ବରଗଡ଼ରେ ବୀଭତ୍ସ ହତ୍ୟା ! ବନ୍ଦ ଘରେ ରକ୍ତାକ୍ତ ଅବସ୍ଥାରେ ପଡି ରହିଛି ୩ ମୃତଦେହ

Published: Tuesday, April 18, 2023, 17:43 [IST]

ବରଗଡ଼: ବରଗଡ଼ରେ ବୀଭତ୍ସ ହତ୍ୟାକାଣ୍ଡ । ବନ୍ଦ ଘରେ ରକ୍ତାକ୍ତ ଅବସ୍ଥାରେ ପଡି ରହିଛି ୩ ମୃତଦେହ । ବରଗଡ଼ ଭେଡେନ ଥାନା ଆଖିଫୁଟା ଗାଁରେ ଏଭଳି ଏକ ଲୋମଟାଙ୍କୁରା ଘଟଣା ଘଟିଛି ।

ଏକ ଘର ଭିତରେ ସ୍ୱାମୀ ଓ ତାଙ୍କର ୨ ସ୍ତ୍ରୀଙ୍କ କ୍ଷତାକ୍ତ ମୃତଦେହ ପଡ଼ିଥିବା ଦେଖିବାକୁ ମିଳିଛି । ମୃତକଙ୍କ ମୁଣ୍ଡରେ ଗଭୀର କ୍ଷତ ଚିହ୍ନ ରହିଥିବା ସୂଚନା ରହିଛି । ପାରିପାର୍ଶ୍ୱିକ ସ୍ଥିତିକୁ ଦେଖିଲେ ହତ୍ୟା ସନ୍ଦେହ କରାଯାଉଛି । ତେବେ କିଏ ଏଭଳି କାଣ୍ଡ ଘଟାଇଛି ସେସମ୍ପର୍କରେ କୌଣସି ଖବର ନାହିଁ ।

ମୃତକ ହେଲେ ସେହି ଗାଁର ଟଙ୍କଧର ସାହୁ ଓ ତାଙ୍କର ଦୁଇ ସ୍ତ୍ରୀ ଦ୍ରୌପଦୀ ଓ ମାଧବୀ ସାହୁ । ଘଟଣା ସ୍ଥଳରେ ପହଞ୍ଚି ପୋଲିସ ତଦନ୍ତ ଆରମ୍ଭ କରିଛି । ହେଲେ ମୃତ୍ୟୁର କାରଣ ଏବେ ବି ଅସ୍ପଷ୍ଟ ରହିଛି । ଯଦି ଏହା ହତ୍ୟା ତେବେ କିଏ କାହିଁକି ହତ୍ୟା କଲା ସେନେଇ ପୋଲିସ ଛାନବିନ ଆରମ୍ଭ କରିଛି ।

ମିଳିଥିବା ସୂଚନା ଅନୁସାରେ, ଟଙ୍କଧର ପ୍ରଥମ ବିବାହ କରିବା ପରେ କୌଣସି ସନ୍ତାନ ସନ୍ତତି ନହେବାରୁ ସେ ଦ୍ୱିତୀୟ ବିବାହ କରିଥିଲେ । ବିବାହ ପରେ ସ୍ୱାମୀ ଓ ଦୁଇ ସ୍ତ୍ରୀ ମିଳିମିଶି ଗୋଟିଏ ଛାତ ତଳେ ରହୁଥିଲେ । ତେଣୁ ପାରିବାରିକ କଳହ ଯୋଗୁଁ ଏପରି ହୋଇ ନଥିବା କୁହାଯାଉଛି । ପଡ଼ିଶା ଘର ଲୋକେ ମୃତଦେହ ଦେଖି ପୋଲିସକୁ ଖବର ଦେଇଥିଲେ । ତେବେ ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି ।

Published On April 18, 2023