷ୍ଠାନିକ ଭାବରେ ଆଜି ଏହାକୁ ଉଦଘାଟନ କରାଯାଇଛି । ଏନେଇ ରେଜିଷ୍ଟ୍ରେସନ ମଧ୍ୟ ଶେଷ ହୋଇଛି । ଏଠାରେ କହି ରଖୁ ଯେ, କୋଭିଡ୍ ମହାମାରୀ କାରଣରୁ ଚଳିତ ବର୍ଷ ସ୍କୁଲ୍ ବନ୍ଦ ରହିଛି । ଏବର୍ଷ ସ୍କୁଲ୍ ନଖୋଲିବା ନେଇ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି । ତେବେ ପିଲାମାନଙ୍କର ଅନଲାଇନ୍ କ୍ଲାସ୍ ପୂର୍ବପରି ଜାରି ରହିବ । ରାଜ୍ୟ ସରକାରଙ୍କ ଏହି ନିଷ୍ପତ୍ତି ପରେ ଟିସିଏସ୍ ଅନଲାଇନ୍ ଶିକ୍ଷା ଦେବାକୁ ଆଗ୍ରହ ପ୍ରକାଶ କରିଥିଲା । ଯାହାକୁ ରାଜ୍ୟ ସରକାର ମଞ୍ଜୁରୀ ପ୍ରଦାନ କରିଛନ୍ତି ।

Published On November 13, 2020