WPL 2026: ସନ୍ଧ୍ୟାରେ କ୍ୟାପିଟାଲ୍ସ- ରୟାଲ୍ ଚ୍ୟାଲେଞ୍ଜର୍ସ ମହାମୁକାବିଲା

Published: Thursday, February 5, 2026, 15:57 [IST]

ଆଜି ଡବ୍ଲ୍ୟୁପିଏଲ୍‌ରେ ଫାଇନାଲ୍ ମୁକାବିଲା । ୨୦୨୪ ସଂସ୍କରଣ ଚାମ୍ପିଅନ୍ ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଓ ୩ଥର ରନର୍ସ ଅପ୍ ହୋଇ ସାରିଥିବା ଦିଲ୍ଲୀ କ୍ୟାପିଟାଲ୍ସ ଟ୍ରଫି ପାଇଁ ମଇଦାନକୁ ଓହ୍ଲାଇବେ । ଦିଲ୍ଲୀ କ୍ୟାପିଟାଲ୍ସ ସମସ୍ତ ୩ଟି ଯାକ ସଂସ୍କରଣରେ ଫାଇନାଲ୍ ଖେଳିଛି ଓ ପରାଜିତ ହୋଇ ଟାଇଟଲରୁ ବଞ୍ଚିତ ହୋଇଛି । ୨୦୨୪ ଫାଇନାଲ୍‌ରେ ମଧ୍ୟ ରୟାଲ୍ ଚ୍ୟାଲେଞ୍ଜର୍ସ ଠାରୁ ପରାଜିତ ହୋଇଥିଲା । ୩ଟି ଯାକ ସଂସ୍କରଣରେ ମେଗ ଲ୍ୟାନିଂ ଦିଲ୍ଲୀ କ୍ୟାପିଟାଲ୍ସ ଦଳର ନେତୃତ୍ୱ ନେଉଥିଲେ । ଏଥର ସେ ୟୁପି ୱାରିୟର୍ସ ଦଳର ଅଧିନାୟିକା ଥିଲେ ।

ଏଥର ଜେମିମା ରୋଡ୍ରିଗ୍ସଙ୍କ ନେତୃତ୍ୱରେ ଦିଲ୍ଲୀ କ୍ୟାପିଟାଲ୍ସ ଦଳର ଭାଗ୍ୟ ବଦଳିବା ଆଶା କରାଯାଇପାରେ । ଜେମିମାଙ୍କ ଗୋଟିଏ ଇନିଂସ ଭାରତକୁ ଦିନିକିଆ ବିଶ୍ୱକପ୍ ଚାମ୍ପିଅନ୍ କରାଇବାରେ ପ୍ରମୁଖ ଭୂମିକା ଗ୍ରହଣ କରିଥିଲା । ଅଷ୍ଟ୍ରେଲିଆ ବିପକ୍ଷ ସେମି ଫାଇନାଲ୍ରେ ଜେମିମା ଶତକ ଅର୍ଜନ କରି ଭାରତକୁ ଜିତାଇଥିଲେ । ଡବ୍ଲ୍ୟୁପିଏଲ୍ ଫାଇନାଲ୍‌ରେ ମଧ୍ୟ ତାଙ୍କ ବ୍ୟାଟ୍‌ରୁ ମ୍ୟାଚ ବିଜୟୀ ଇନିଂସ ଦେଖିବାକୁ ଫ୍ୟାନ୍‌ ମାନେ ଆଶା ବାନ୍ଧିଛନ୍ତି । ଟୁର୍ଣ୍ଣାମେଣ୍ଟ ଆରମ୍ଭରୁ ଧିମା ଚାଲିଥିବା ଦିଲ୍ଲୀ କ୍ୟାପିଟାଲ୍ସ ସଠିକ୍ ସମୟରେ ଫର୍ମକୁ ଫେରିଥିଲା ।

ରୟାଲ୍ ଚ୍ୟାଲେଞ୍ଜର୍ସ ଚଳିତ ସିଜନର ସବୁଠୁ ଶକ୍ତିଶାଳୀ ଓ ସନ୍ତୁଳିତ ଦଳ ଭାବେ ପ୍ରମାଣ କରିଥିଲା । କ୍ରମାନ୍ୱୟରେ ପ୍ରଥମ ୫ଟି ମ୍ୟାଚ ଜିତି ରୟାଲ୍ ଚ୍ୟାଲେଞ୍ଜର୍ସ ଫାଇନାଲ୍‌ରେ ସ୍ଥାନ ପକ୍କା କରିଥିଲା । ଫାଇନାଲ୍‌ରେ ମଧ୍ୟ ଦଳ ରାଜୁତି ପାଇଁ ପ୍ରସ୍ତୁତ ।

ଆଜି ଦିଲ୍ଲୀ କ୍ୟାପିଟାଲ୍ସର ଦୁଇ ଓପନର ଲିଜେଲି ଲି ଓ ଶେଫାଳି ବର୍ମା, ରୟାଲ୍ ଚ୍ୟାଲେଞ୍ଜର୍ସ ବୋଲର ଲାଉରେନ ବେଲଙ୍କ ମଧ୍ୟରେ ଜୋରଦାର ଲଢେଇ ହେବା ଆଶା କରାଯାଉଛି । ସେହିପରି ସ୍ମୃତି ମନ୍ଧନା ଓ ନନ୍ଦନୀ ଶର୍ମାଙ୍କ ଫାଇଟ୍‌କୁ ଦର୍ଶକ ଉତ୍ସୁକତାର ସହ ଅପେକ୍ଷା କରିଛନ୍ତି ।

ଦିଲ୍ଲୀ କ୍ୟାପିଟାଲ୍ସ: ଶେଫାଳି ବର୍ମା, ଲିଜେଲି ଲି, ଲୌରା ଉଲଭାର୍ଟ, ଜେମିମା ରୋଡ୍ରିଗ୍ସ(ଅଧିନାୟିକା), ମରିଜାନ କାପ, ଚିନେଲି ହେନରୀ, ନିକି ପ୍ରସାଦ, ସ୍ନେହ ରାଣା, ମିନୁ ମାନି, ନନ୍ଦନୀ ଶର୍ମା, ଶ୍ରୀ ଚରଣୀ ।

ରୟାଲ୍ ଚ୍ୟାଲେଞ୍ଜର୍ସ: ସ୍ମୃତି ମନ୍ଧନା(ଅଧିନାୟିକା), ଗ୍ରେସ ହ୍ୟାରିସ, ଜର୍ଜିୟା ଭୋଲ, ରିଚା ଘୋଷ, ରାଧା ଯାଦବ, ନାଦିନ ଡି କ୍ଲର୍କ, ପୂଜା ବସ୍ତ୍ରାକର, ଶ୍ରେୟଙ୍କା ପାଟିଲ, ସାୟାଲି ସତଘରେ, ଅରୁନ୍ଧତି ରେଡ୍ଡୀ, ଲାଉରେନ ବେଲ

Published On February 5, 2026