ଅର୍ଚ୍ଚନା ନାଗ ମାମଲାରେ ଆସିଲା ଡିଜିଟାଲ ଫରେନସିକ୍ ରିପୋର୍ଟ, ଖୋଲିବ କି ଗୁମର ?

ବହୁ ଚର୍ଚ୍ଚିତ ଲେଡି ବ୍ଲାକମେଲର ଅର୍ଚ୍ଚନା ନାଗ ମାମଲାରେ ଆସିଲା ଡିଜିଟାଲ ଫରେନସିକ୍ ରିପୋର୍ଟ । ଅର୍ଚ୍ଚନା କରୁଥିବା ମୋବାଇଲ, ଲାପଟପ୍, ପେନଡ୍ରାଇଭ ଗୁଡିକର ଫରେନସିକ ତଥ୍ୟ ପହଞ୍ଚିଛି ।

ଭୁବନେଶ୍ୱର: ବହୁ ଚର୍ଚ୍ଚିତ ଲେଡି ବ୍ଲାକମେଲର ଅର୍ଚ୍ଚନା ନାଗ ମାମଲାରେ ଆସିଲା ଡିଜିଟାଲ ଫରେନସିକ୍ ରିପୋର୍ଟ । ଅର୍ଚ୍ଚନା କରୁଥିବା ମୋବାଇଲ, ଲାପଟପ୍, ପେନଡ୍ରାଇଭ ଗୁଡିକର ଫରେନସିକ ତଥ୍ୟ ପହଞ୍ଚିଛି । ଏସଏଫଏସଏଲ ନିକଟକୁ ତଥ୍ୟ ପାଇଁ ପଠାଇଥିଲା କମିସନରେଟ୍ ପୋଲିସ । ଏସଏଫଏସଏଲ ସେହି ତଥ୍ୟର ଦୁଇଟି କପିକୁ ପୋଲିସ ଏବଂ କୋର୍ଟକୁ ହସ୍ତାନ୍ତର କରାଯାଇଛି । ଏହି ତଥ୍ୟ ଏକ ବଡ଼ ପ୍ରମାଣ ଭାବରେ ଚର୍ଚ୍ଚିତ ବ୍ୟକ୍ତିତ୍ୱଙ୍କ ପାଇଁ ନାଗଫାସ ପରି ହେବ ବୋଲି ଚର୍ଚ୍ଚା ହେଉଛି ।

ପ୍ରଥମ ପର୍ଯ୍ୟାୟରେ ୧୨ଟି ସାମ୍ପଲ ରିପୋର୍ଟ ଦିଆଯାଇଥିବା ଜଣାପଡିଛି । ଏହା ମଧ୍ୟରେ ରହିଛି ଅର୍ଚ୍ଚନାର ମୋବାଇଲ, ଲାପଟପ୍, ପେନଡ୍ରାଇଭ ଓ ଟାବ୍ । ପଚରାଉଚରା ବେଳେ ଅର୍ଚ୍ଚନା ସହଯୋଗ କରୁ ନଥିବାରୁ ଡିଜିଟାଲ ଏଭିଡେନ୍ସ ତଥ୍ୟ ମାଗିଥିଲା ଏନ୍‌ଫୋର୍ସମେଣ୍ଟ ଡିରେୋକ୍ଟରେଟ୍ । ଟଙ୍କା ନେଣ ଦେଣଠାରୁ ଆରମ୍ଭ କରି ବ୍ଲୁ ଫିଲ୍ମ ପର୍ଯ୍ୟନ୍ତ ସମସ୍ତ ଘଟଣାର ମହାଖୁଲାସା ଖୁବଶୀଘ୍ର ହେବ ବୋଲି ଅନୁମାନ କରାଯାଉଛି । ଡିଲିଟ୍ ହୋଇଥିବା ଡାଟା ଗୁଡିକୁ ରିକଭର କରି ଏସଏଫଏଲ ଅନେକ ଗୁରୁତ୍ୱପୂର୍ଣ୍ଣ ତଥ୍ୟ ହାସଲ କରିଛି । ସମସ୍ତ ତଥ୍ୟକୁ ଏକ ହାର୍ଡଡିସ୍କ ମାଧ୍ୟମରେ ରଖାଯାଇଛି ।

ତେବେ ଖଣ୍ଡଗିରି ଥାନା ଅଧିକାରୀ କହିଛନ୍ତି, ଏଣିକି ରିପୋର୍ଟ ଆଧାରରେ ଆଗକୁ ବଢିବ ତଦନ୍ତ । ଆବଶ୍ୟକ ପଡ଼ିଲେ ଅର୍ଚ୍ଚନାକୁ ରିମାଣ୍ଡରେ ଅଣାଯିବ । ଲ୍ୟାବ ରିପୋର୍ଟର ଗୋଟିଏ କପି କୋର୍ଟଙ୍କୁ ବି ଦିଆଯାଇଛି ।

ସୂଚନାଯୋଗ୍ୟ, ପ୍ରବର୍ତ୍ତନ ନିର୍ଦ୍ଦେଶାଳୟ ଦ୍ୱାରା ଅର୍ଚ୍ଚନାଙ୍କ କଳା ସାମ୍ରାଜ୍ୟ ଘଟଣା ଉପରୁ ପରଦା ଉଠାଇବାକୁ ଚେଷ୍ଟା କରାଯାଉଛି । ଅର୍ଚ୍ଚନାଙ୍କୁ ଦୁଇଥର ରିମାଣ୍ଡରେ ନେଇ ଅନେକ ପଚରାଉଚରା କରିଥିଲା ଇଡି । ତେବେ ୧୩ ଦିନର ରିମାଣ୍ଡରେ ଅର୍ଚ୍ଚନାକୁ ଦୁଇ ଦୁଇ ଥର ଜେରା ଭିତରେ ଇଡି ଫରେନସିକ୍ ରିପୋର୍ଟକୁ ଚାତକ ପରି ଅପେକ୍ଷା କରିଥିଲା । ଏପରିକି ଜାଣିଶୁଣି ବିଳମ୍ବ କରାଯାଉଥିବା ନେଇ କୋର୍ଟଙ୍କୁ ଜଣାଇଥିଲା ଇଡି । ତଥାପି ରିପୋର୍ଟ ଆସିବାରେ ବିଳମ୍ବ ହୋଇଥିଲା । ଅନ୍ୟପଟେ ବର୍ତ୍ତମାନ ଅର୍ଚ୍ଚନା ଏବଂ ତାଙ୍କର ସ୍ୱାମୀ ଜଗବନ୍ଧୁ ଦୁହେଁ ଝାରପଡା ଜେଲରେ ଦିନ କାଟୁଛନ୍ତି ।

English summary

Digital Forensic Report Came in Archana Nag Case