ଷ୍ଟେନ୍ସ ହତ୍ୟାକାଣ୍ଡ: ୨୫ ବର୍ଷ ପରେ ଜେଲରୁ ମୁକୁଳିଲେ ଦାରା ସିଂ ସହଯୋଗୀ ମହେନ୍ଦ୍ର ହେମ୍ବ୍ରମ

1999 ମସିହା ବହୁଚର୍ଚ୍ଚିତ ଅଷ୍ଟ୍ରେଲିଆନ ମିଶନାରୀ ଗ୍ରାହାମ ଷ୍ଟେନ୍ସ ଓ ତାଙ୍କ ଦୁଇ ପୁଅଙ୍କୁ ହତ୍ୟା ଘଟଣା । ଜେଲରେ ଆଜୀବନ ସଜା କାଟୁଥିବା ଅନ୍ୟତମ ଦୋଷୀ ସାବ୍ୟସ୍ତ ମହେନ୍ଦ୍ର ହେମ୍ବ୍ରମ ଜେଲରୁ ମୁକୁଳିଛି । ଦୀର୍ଘ 25 ବର୍ଷ ପରେ କେନ୍ଦୁଝର ଜେଲରୁ ତାକୁ ମୁକ୍ତ କରାଯାଇଛି । ଜେଲରେ ଭଲ ଆଚରଣ ଆଧାରରେ ୫୦ ବର୍ଷୀୟ ମହେନ୍ଦ୍ର ହେମ୍ବ୍ରମ ଜେଲରୁ ମୁକୁଳିଛନ୍ତି ।

ଭଲ ଆଚରଣ ପାଇଁ ଜେଲକୁ ମୁକ୍ତ ହେଲେ ମହେନ୍ଦ୍ର ହେମ୍ବ୍ରମ:

କେନ୍ଦୁଝର ଜିଲ୍ଲା କାରାଗାର ଜେଲର ମନସ୍ୱିନୀ ନାୟକ କହିଛନ୍ତି, "ଷ୍ଟେଟ୍ ସେଣ୍ଟେନସ୍ ରିଭ୍ୟୁ ବୋର୍ଡର ନିଷ୍ପତ୍ତି ପରେ ହେମ୍ବ୍ରମଙ୍କୁ ଜେଲରୁ ମୁକ୍ତ କରାଯାଇଛି । ଜେଲ ନିର୍ଦ୍ଦେଶାଳୟ ମଙ୍ଗଳବାର ଏକ ଚିଠିରେ ଏହି ସୂଚନା ଦେଇଛନ୍ତି । ନିୟମ ଅନୁଯାୟୀ ସେ ଭଲ ଆଚରଣ କରିବା ହେତୁ ତାଙ୍କୁ 25 ବର୍ଷ ପରେ ମୁକ୍ତ କରାଯାଇଛି ।" ଜଣେ ଅଧିକାରୀ କହିଛନ୍ତି ଯେ, "ହେମ୍ବ୍ରମଙ୍କୁ ଏକ ବ୍ୟାଙ୍କ ପାସବୁକ ଦିଆଯାଇଛି । ଜେଲରେ କାମ କରି ଯେଉଁ ପାରିଶ୍ରମିକ ପାଇଥିଲେ ତାହା ସେଥିରେ ଜମା କରାଯାଇଥିଲା ।"

ମହେନ୍ଦ୍ର ହେମ୍ବ୍ରମ ଜେଲରୁ ବାହାରି କହିଛନ୍ତି ଯେ, "1999 ମସିହା ଜାନୁଆରୀ ୨୧-୨୨ ତାରିଖରେ ଧର୍ମ ପରିବର୍ତ୍ତନ ସହ ଜଡିତ ଏକ ମାମଲାରେ ମିଥ୍ୟା ଅଭିଯୋଗରେ ମୋତେ ଫଶାଇ ଦିଆଯାଇଥିବାରୁ, ମୁଁ ୨୫ ବର୍ଷ ଜେଲରେ ବିତାଇଥିଲି । ଆଜି ମୋତେ ମୁକ୍ତ କରାଯାଇଛି । ଧର୍ମାନ୍ତୀକରଣ ଏବଂ ଗୋହତ୍ୟାକୁ ମୁଁ ସମ୍ପୂର୍ଣ୍ଣ ବିରୋଧ କରୁଥିଲି । ବାକି ଜୀବନ ମୁଁ କେମିତି କାଟିବି ତାହା ମୁଁ ଚିନ୍ତା କରିବି । ''

କଣ ଥିଲା ଘଟଣା ?

ଅଷ୍ଟ୍ରେଲୀୟ ମିଶନାରୀ ଗ୍ରାହାମ ଷ୍ଟେନ୍ସ ଏବଂ ତାଙ୍କ ଦୁଇ ଶିଶୁ ପୁତ୍ର - ଫିଲିପ୍ (10) ଏବଂ ଟିମୋଥି(6) ଙ୍କୁ ହତ୍ୟା ଘଟଣାରେ ହେମ୍ବ୍ରମ ଏବଂ ଦାରା ସିଂ (ରବୀନ୍ଦ୍ର ପାଲ ସିଂ) ଦୋଷୀ ସାବ୍ୟସ୍ତ ହୋଇଥିଲେ । 1999 ଜାନୁୟାରୀ 21 ରାତିରେ କେନ୍ଦୁଝର ଜିଲ୍ଲାର ମନୋହରପୁର ଗାଁର ଏକ ଧର୍ମପୀଠ ସମ୍ମୁଖରେ ପାର୍କିଂ ହୋଇଥିବା ଏକ ଷ୍ଟେସନ ୱାଗନରେ ଷ୍ଟେନ୍ସ ଏବଂ ତାଙ୍କ ୨ ପୁତ୍ର ଶୋଇଥିଲେ । ଏହି ସମୟରେ ଦାରା ସିଂଙ୍କ ନେତୃତ୍ୱରେ ଉତ୍ତେଜିତ ଜନତା ଏହି ତିନି ଜଣଙ୍କୁ ନିଆଁ ଲଗାଇ ପୋଡି ଦେଇଥିଲେ । ଏହି ଘଟଣାକୁ ନେଇ ଜାତୀୟ ତଥା ଅନ୍ତର୍ଜାତୀୟ ସ୍ତରରେ ହଇଚଇ ସୃଷ୍ଟି ହୋଇଥିଲା ।

ଅଭିଯୋଗ ହୋଇଥିଲା କି, ଶୀତରୁ ରକ୍ଷା ପାଇବା ପାଇଁ ଷ୍ଟେନ୍ସ ଗାଡି ଉପରେ ଧାନ ନଡା (Straw) ବିଛାଇଥିଲେ । ସେଥିରେ ନିଆଁ ଲାଗିଯାଇଥିଲା । ଯେତେବେଳେ ସେମାନେ ବଞ୍ଚିବା ପାଇଁ ସେଠାରୁ ବାହାରିବାକୁ ଚେଷ୍ଟା କରିଥିଲେ, ଉତ୍ତେଜିତ ଜନତା ସେମାନଙ୍କୁ ବାହାରକୁ ଆସିବାକୁ ଦେଇନଥିଲେ । ଘଟଣାସ୍ଥଳରେ ୩ ଜଣଙ୍କର ମୃତ୍ୟୁ ହୋଇଥିଲା ।