IND vs ENG: ସେମିଫାଇନାଲ ବାତିଲ ହେଲେ, କିଏ ଖେଳିବ ଫାଇନାଲ୍ ?

T20 World Cup 2024: ଟି20 ବିଶ୍ୱକପ୍ ଉପରେ ରହିଛି ସାରା ଦୁନିଆର ନଜର । ରୋହିତ ବାହିନୀ ଚଳିତ ଟୁର୍ଣ୍ଣାମେଣ୍ଟରେ ବେଶ୍ ଭଲ ପ୍ରଦର୍ଶ ମଧ୍ୟ କରିଛି । ଏଥି ସହିତ ସେମିଫାଇନାଲରେ ଜଳ ନିଜର ସ୍ଥାନ ପକ୍କା କରିସାରିଛି । ଦ୍ୱିତୀୟ ସେମିଫାଇନାଲରେ ଡିଫେଣ୍ଡିଂ ଚାମ୍ପିଅନ୍ ଇଂଲଣ୍ଡକୁ ଭେଟିବ ଭାରତୀୟ ଦଳ ।

ଦୁଇ ଦଳ ମଧ୍ୟରେ ଏହି ହାଇ-ଭୋଲଟେଜ୍ ମ୍ୟାଚ୍ ଜୁନ୍ 27 ରେ ଗୁୟାନାର ପ୍ରୋଭିଡେନ୍ସ ଷ୍ଟାଡିୟମରେ ଖେଳାଯିବ । ତେବେ ଆସନ୍ତୁ ଜାଣିବା ଏହି ମ୍ୟାଚ୍ କୁ ନେଇ କିଛି ରୋଚକ କଥା । ପିଚ୍ ରିପୋର୍ଟ କଣ କହୁଛି ? ଯଦି ମ୍ୟାଚ୍ ବାତିଲ ହୁଏ ତେବେ କଣ ହେବ ? ଫାଇନାଲ୍ କିଏ ଖେଳିବ ? ଏ ନେଇ କଣ ରହିଛି ସମାକରଣ...

ପ୍ରତିଶୋଧ ନେବା ମୁଡ୍ ରେ ରୋହିତବାହିନୀ

ବାସ୍ତବରେ ଦୁଇ ବର୍ଷ ପୂର୍ବେ ଟି -20 ବିଶ୍ୱକପ୍‌ର ଶେଷ ସଂସ୍କରଣର ସେମିଫାଇନାଲରେ ଭାରତ ଏବଂ ଇଂଲଣ୍ଡ ମୁହାଁମୁହିଁ ହୋଇଥିଲେ । ଆଡିଲେଡ୍ ଓଭାଲରେ ହୋଇଥିବା ଏହି ମୁକାବିଲାରେ ଜୋସ୍ ବଟଲର୍ ଏବଂ ଆଲେକ୍ସ ହେଲ୍ସ ଭାରତକୁ 10 ୱିକେଟ୍ ରେ ହରାଇଥିଲେ । 16 ଓଭରରେ 169 ରନ୍‌ର ଟାର୍ଗେଟକୁ ପଛରେ ପକାଇ ଫାଇନାଲରେ ପାକିସ୍ତାନକୁ ପରାସ୍ତ କରି ଟାଇଟଲ ହାସଲ କରିଥିଲେ ।

ଆଇସିସି ଟ୍ରଫି ଜିତିବାକୁ ଆଶାବାଦୀ

କ୍ରମାଗତ ଟି -20 ବିଶ୍ୱକପ ଜିତିବାରେ ପ୍ରଥମ ଦଳ ହେବାକୁ ଚାହୁଁଥିବାରୁ ବଟଲର ଦଳ ଭାରତ ପାଇଁ ଆହ୍ୱାନପୂର୍ଣ୍ଣ ହୋଇପାରେ । ଅନ୍ୟପକ୍ଷରେ, ଆଇସିସି ଟ୍ରଫି ମରୁଡ଼ିକୁ ଶେଷ କରିବାକୁ ଭାରତ ବେଶ୍ ଆଶାବାଦୀ ରହିଛି । କାରଣ 2013 ରେ ଆଇସିସି ଟୁର୍ନାମେଣ୍ଟରେ ଶେଷ ଥର ପାଇଁ ଜିତିଥିଲା ଦଳ ।

ସୁପର -8ରେ ଶୀର୍ଷରେ ଭାରତ

ସୁପର -8 ରାଉଣ୍ଡରେ ଗ୍ରୁପ୍-1 ଷ୍ଟାଣ୍ଡିଂରେ ତିନିଟି ମ୍ୟାଚରୁ ତିନୋଟି ବିଜୟ ସହ ଶୀର୍ଷରେ ରହିଛି ଭାରତୀୟ ଦଳ । ସେମିଫାଇନାଲରେ ପ୍ରବେଶ କରିବା ପାଇଁ ଭାରତ ଆଫଗାନିସ୍ତାନକୁ 47 ରନ, ବାଂଲାଦେଶ କୁ 50 ରନ ଏବଂ ଅଷ୍ଟ୍ରେଲିଆକୁ 24 ରନରେ ପରାସ୍ତ କରିଛି । ସପଟେ ଜୋସ୍ ବଟଲରଙ୍କ ଦଳ ୱେଷ୍ଟଇଣ୍ଡିଜ୍ ଏବଂ ଆମେରିକା ବିପକ୍ଷରେ ପ୍ରଭାବଶାଳୀ ଥିଲା, ଯଥାକ୍ରମେ 8 ୱିକେଟ୍ ଏବଂ 10 ୱିକେଟ୍ ରେ ମ୍ୟାଚ୍ ଜିତିଥିଲା, କିନ୍ତୁ ଦକ୍ଷିଣ ଆଫ୍ରିକା ଠାରୁ 7 ରନ୍ ବ୍ୟବଧାନରେ ହାରିଥିଲା ।

