ଆପଣଙ୍କର ଆଧାର କାର୍ଡର କୌଣସି ଅପବ୍ୟବହାର ହେଉ ନାହିଁ ତ ? ଜାଣନ୍ତୁ କିପରି କରିବେ ଯାଞ୍ଚ

ଆପଣଙ୍କ ଆଧାରକାର୍ଡ କେଉଁ କେଉଁ ସ୍ଥାନରେ ବ୍ୟବହାର ହୋଇଛି ତାହା ଜାଣିବା ପାଇଁ ଆଧାରର ପରିଚାଳନା କରୁଥିବା ‘The Unique Identification Authority of India' ତଥା UIDAI ଏକ ସୁବିଧା ରଖିଛି ।

Updated: Monday, July 5, 2021, 14:03 [IST]

ନୂଆଦିଲ୍ଲୀ : ବର୍ତ୍ତମାନ ସାରା ଦେଶରେ ଆଧାର କାର୍ଡ ଏକ ଗୁରୁତ୍ୱପୂର୍ଣ୍ଣ ଡକ୍ୟୁମେଣ୍ଟ ଭାବେ ବ୍ୟବହାର ହେଉଛି । ମୋବାଇଲ୍ ସିମ୍ କିଣିବା ଠାରୁ ବ୍ୟାଙ୍କରେ ଆକାଉଣ୍ଟ ଖୋଲିବା ଆଦି କାର୍ଯ୍ୟ ପାଇଁ ଆଧାରକାର୍ଡ ଆବଶ୍ୟକ ପଡ଼ୁଛି । ଏପରିକି ଏହା ଆପଣଙ୍କ ପରିଚୟ ପତ୍ର ଭାବେ ମଧ୍ୟ ବ୍ୟବହାର ହୋଇପାରୁଛି । ଏହି ସମୟରେ ଆପଣଙ୍କ ଡକ୍ୟୁମେଣ୍ଟ ସୁରକ୍ଷିତ ରହିବା ନିହାତି ଆବଶ୍ୟକ । ଆଜିକାଲି ଚାଲିଥିବା ସାଇବାର ଠକେଇ କିମ୍ବା ଅନ୍ୟାନ୍ୟ ଉପାୟରେ ଆପଣଙ୍କ ଆଧାର କାର୍ଡ ଭଳି ଗୁରୁତ୍ୱପୂର୍ଣ୍ଣ ଡକ୍ୟୁମେଣ୍ଟର ଅପବ୍ୟବହାର ହୋଇପାରେ । ଏପରି ପରିସ୍ଥିତିରେ ଆପଣଙ୍କ ଆଧାରକାର୍ଡ କେଉଁ କେଉଁ ସ୍ଥାନରେ ବ୍ୟବହାର ହୋଇଛି ତାହା ଜାଣିବା ପାଇଁ ଆଧାରର ପରିଚାଳନା କରୁଥିବା 'The Unique Identification Authority of India' ତଥା UIDAI ଏକ ସୁବିଧା ରଖିଛି ।

UIDAI ର ଅଫିସିଆଲ୍ ୱେବସାଇଟ୍ ରେ, 'Aadhaar Authentication History'ଟୁଲ ମାଧ୍ୟମରେ ଆପଣ ଆଧାର କାର୍ଡର ସବିଶେଷ ତଥ୍ୟ ଯାଞ୍ଚ କରିପାରିବେ । ଏହି ଟୁଲ୍ ଜରିଆରେ ଆପଣଙ୍କ ଆଧାର ଭେରିଫିକେସନ୍ ପାଇଁ କେଉଁ କେଉଁ ଟାରେ ବ୍ୟବହାର ହୋଇଛି ତାହାର ସବିଶେଷ ତଥ୍ୟ ଦେଇଥାଏ ।

କିପରି ଯାଞ୍ଚ କରିବେ ଆଧାର ଭେରିଫିକେସନ୍ ତାଲିକା

ସୋପାନ 1 : ସର୍ବପ୍ରଥମେ UIDAI ର ଅଫିସିଆଲ୍ ୱେବସାଇଟ୍ https://uidai.gov.in/ କୁ ଯାଆନ୍ତୁ ।

ସୋପାନ 2 : 'My Aadhaar'ଟ୍ୟାବରେ, ଆପଣ ''Aadhaar Services'ର ବିକଳ୍ପ ଦେଖିବେ । ଏଠାରେ 'Aadhaar Authentication History' ବିକଳ୍ପ ଉପରେ କ୍ଲିକ୍ କରନ୍ତୁ ।

ସୋପାନ 3 : ଏଠାରେ ଏକ ନୂଆ ପେଜ୍ ଖୋଲିବା ପରେ ଆପଣଙ୍କର 12 ଅଙ୍କ ବିଶିଷ୍ଟ ଆଧାର ନମ୍ବର ପ୍ରବେଶ କରିବାକୁ ପଡିବ ।

ସୋପାନ 4 : ଏହା ସହିତ ସେଠାରେ ଥିବା 'CAPTCHA' ପ୍ରବେଶ କରିବେ ।

ସୋପାନ 5 : ଏହା ପରେ 'Generate OTP'ଉପରେ କ୍ଲିକ୍ କରନ୍ତୁ, ଯାହା ପରେ ଅନ୍ୟ ଏକ ପୃଷ୍ଠା ଖୋଲିବ ।

ସୋପାନ 6 : ଏଥିରେ ଆପଣ ଦେଖିବାକୁ ଚାହୁଁଥିବା ସୂଚନାର ଅବଧି ବାଛିବା କିମ୍ବା ପୂର୍ବ କାରବାରର ବିବରଣୀ ଦେଖିବାକୁ ବିକଳ୍ପ ପାଇବେ ।

ସୋପାନ 7 : ଏଠାରେ ଆପଣଙ୍କୁ ଆପଣଙ୍କର ପଞ୍ଜୀକୃତ ମୋବାଇଲ୍ ନମ୍ବରରକୁ ଆସିଥିବା OTP ପ୍ରବେଶ କରିବାକୁ ହେବ ।

ଏହା ପରେ, ଆପଣ ଗତ କିଛି ଦିନ ମଧ୍ୟରେ ଆପଣଙ୍କ ଆଧାର କାର୍ଡ ଭେରିଫିକେସନର ତାଲିକା ପାଇପାରିବେ । ବ୍ୟବହାର ହୋଇଥିବା ସ୍ଥାନ, ତାରିଖ, ସମୟ ଆଦି ବିବରଣୀ ପାଇବେ । ଧ୍ୟାନ ଦିଅନ୍ତୁ ଯେ ଆପଣ ଏକ ସମୟରେ କେବଳ 50 କାରବାରର ବିବରଣୀ ଜାଣିବାକୁ ସକ୍ଷମ ହେବେ ।

ଏହି କାରବାରଗୁଡିକ ଦେଖି, ଆପଣ ଜାଣିପାରିବେ ଯେ ଆପଣ ଏହି ସମସ୍ତ କାରବାର ନିଜେ କରିଛନ୍ତି କି କୌଣସି ସନ୍ଦେହଜନକ କାର୍ଯ୍ୟକଳାପ ହୋଇଛି ।