ଅମାନିଆଙ୍କୁ ଲଗାମ ପାଇଁ ଅଣ୍ଟା ଭିଡିଲା ପୁଲିସ : କିଏ ଯିବ ଅଫିସ୍ ତାଲିକା ମାଗିଲେ ସିପି

ବେସରକାରୀ କାର୍ଯ୍ୟାଳୟକୁ କେତେ ଜଣ କର୍ମଚାରୀ ଆସିବେ ସେମାନଙ୍କ ତାଲିକା ଦେବାକୁ ପୁଲିସ କମିଶନର ସୌମ୍ୟନ୍ଦ୍ର ପ୍ରିୟଦର୍ଶୀ ନିର୍ଦ୍ଦେଶ ଦେଇଛନ୍ତି

Updated: Saturday, May 8, 2021, 15:17 [IST]

ଭୁବନେଶ୍ୱର : ରାଜ୍ୟରେ କରୋନା ମହାମାରିକୁ ନେଇ 14 ଦିନିଆ ଲକଡାଉନ୍ ଓ ସପ୍ତାହାନ୍ତ ସଟଡାଉନ୍ ଘୋଷଣା କରାଯାଇଛି । ଏପରିସ୍ଥଳରେ ଜୀବିକା ଯେପରି ପ୍ରଭାବିତ ନହୁଏ ସେଥିପାଇଁ ରାଜ୍ୟ ସରକାର ମଧ୍ୟ ଧ୍ୟାନ ଦେଇଛନ୍ତି । ଚଳିତ ବର୍ଷ ଲକଡାଉନରେ କୌଣସି ପାସର ବ୍ୟବସ୍ଥା କରାଯାଇ ନାହିଁ । କେବଳ ପରିଚୟପତ୍ର ଦେଖାଇ ଲୋକେ ସେମାନଙ୍କ କାର୍ଯ୍ୟାଳୟ ଯାଇ ପାରିବେ ବୋଲି କୁହାଯାଇଛି । ଯାହାର ଫାଇଦା କିଛି ଅମାନିଆ ନେଉଥିବା ଦେଖାଯାଇଛି । ଏହି ଅମାନିଆଙ୍କୁ ସାବାଡ୍ କରିବା ପାଇଁ କମିଶନରେଟ୍ ପୁଲିସ ଅଣ୍ଟା ଭିଡିଛି ।

ବେସରକାରୀ କାର୍ଯ୍ୟାଳୟକୁ କେତେ ଜଣ କର୍ମଚାରୀ ଆସିବେ ସେମାନଙ୍କ ତାଲିକା ଦେବାକୁ ପୁଲିସ କମିଶନର ସୌମ୍ୟନ୍ଦ୍ର ପ୍ରିୟଦର୍ଶୀ ନିର୍ଦ୍ଦେଶ ଦେଇଛନ୍ତି । ଯେଉଁମାନେ କେବଳ ଅଫିସ ଆସିବେ ସେହି ମାନଙ୍କ ତାଲିକା ଡିସିପିଙ୍କୁ ଦେବାକୁ କହିଛନ୍ତି ପୋଲିସ କମିଶନର । ଏହାସହ ସଂସ୍ଥାର ଅଧିକାରୀଙ୍କ ପକ୍ଷରୁ କର୍ମଚାରୀଙ୍କୁ ଏକ ଅଥରାଇଜେସନ ଲେଟର ଦେବେ । ପରିଚୟପତ୍ର ଓ ଏହି ଲେଟର ଦେଖାଇ ଅଫିସ ଯାଇପାରିବେ କର୍ମଚାରୀ । ଅପରପକ୍ଷରେ ଚିକିତ୍ସା ପାଇଁ ଓ ଟିକା ନେବା ପାଇଁ ଯାଉଥିବା ରୋଗୀଙ୍କୁ ପୁଲିସ ଚେକ୍ ପୋଷ୍ଟରେ ଅଟକାଇବ ନାହିଁ । ଯଦି ସେମାନଙ୍କୁ ଏସମ୍ପର୍କିତ ସଠିକ୍ କାଗଜପତ୍ର ପୁଲିସକୁ ଦେଖାଇବେ ସେମାନଙ୍କୁ ଛାଡି ଦିଆଯାଉଛି ଏବଂ ଆଗକୁ ଛାଡି ଦିଆଯିବ ବୋଲି ସେ କହିଛନ୍ତି ।