ନବ ଦାସଙ୍କ ହତ୍ୟା ମାମଲା:ଅଭିଯୁକ୍ତ ଗୋପାଳକୁ ଭେଟିଲେ ପରିବାରଲୋକେ

ଅଭିଯୁକ୍ତ ଗୋପାଳକୁ ଗିରଫ ପରେ ପ୍ରଥମ ଥର ଭେଟିଲେ ପରିବାର ଲୋକେ । ୮ଦିନ ହେଲା ଗୋପାଳକୁ ଚୌଦ୍ୱାର ଜେଲରେ ରଖାଯାଇଛି ।

Updated: Wednesday, February 22, 2023, 22:59 [IST]

ଚୌଦ୍ୱାର: ପୂର୍ବତନ ସ୍ୱାସ୍ଥ୍ୟ ମନ୍ତ୍ରୀ ନବ କିଶୋର ଦାସଙ୍କ ହତ୍ୟା ମାମଲା । ଅଭିଯୁକ୍ତ ଗୋପାଳକୁ ଗିରଫ ପରେ ପ୍ରଥମ ଥର ଭେଟିଲେ ପରିବାର ଲୋକେ । ୮ଦିନ ହେଲା ଗୋପାଳକୁ ଚୌଦ୍ୱାର ଜେଲରେ ରଖାଯାଇଛି ।

ସୂଚନା ଅନୁସାରେ, ଆଜି ଅର୍ଥାତ୍ ଫେବ୍ରୁଆରୀ ୨୨ ତାରିଖରେ ଗୋପାଳକୁ ଭେଟିବା ପାଇଁ ଜେଲକୁ ତାର ଭାଇ ସତ୍ୟନାରାୟଣ ଦାସ ଆସିଥିଲେ । ପୋଲିସ ଉପସ୍ଥିତିରେ ଗୋପାଲ ନିଜ ଭାଇଙ୍କ ସହ ଦେଖା କରିଛି । ଭାଇଙ୍କୁ ଦେଖି ବେଶ ଭାବୁକ ହୋଇପଡିଥିଲା ଅଭିଯୁକ୍ତ ଗୋପାଳ ଦାସ । ତେବେ ଜେଲରେ ପରିବାର ଲୋକେ ଦେଖା କରିପାରିବେ ସେଥିରେ କୌଣସି ଅଙ୍କୁଶ ଲଗାଯାଇ ନାହିଁ ।

ଅନ୍ୟପକ୍ଷରେ, ଜେଲରେ ସ୍ୱାଭାବିକ ରହିଛି ଗୋପଳର ଜୀବନଯାପନ । ସକାଳ ବ୍ୟାୟାମ କରିବା ସହ ଖବର କାଗଜ ଏବଂ ଜେଲ୍ ଲାଇବ୍ରେରିରୁ ବହି ଆଣି ଘଣ୍ଟା ଘଣ୍ଟା ପଢୁଛି ଗୋପାଳ । ତେବେ ଗୀତା, ଭାଗବତ ପରି ବହି ମଧ୍ୟ ନିଜ ପାଖରେ ରଖି ପଢୁଛି ଗୋପଳ ।

ସୂଚନାଥାଉ ଯେ, ଗତ ଜାନୁଆରୀ ୨୯ ତାରିଖ ସ୍ପଷ୍ଟ ଦିବାଲୋକରେ ଗୋପାଳ ଦାସ ଝାରସୁଗୁଡ଼ା ଗାନ୍ଧୀ ଛକ ନିକଟରେ ନବ ଦାସଙ୍କୁ ଗୁଳି କରିଥିଲା । ଏହା ପରେ ନବ ଦାସଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଥିଲା । କିନ୍ତୁ ପରେ ତାଙ୍କର ଦେହାନ୍ତ ହୋଇଥିଲା । ଏହି ଘଟଣାରେ ଅଭିଯୁକ୍ତ ବହିଷ୍କୃତ ଏଏଏସ୍‌ଆଇ ଗୋପାଳ କୁ ପୋଲିସ ଗିରଫ କରି ଜାଞ୍ଚ୍ ଜାରି ରଖିଛି । ତଦନ୍ତ ଭାର ନେଇଛି କ୍ରାଇମବ୍ରାଞ୍ଚ । ତିନି ଥର ରିମାଣ୍ଡରେ ନେବା ସହ ଗୋପାଳର ପଲିଗ୍ରାଫ୍ ଟେଷ୍ଟ, ନାର୍କୋ ଟେଷ୍ଟ କରିବା ପରେ ମଧ୍ୟ ଗୋପାଳ କାହିଁକି ଏଭଳି କାଣ୍ଡ ଭିଆଇଲା ସେ ନେଇ କୌଣସି ସ୍ପଷ୍ଟ ହୋଇପାରିନାହିଁ । ଏବେ ଗୋପାଳକୁ ଚୌଦ୍ୱାର ଜେଲରେ ରଖାଯାଇଛି ।