ଆସିଲା ଶ୍ୱେତାଙ୍କ ପୋଷ୍ଟମର୍ଟମ ରିପୋର୍ଟ, ପୋଲିସ ହେପାଜତରେ ସୌମ୍ୟଜିତ୍ !

Sweta Suicide Case Update: ଆସିଲା ଶ୍ୱେତାଙ୍କ ପୋଷ୍ଟମର୍ଟମ ରିପୋର୍ଟ, ପୋଲିସ ହେପାଜତରେ ସୌମ୍ୟଜିତ୍

Updated: Wednesday, August 24, 2022, 17:31 [IST]

ଭୁବନେଶ୍ୱର: ରାଜଧାନୀରେ ସଫ୍ଟଓୟାର ଇଞ୍ଜିନିୟର ଶ୍ୱେତା ଉତ୍କଳ କୁମାରୀ ଆତ୍ମହତ୍ୟା ଘଟଣା । ଆସିଲା ଶ୍ବେତାଙ୍କ ଶବ ବ୍ୟବଚ୍ଛେଦ ରିପୋର୍ଟ । ଶ୍ବାସରୁଦ୍ଧ ଯୋଗୁଁ ମୃତ୍ୟୁ ହୋଇଥିବା ରିପୋର୍ଟରେ ଉଲ୍ଲେଖ ରହିଛି । ବେକ ବ୍ୟତିତ୍ୱ ଶରୀରର ଅନ୍ୟ କୌଣସି ସ୍ଥାନରେ କ୍ଷତଚିହ୍ନ ନଥିବା ରିପୋର୍ଟ । ରିପୋର୍ଟ ଆଧାରଣରେ ତଦନ୍ତ ହେବ ପୋଲିସ ପକ୍ଷରୁ କୁହାଯାଇଛି । ଚନ୍ଦ୍ରଶେଖରପୁର ଥାନାରେ ରିପୋର୍ଟ ପହଞ୍ଚିବା ପରେ ରିପୋର୍ଟ ଆଧାରରେ ତଦନ୍ତ ପ୍ରକ୍ରିୟା ଆଗକୁ ବଢିବ ।

ସେପଟେ ଚନ୍ଦ୍ରଶେଖରପୁର ଥାନାରେ ଶ୍ୱେତାଙ୍କ ପୁରୁଷ ବନ୍ଧୁ ଆତ୍ମସମର୍ପଣ କରିଥିବା ନେଇ ସୂଚନା ରହିଛି । ବର୍ତ୍ତମାନ ସୂଚନା ଅନୁସାରେ ପୋଲିସ ହେପାଜତରେ ଅଛନ୍ତି ସୌମ୍ୟଜିତ୍ । ଚନ୍ଦ୍ରଶେଖରପୁର ଥାନା ପୋଲିସ ହେପାଜତକୁ ନେଇଥିବା ସୂଚନା ରହିଛି । ସେହିପରି ଘଟଣାର ପ୍ରଥମ ଦିନ ମଧ୍ୟ ସୌମ୍ୟଜିତ୍ ଥାନାକୁ ଆସିଥିଲେ ଓ ତାଙ୍କୁ ପଚରାଉଚରା ହୋଇଥିଲା । ଅଭିଯୋଗର ଅନୁସାରେ ସବୁ ଦିଗରୁ ତଦନ୍ତ କରାଯାଉଛି ବୋଲି କହିଛନ୍ତି ଡିସିପି ।

ତେବେ ଶ୍ୱେତାଙ୍କ ପରିବାର ପକ୍ଷରୁ ସୌମ୍ୟଜିତଙ୍କ ବିରୁଧରେ ଅଭିଯୋଗ କରାଯାଇଥିଲା । ଝିଅର ମୃତ୍ୟୁ ପଛରେ ସୌମ୍ୟଜିତଙ୍କ ହାତ ରହିଛି ସେ ତାଙ୍କୁ ଆତ୍ମହତ୍ୟା କରିବାକୁ ବାଧ୍ୟ କରିଛନ୍ତି ତେଣୁ ତାଙ୍କୁ ଗିରଫ କରାଯାଉ ବୋଲି ଶ୍ୱେତାଙ୍କ ପରିବାର ପକ୍ଷରୁ ଦାବି କରାଯାଇଥିଲା । ଅନ୍ୟପଟେ ସୋସିଆଲ ମିଡିଆରେ ଶ୍ୱେତା-ସୌମ୍ୟଜିତଙ୍କ ଅଡିଓ ଭାଇରାଲ ହେବାରେ ଲାଗିଛି ।