ଭାରତ ଅର୍ଥନୀତିରେ ଅଭିବୃଦ୍ଧି, 8.4 ପ୍ରତିଶତ ରହିଲା ଜିଡିପି ହାର, ପ୍ରଧାନମନ୍ତ୍ରୀ କହିଲେ - 140 କୋଟି ନାଗରିକଙ୍କ ଶକ୍ତି

GDP Growth Rate: ଭାରତୀୟ ଅର୍ଥନୀତିରେ ଜିଡିପି ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ । ତୃତୀୟ ତ୍ରୟ ମାସରେ ପୁଣି ଥରେ ଡିଜିପି ଅଭିବୃଦ୍ଧି ପଞ୍ଜିକୃତ ହୋଇଛି । ସରକାରୀ ତଥ୍ୟ ଅନୁଯାୟୀ, ଏକ ବର୍ଷ ପୂର୍ବେ ଅର୍ଥାତ୍ 2022-23 ଆର୍ଥିକ ବର୍ଷର ତୃତୀୟ ତ୍ରୟମାସରେ ଜିଡିପି ହାର 4.3 ପ୍ରତିଶତ ଥିଲା । ଚଳିତ ବର୍ଷ 2023-24 ରେ ଏହି ସମୟରେ ଜିଡିପି ହାର 8.4 ପ୍ରତିଶତ ରେକର୍ଡ କରାଯାଇଛି । ଜିଡିପିରେ ଏହି ଅଭିବୃଦ୍ଧି ହାର ସରକାରଙ୍କ ଆକଳନଠାରୁ ବହୁତ ଅଧିକ ।

ଚଳିତ ଆର୍ଥିକ ବର୍ଷ ଅର୍ଥାତ୍ 2023-24 ରେ ଜାନୁଆରୀରେ ପ୍ରକାଶିତ ପ୍ରଥମ ଅଗ୍ରୀମ ଆକଳନରେ ଜିଡିପି ଅଭିବୃଦ୍ଧି ହାର 7.3 ପ୍ରତିଶତ ହେବ ବୋଲି ଆକଳନ କରାଯାଇଥିଲା । NSO 2022-23 ରେ ଜିଡିପି ଅଭିବୃଦ୍ଧି ଆକଳନକୁ ମଧ୍ୟ ସଂଶୋଧନ କରି 7 ପ୍ରତିଶତ କରିଥିଲା । ଏହା ପୂର୍ବରୁ ଏହା 7.2 ପ୍ରତିଶତ ବୋଲି ଆକଳନ କରାଯାଇଥିଲା । ଉଲ୍ଲେଖଯୋଗ୍ୟ ଯେ ଚଳିତ ଆର୍ଥିକ ବର୍ଷର ସେପ୍ଟେମ୍ୱର ତ୍ରୈମାସରେ ଭାରତ 7.6 ପ୍ରତିଶତ ହାରରେ ଅଭିବୃଦ୍ଧି ରେକର୍ଡ କରିଥିଲା ।

2023-24 ରେ ରିୟଲ ଜିଡିପି 172.90 ଲକ୍ଷ କୋଟି ସ୍ତର ପାର କରିବା ନେଇ ଅନୁମାନ କରାଯାଇଛି । ଅନ୍ୟପେଟ 2022-23 ପାଇଁ ଜିଡିପିର ପ୍ରଥମ ସଂଶୋଧନ ଅନୁମାନ (FRE) 160.71 ଲକ୍ଷ କୋଟି ଟଙ୍କା ଥିଲା ।

ଆର୍ଥିକ ବର୍ଷର ତୃତୀୟ ତ୍ରୈମାସରେ ଏହି ବୃଦ୍ଧିର ମୁଖ୍ୟ କାରଣ ମେନ୍ୟୁଫେକଚରିଂ ସେକ୍ଟର, ମାଇନିଂ ଏବଂ ବିନିର୍ମାଣ କ୍ଷେତ୍ରରେ ସୁଧାର । ଉଲ୍ଲେଖଯୋଗ୍ୟ ଯେ ଏହି ଅବଧିରେ ବିନିର୍ମାଣ କ୍ଷେତ୍ର ଦୁଇ ଅଙ୍କର ବଦ୍ଧି ହାର (10.7) ରେକର୍ଡ କରିଛି । ସେହିପରି ମେନ୍ୟୁଫେକଚରିଂ ସେକ୍ଟରରେ 8.5 ପ୍ରତିଶତ ବୃଦ୍ଧି ରେକର୍ଡ କରାଯାଇଛି ।

ଜିଡିପି ଅଭିବୃଦ୍ଧି ଉପରେ ପ୍ରତିକ୍ରିୟା ରଖି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି, "2023-24 ର ତୃତୀୟ ତ୍ରୟମାସରେ ଜିଡିପିର 8.4% ଅଭିବୃଦ୍ଧି ଭାରତୀୟ ଅର୍ଥନୀତିର ଶକ୍ତି ଏବଂ ଏହାର ସମ୍ଭାବନାକୁ ପ୍ରତିଫଳିତ କରିଥାଏ । ଆମର ପ୍ରୟାସ ଦ୍ରୁତ ଅର୍ଥନୈତିକ ଅଭିବୃଦ୍ଧି ଜାରି ରଖିବ, ଯାହା 140 କୋଟି ଭାରତୀୟଙ୍କୁ ଏକ ଉନ୍ନତ ଜୀବନ ବଞ୍ଚିବା ଏବଂ ଏକ ବିକଶିତ ଭାରତ ସୃଷ୍ଟି କରିବା ପାଇଁ ସାହାଯ୍ୟ କରିବ ।"

English summary

Indian GDP growth rate in the third quarter recorded at 8.4 percent