ଅର୍ଚ୍ଚନା ହନିଟ୍ରାପ୍ ମାମଲା: ଆଜି ଚାର୍ଜସିଟ୍ ଦାଖଲ କରିବ ପୋଲିସ

ଆଜି ଅର୍ଚ୍ଚନା ନାଗ ଏବଂ ଜଗବନ୍ଧୁ ଚାନ୍ଦଙ୍କ ବିରୋଧରେ ଜେଏମଏଫସି କୋର୍ଟରେ ୨୪ ଶହ ପୃଷ୍ଠାର ଚାର୍ଜସିଟ୍ ଦାଖଲ କରିବ ଖଣ୍ତଗିରି ପୋଲିସ ।

Updated: Thursday, February 2, 2023, 15:01 [IST]

ଭୁବନେଶ୍ୱର:ବହୁଚର୍ଚ୍ଚିତ ଅର୍ଚ୍ଚନା ନାଗ ହନିଟ୍ରାପ୍ ମାମଲା । ଆଜି ଅର୍ଚ୍ଚନା ନାଗ ଏବଂ ଜଗବନ୍ଧୁ ଚାନ୍ଦଙ୍କ ବିରୋଧରେ ଜେଏମଏଫସି କୋର୍ଟରେ ୨୪ ଶହ ପୃଷ୍ଠାର ଚାର୍ଜସିଟ୍ ଦାଖଲ କରିବ ଖଣ୍ତଗିରି ପୋଲିସ ।

୧ କୋଟିରୁ ଅଧିକ ଟଙ୍କାର ଟ୍ରାଞ୍ଜାକ୍ସନ୍ ହୋଇଥିବା ନେଇ ଚାର୍ଜସିଟରେ ଉଲ୍ଲେଖ ହୋଇଛି । ସେହିପରି CDR ଆନାଲିସିସ୍, ବ୍ୟାଙ୍କ ଟ୍ରାଞ୍ଜାକ୍ସନ୍, ହ୍ୱାଟ୍ସ ଆପ୍ ଚାଟ୍, ଫରେନସିକ୍ ରିପୋର୍ଟ ଥିବା ନେଇ ସୂଚନା ରହିଛି । ସେହିପରି ଚାର୍ଜସିଟରେ ଉଲ୍ଲେଖିତ ତଥ୍ୟ ଅନୁସାରେ, ପୋଲିସ ୩୪୧, ୩୨୮, ୩୨୪, ୩୫୪ସି, ୩୭୦, ୩୮୬, ୩୮୭, ୪୨୦, ୩୮୯, ୬୬ଇ ଏବଂ ୬୭ ଦଫା ଲଗାଯାଇଛି ।

ସୂଚନାଥାଉ ଯେ,ପୂର୍ବରୁ ନୟାପଲ୍ଲୀ ଥାନା ପୋଲିସ ମଧ୍ୟ ଚାର୍ଜସିଟ ଦାଖଲ କରିସାରିଛି । ସେହିପରି ସୋମବାର ଦିନ ଇଡି ମଧ୍ୟ ୨୨୪୧ ପୂଷ୍ଠାର ସମ୍ବଳିତ ପ୍ରଥମ ପର୍ଯ୍ୟାୟ ଚାର୍ଜସିଟ୍ ଦାଖଲ କରିଛି । ଇଡି ଦାଖଲ କରିଥିବା ଚାର୍ଜସିଟରେ ୪ ଜଣ ଯଥା ଅର୍ଚ୍ଚନା ନାଗ, ଜଗବନ୍ଧୁ ଚାନ୍ଦ, ଖେଗେଶ୍ୱର ପାତ୍ର ଓ ଶ୍ରଦ୍ଧାଞ୍ଜଳି ବେହେରାଙ୍କ ନାମ ରହିଛି । ଇଡି ୧୫ ଜଣ ସାକ୍ଷୀଙ୍କ ବୟାନ ଆଧାରରେ ଏହି ଚର୍ଜସିଟ୍ ପ୍ରସ୍ତୁତ କରାଯାଇ ଥିବା ନେଇ ସୂଚନା ରହିଛି । ସେହିପରି ନୟାଗଡ଼ର ଜଣେ ବ୍ୟବସାୟୀ ତଥା ରାଜନେତାଙ୍କୁ ଧମକାଇବା ସହ ଟଙ୍କା ହଡପ କରିଥିବା ନେଇ ଇଡି ଦାଖଲ କରିଥିବା ଚାର୍ଜସିଟରେ ଲେଖା ଯାଇଛି । ଅନ୍ୟପଟେ ଇଡି ଆଶଙ୍କା କରୁଛି ଯେ, ଅର୍ଚ୍ଚନାର ଟଙ୍କା କାରବାର ଚେର ବିଦେଶକୁ ମଧ୍ୟ ଲମ୍ବି ଥାଇପାରେ। ତେଣୁ ଅଧିକ ତଦନ୍ତ ପାଇଁ କୋର୍ଟଙ୍କ ଅନୁମତି ମାଗିଛି । ଜବତ ହୋଇଥିବା ଅଭିଯୁକ୍ତଙ୍କ ସଂପତ୍ତିକୁ ବ୍ୟାଜ୍ୟାପ୍ତି କରିବାକୁ ମଧ୍ୟ ଇଡି କୋର୍ଟଙ୍କ ଅନୁମତି ମାଗିଛି ।