ଭାରତ-ଇଂଲଣ୍ଡ ମ୍ୟାଚରେ ବାଧା ଦେବ ବର୍ଷା !

ଭାରତ - ଇଂଲଣ୍ଡ ସେମିଫାଇନାଲରେ ବର୍ଷା ହେବାର ବେଶ୍ ସମ୍ଭାବନା ଅଛି । ପାଣିପାଗ ବିଭାଗର ସୂଚନାନୁସାରେ, ଗୁରୁବାର ପାଇଁ "ବଜ୍ରପାତ ଏବଂ ସକାଳ ପର୍ଯ୍ୟନ୍ତ ପ୍ରବଳ ବର୍ଷା" ଏବଂ 70 ପ୍ରତିଶତ ବର୍ଷା ହେବାର ସମ୍ଭାବନା ରହିଛି ।

ଏହି ମ୍ୟାଚ୍ ପାଇଁ ନାହିଁ ରିଜର୍ଭ ଡେ'

ଉଭୟ ସେମିଫାଇନାଲ ପାଇଁ ରିଜର୍ଭ ଡେ' ର ନିୟମ ଅଲଗା ରହିଛି । ଦକ୍ଷିଣ ଆଫ୍ରିକା ଏବଂ ଆଫଗାନିସ୍ତାନ ମଧ୍ୟରେ ସେମିଫାଇନାଲ ପାଇଁ ରିଜର୍ଭ ଡେ' ଥିବାବେଳେ ଭାରତ-ଇଂଲଣ୍ଡ ସେମିଫାଇନାଲ ପାଇଁ କୌଣସି ରିଜର୍ଭ ଡେ ନାହିଁ । ଏହି ମ୍ୟାଚ ଜୁନ 27 ରେ ଶେଷ ହେବାର କାର୍ଯ୍ୟକ୍ରମ ରହିଛି । ଏହାର କାରଣ ହେଉଛି ଭାରତ ବନାମ ଇଂଲଣ୍ଡ ସେମିଫାଇନାଲ ଏବଂ ଜୁନ 29 ରେ ଫାଇନାଲ ମଧ୍ୟରେ କେବଳ ଗୋଟିଏ ଦିନର ବ୍ୟବଧାନ ଅଛି ।

ସେମିଫାଇନାଲରେ ମିଳିବ 250 ଅତିରିକ୍ତ ମିନିଟ୍

ତେବେ ଭଲ କଥା ହେଉଛି ଉଭୟ ସେମିଫାଇନାଲ ପାଇଁ 250 ଅତିରିକ୍ତ ମିନିଟ୍ ଦିଆଯାଇଛି । ଏହି ଅତିରିକ୍ତ ସମୟ ଦକ୍ଷିଣ ଆଫ୍ରିକା ଏବଂ ଆଫଗାନିସ୍ତାନ ସେମିଫାଇନାଲ୍ ପାଇଁ ଦୁଇ ଦିନ ମଧ୍ୟରେ ବଣ୍ଟା ଯାଇଛି । କିନ୍ତୁ, ଭାରତ ବନାମ ଇଂଲଣ୍ଡ ସେମିଫାଇନାଲ୍ ପାଇଁ ଏହି ଅତିରିକ୍ତ ସମୟ ମ୍ୟାଚ୍ ଦିନରେ ଅନ୍ତର୍ଭୁକ୍ତ କରାଯାଇଛି ।

ଯଦି ସେମିଫାଇନାଲ ବାତିଲ ହୁଏ ?

ଭାରତ ଏବଂ ଇଂଲଣ୍ଡ ମଧ୍ୟରେ ଦ୍ୱିତୀୟ ସେମିଫାଇନାଲ ଗୁୟାନାରେ ରାତି 8.00 ରେ ଆରମ୍ଭ ହେବ । ଯଦି ବର୍ଷା ହେତୁ ସେମିଫାଇନାଲ ବାତିଲ ହୁଏ କିମ୍ବା କୌଣସି କାରଣରୁ ଫଳାଫଳ ନଆସେ, ତେବେ ସୁପର 8 ରାଉଣ୍ଡରେ ଶୀର୍ଷରେ ଥିବା ଦଳ ଫାଇନାଲକୁ ଉନ୍ନୀତ ହେବେ । ଏଭଳି ପରିସ୍ଥିତିରେ ଭାରତ ଟି -20 ବିଶ୍ୱକପ 2024 ଫାଇନାଲ ପାଇଁ ଯୋଗ୍ୟତା ଅର୍ଜନ କରିବ ।