ଆର୍ୟାନ୍ ଖାନଙ୍କୁ ବେଲ ମିଳିଲା, ହେଲେ ଆଜି ରାତି କଟାଇବାକୁ ହେବ ଜେଲରେ

By Staff

Published: Thursday, October 28, 2021, 20:24 [IST]

ମୁମ୍ବାଇ: ଆର୍ୟାନ୍ ଖାନଙ୍କୁ ବେଲ ମିଳିଲା, ହେଲେ ଆଜି ରାତି କଟାଇବାକୁ ହେବ ଜେଲରେ। ଆର୍ୟାନଙ୍କ ସମେତ ଅରବାଜ ମାର୍ଚ୍ଚାଣ୍ଟ, ଓ ମୁନମୁନ ଧମେଚାଙ୍କୁ ବି ବମ୍ବେ ହାଇକୋର୍ଟ ଜାମିନ ଦେଇଛନ୍ତି । ଜାମିନ ମିଳିଥିଲେ ବି ଏମାନଙ୍କୁ ଆଜି ରାତି ଜେଲରେ କାଟିବାକୁ ପଡ଼ିବ । କାରଣ ଜମାନତ ସମ୍ବନ୍ଧିତ କପି ଜେଲ କତ୍ତୃପକ୍ଷଙ୍କୁ ହସ୍ତାନ୍ତର ହୋଇନାହିଁ। ଶୁକ୍ରମାର କିମ୍ବା ଶନିବାର ଏମାନେ ଜେଲରୁ ମୁକୁଳି ପାରନ୍ତି । ଶୁକ୍ରବାରକୁ କୋର୍ଟଙ୍କ ଅର୍ଡର କପି ଜେଲ୍ ପ୍ରଶାସନକୁ ହସ୍ତାନ୍ତର କରାଯିବ । ଜେଲରେ ଅର୍ଡର କପି ପହଞ୍ଚିବା ପରେ ଏମାନଙ୍କ ବାହାରିବା ପ୍ରକ୍ରିୟା ଆରମ୍ଭ କରାଯିବ ।

ରେଭ ପାର୍ଟିରେ ଡ୍ରଗ୍ସ ସେବନ କରିଥିବା ଅଭିଯୋଗ ନେଇ ଗିରଫ ହୋଇଥିବା ଏହି ହାଇ ପ୍ରୋଫାଇଲ ଅଭିଯୁକ୍ତଙ୍କ ଜାମିନ ଆବେଦନ ଶୁଣାଣୀ ଗତ ୩ ଦିନ ଧରି ଚାଲିଥିଲା । ଦୁଇ ପକ୍ଷଙ୍କୁ ଶୁଣିବା ପରେ କୋର୍ଟ ୩ ଜଣଙ୍କୁ ଜାମିନ ଦେଇଛନ୍ତି । ପୂର୍ବ ଅଟର୍ଣ୍ଣି ଜେନେରାଲ ମୁକୁଲ ରୋହତଗୀ ଆର୍ଯ୍ୟନଙ୍କ ପକ୍ଷରୁ ଲଢୁଥିବା ବେଳେ ଅରବଜଙ୍କ ପାଇଁ ଅମିତ ଦେସାଇ ଏବଂ ମୁନମୁନଙ୍କ ପାଇଁ କାଶିଫ ଖାନ୍ ବରିଷ୍ଠ ଯୁକ୍ତି ବାଢ଼ିଥିଲେ । କୋର୍ଟରେ ଏନସିବି ପକ୍ଷରୁ ଏଏସଜି ଅନୀଲ ସିଂହ ଆର୍ଯ୍ୟନଙ୍କ ଜାମିନକୁ ଜୋରଦାର ବିରୋଧ କରିଥିଲେ । ହେଲେ ମୁକୁଲ ରୋହିତଗୀ ବଳିଷ୍ଠ ଯୁକ୍ତି ରଖି ତାଙ୍କର ସବୁ ଯୁକ୍ତିକୁ କାଟିଥିଲେ ।

ଆଜି ଶୁଣାଣି ଆରମ୍ଭ ହେବା ପରେ ଏଏସଜି ଅନୀଲ ସିଂହ ଜାମିନକୁ ବିରୋଧ କରି କୋର୍ଟକୁ କହିଥିଲେ, ଆର୍ଯ୍ୟନ ଡ୍ରଗ୍ସ ଯୋଗାଡ଼ କରୁଥିଲେ । ସେ କିଛି ବର୍ଷ ହେବ ଡ୍ରଗ୍ସ ନେଉଛନ୍ତି, ଏହାର ପ୍ରମାଣ ମଧ୍ୟ ଅଛି । ଏହାସହ ଏନସିବି ଏ ଅଭିଯୋଗ ବି ଆଣିଥିଲା ଯେ, ସେ କିଛି ଯୋଜନାରେ ସାମିଲ ଅଛନ୍ତି ଓ ଅନ୍ତର୍ଜାତୀୟ ଡ୍ରଗ୍ସ ଚାଲାଣରେ ବି ସମ୍ପୃକ୍ତ ଅଛନ୍ତି ।

ଏନସିବିର ତର୍କକୁ ମୁକୁଲ ଜୋରଦାର ବିରୋଧ କରିଥିଲେ । ସେ କହିଥିଲେ ଜାହାଜରେ ୧୩ ଶହ ଲୋକ ଥିଲେ । ସେମାନଙ୍କ ମଧ୍ୟରୁ ଆର୍ଯ୍ୟନ ଓ ଅରବାଜଙ୍କ ମଧ୍ୟରେ ସମ୍ପର୍କ ଥିଲା । ସେଠାରେ କୌଣସି ଯୋଜନା କରାଯାଉ ନଥିଲା, କାରଣ ବାକି ଲୋକଙ୍କୁ ସେମାନେ ଚିହ୍ନି ନଥିଲେ । ଏମିତି ସ୍ଥିତିରେ କୌଣସି ଯୋଜନାର ପ୍ରଶ୍ନ ହିଁ ଉଠୁନି । ସେ ଆହୁରି କହିଥିଲେ, ଏହା କହି ହେବନି ଯେ ସେମାନେ ଆଉ କାହା ସହ ମିଶିଥିଲେ କି ନାହିଁ । ହେଲେ ପାରିପାର୍ଶ୍ବିକ ସ୍ଥିତିକୁ ବି ଅଣଦେଖା କରିହେବନି । ପରିଶେଷରେ ଅଭିଯୁକ୍ତ ମାନଙ୍କୁ କୋର୍ଟ ସର୍ତ୍ତମୂଳକ ଜାମିନ ପ୍ରଦାନ କରିଥିଲେ।

Published On October 28, 2021