ବଡ଼ ନିଷ୍ପତି ନେଲେ କେନ୍ଦ୍ର ସରକାର : ଦଶମ ବୋର୍ଡ ପରୀକ୍ଷା ବାତିଲ, ଦ୍ୱାଦଶ ଶ୍ରେଣୀ ବୋର୍ଡ ପରୀକ୍ଷା ସ୍ଥଗିତ

CBSE ଦଶମ ଶ୍ରେଣୀ ବୋର୍ଡ ପରୀକ୍ଷା ବାତିଲ ହୋଇଛି ଏବଂ ଦ୍ୱାଦଶ ଶ୍ରେଣୀ ବୋର୍ଡ ପରୀକ୍ଷା ବର୍ତ୍ତମାନ ସ୍ଥିତିକୁ ଦେଖି ସ୍ଥଗିତ ରଖାଯାଇଛି

Updated: Wednesday, April 14, 2021, 15:27 [IST]

ନୂଆଦିଲ୍ଲୀ : ସାରା ଦେଶରେ ବଢୁଥିବା କରୋନା ମହାମାରୀକୁ ଦୃଷ୍ଟିରେ ରଖି ସିବିଏସ୍ଇ ବୋର୍ଡ ପରୀକ୍ଷାକୁ ନେଇ ଏକ ବଡ ନିଷ୍ପତ୍ତି ନିଆଯାଇଛି । CBSE ଦଶମ ଶ୍ରେଣୀ ବୋର୍ଡ ପରୀକ୍ଷା ବାତିଲ ହୋଇଛି ଏବଂ ଦ୍ୱାଦଶ ଶ୍ରେଣୀ ବୋର୍ଡ ପରୀକ୍ଷା ବର୍ତ୍ତମାନ ସ୍ଥିତିକୁ ଦେଖି ସ୍ଥଗିତ ରଖାଯାଇଛି । ବୋର୍ଡ ଦ୍ୱାରା ପ୍ରସ୍ତୁତ ମାନଦଣ୍ଡ ଆଧାରରେ ଦଶମ ଫଳାଫଳ ପ୍ରକାଶ ପାଇବ । ଦ୍ୱାଦଶ ଶ୍ରେଣୀ ପରୀକ୍ଷା ପରେ ଅନୁଷ୍ଠିତ ହେବ, ବୋର୍ଡ ଜୁନ୍ 1 ରେ ପରିସ୍ଥିତିର ସମୀକ୍ଷା କରିବ । ଏହି ସୂଚନା ଶିକ୍ଷା ମନ୍ତ୍ରଣାଳୟ ପକ୍ଷରୁ ଦିଆଯାଇଛି ।
କେନ୍ଦ୍ର ଶିକ୍ଷା ମନ୍ତ୍ରୀ ରମେଶ ପୋଖରିଆଲ କହିଛନ୍ତି, "ଆଭ୍ୟନ୍ତରୀଣ ମୂଲ୍ୟାଙ୍କନ ଆଧାରରେ ଦଶମ ଶ୍ରେଣୀର ଛାତ୍ରମାନଙ୍କୁ ପରବର୍ତ୍ତୀ ଶ୍ରେଣୀକୁ ପଠାଯିବ । ଯଦି ଜଣେ ଛାତ୍ର ମୂଲ୍ୟାଙ୍କନରେ ସନ୍ତୁଷ୍ଟ ନୁହଁନ୍ତି, ତେବେ କରୋନା ପରିସ୍ଥିତି ସ୍ୱାଭାବିକ ହେଲେ ସେ ପରୀକ୍ଷା ଦେଇପାରିବେ । "

ସିବିଏସ୍ଇ ପରୀକ୍ଷା ବାତିଲ କିମ୍ବା ଘୁଞ୍ଚାଇବାକୁ ନେଇ ବଢୁଥିବା ଦାବିକୁ ଦୃଷ୍ଟିରେ ରଖି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଶିକ୍ଷା ମନ୍ତ୍ରଣାଳୟ ସହିତ ଏକ ଉଚ୍ଚ ସ୍ତରୀୟ ବୈଠକ କରିଥିଲେ । ଏହି ବୈଠକରେ ନିଷ୍ପତ୍ତି ପରେ ହିଁ ଶିକ୍ଷା ମନ୍ତ୍ରଣାଳୟ ପରୀକ୍ଷା ବାତିଲ ଏବଂ ସ୍ଥଗିତ ରଖିବାକୁ ଘୋଷଣା କରିଛି । ଏହାପୂର୍ବରୁ କରୋନା ଜୀବାଣୁ ସଂକ୍ରମଣର ବିପଦକୁ ଦୃଷ୍ଟିରେ ରଖି ପୂର୍ବତନ କଂଗ୍ରେସ ସଭାପତି ରାହୁଲ ଗାନ୍ଧୀ, ଦଳର ସାଧାରଣ ସମ୍ପାଦକ ପ୍ରିୟଙ୍କା ଗାନ୍ଧୀ ଭଦ୍ରା, ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ସମେତ ଅନେକ ନେତା ସିବିଏସଇ ପରୀକ୍ଷା ବାତିଲ କରିବାକୁ ଦାବି କରିଥିଲେ । ଏଠାରେ ସୂଚନାଥାଉକି, ବୋର୍ଡ ପରୀକ୍ଷା ମେ 4 ରୁ ଆରମ୍ଭ ହୋଇ ଜୁନ୍ 10 ପର୍ଯ୍ୟନ୍ତ ଚାଲିଥାନ୍ତା । ଏଥିସହିତ, ଦଶମ ଏବଂ ଦ୍ୱାଦଶର ବୋର୍ଡ ପରୀକ୍ଷାର ଫଳାଫଳ ଜୁଲାଇ 15 ସୁଦ୍ଧା ପ୍ରକାଶ କରାଯିବ ବୋଲି ଘୋଷଣା କରାଯାଇଥିଲା ।