ACC ଅଫିସରୁ ଏସିଆ କପ ଟ୍ରଫି ଗାଏବ କଲେ ନକଭି, କେଉଁଠି ଅଛି ଇଣ୍ଡିଆର କପ୍‌ ?

ଏସିଆ କପ ୨୦୨୫ ଟ୍ରଫି ବିବାଦ ପ୍ରତିଦିନ ସାମ୍ନାକୁ ଆସୁଛି । ମୋହସିନ ନକଭି ଟ୍ରଫିକୁ ନିଜର ବୋଲି ବିବେଚନା କରିଛନ୍ତି, ଯାହା ଯଥାର୍ଥ ଭାବରେ ଟିମ ଇଣ୍ଡିଆର ଅଟେ । ସେ ପୂର୍ବରୁ କହିଥିଲେ ଯେ ଯଦି ଭାରତ ଟ୍ରଫି ଚାହୁଁଥାଏ, ତେବେ ବିସିସିଆଇ କିମ୍ବା ଟିମ ଇଣ୍ଡିଆର ସଦସ୍ୟ ଏସୀୟ କ୍ରିକେଟ ପରିଷଦ କାର୍ଯ୍ୟାଳୟକୁ ଆସି ଏହାକୁ ସଂଗ୍ରହ କରିବା ଉଚିତ । ବର୍ତ୍ତମାନ, ସଦ୍ୟତମ ସୂଚନା ଅନୁସାରେ, ଟ୍ରଫିଟି ACC କାର୍ଯ୍ୟାଳୟରୁ ମଧ୍ୟ ଗାଏବ ହୋଇଯାଇଛି ।

ANI ରୁ ମିଳିଥିବା ସୂଚନା ଅନୁସାରେ, ଏସିଆ କପ ଟ୍ରଫି ଆଉ ଏସୀୟ କ୍ରିକେଟ ପରିଷଦ କାର୍ଯ୍ୟାଳୟରେ ନାହିଁ। ବରଂ, ACC ସଭାପତି ମୋହସିନ ନକଭି ଏହାକୁ ଆବୁଧାବିର କୌଣସି ସ୍ଥାନରେ ତାଙ୍କ ସହିତ ଲୁଚାଇ ରଖିଛନ୍ତି । ରିପୋର୍ଟ ଅନୁଯାୟୀ, ଗତ ସପ୍ତାହରେ ଜଣେ ବିସିସିଆଇ ଅଧିକାରୀ ଟ୍ରଫି ବିଷୟରେ ପଚାରିବା ପାଇଁ ACC କାର୍ଯ୍ୟାଳୟକୁ ଯାଇଥିଲେ । କାର୍ଯ୍ୟାଳୟର ଜଣେ କର୍ମଚାରୀ ତାଙ୍କୁ ଜଣାଇଥିଲେ ଯେ ଟ୍ରଫି ଆବୁଧାବିରେ ଅଛି ।

ମୋହସିନ ନକଭି ବ୍ୟକ୍ତିଗତ ଭାବରେ ଟିମ ଇଣ୍ଡିଆକୁ ଟ୍ରଫି ହସ୍ତାନ୍ତର କରିବାକୁ ଚାହାଁନ୍ତି। ଅକ୍ଟୋବର ଆରମ୍ଭରେ, ସେ ବିସିସିଆଇକୁ କହିଥିଲେ ଯେ ଯଦି ସେମାନେ ଟ୍ରଫି ଚାହାଁନ୍ତି, ତେବେ ଜଣେ ଅଧିକାରୀ କିମ୍ବା ଟିମ ଇଣ୍ଡିଆର ଖେଳାଳି ACC କାର୍ଯ୍ୟାଳୟରୁ ଏହାକୁ ସଂଗ୍ରହ କରିବା ଉଚିତ। ଭାରତୀୟ ବୋର୍ଡ ଏହାର ତୀବ୍ର ପ୍ରତିବାଦ କରିଥିଲା।

ଉପାଧ୍ୟକ୍ଷ ରାଜୀବ ଶୁକ୍ଳା କହିଥିଲେ, 'ଯଦି ମୋତେ ତୁମଠାରୁ ଟ୍ରଫି ନେବାକୁ ପଡ଼େ, ତେବେ ମୁଁ ଫାଇନାଲ ରାତିରେ ହିଁ ଏହାକୁ ନେଇଥାନ୍ତି।' ସମ୍ପ୍ରତି, ବିସିସିଆଇ ଟ୍ରଫି ଫେରାଇବାକୁ ଅନୁରୋଧ କରି ଏକ ଇମେଲ ମଧ୍ୟ ପଠାଇଥିଲା। ଏହାର ମୋହସିନ ନକଭିଙ୍କ ଉପରେ କୌଣସି ପ୍ରଭାବ ପଡ଼ିନଥିଲା।

ପାକିସ୍ତାନ କ୍ରିକେଟ ବୋର୍ଡର ମୁଖ୍ୟଙ୍କ ଏହି ଜିଦ ପରେ, ବିସିସିଆଇ ଆଇସିସି ସହିତ ଯୋଗାଯୋଗ କରିବାକୁ ନିଷ୍ପତ୍ତି ନେଇଛି। ରିପୋର୍ଟ ଅନୁଯାୟୀ, ଭାରତୀୟ ବୋର୍ଡ ଏବେ ଆସନ୍ତା ମାସରେ ଆଇସିସି ସମ୍ମିଳନୀରେ ନକଭିଙ୍କ କାର୍ଯ୍ୟର ପ୍ରତିବାଦ କରିବାକୁ ଯୋଜନା କରୁଛି। ଯଦି ବିସିସିଆଇ ବିଜୟୀ ହୁଏ, ତେବେ ନକଭି ଆଇସିସି ନିର୍ଦ୍ଦେଶକ ବୋର୍ଡରେ ତାଙ୍କ ପଦବୀ ହରାଇ ପାରନ୍ତି। ଏସୀୟ କ୍ରିକେଟ ପରିଷଦରେ ତାଙ୍କ ପଦବୀ ମଧ୍ୟ ବିପଦରେ ପଡ଼ିପାରେ। ଭାରତ ୫ ୱିକେଟରେ ପାକିସ୍ତାନକୁ ହରାଇ ଚାମ୍ପିୟନ ହୋଇଥିଲା। କିନ୍ତୁ ବିଜୟୀ ଭାରତ ନକଭୀଙ୍କ ହାତରୁ ଟ୍ରଫି ସଂଗ୍ରହ କରିବ ନାହିଁ ବୋଲି ରୋକଠୋକ ମନା କରି ଦେଇଥିଲା। ନକଭୀଙ୍କ ବଦଳରେ ୟୁଏଇ କ୍ରିକେଟ ବୋର୍ଡର ଉପାଧ୍ୟକ୍ଷଙ୍କ ହାତରୁ ଭାରତ ଟ୍ରଫି ନେବାକୁ ଚାହୁଁଥିଲା। ଷ୍ଟେଜ ଉପରେ ଏପରି ହଟହଟା ହେବା ପରେ ନକଭୀ ଟ୍ରଫି ଧରି ସିଧା ନିଜର ହୋଟେଲ ରୁମକୁ ଚାଲି ଯାଇଥିଲେ। ଜିତିବା ସତ୍ତ୍ୱେ ଭାରତ ବିନା ଟ୍ରଫିରେ ବିଜୟ ଉତ୍ସବ ପାଳିଥିଲା ।

ନକଭୀ ଏସିଆ କପ ଟ୍ରଫିକୁ ନିଜର ବ୍ୟକ୍ତିଗତ ସମ୍ପତ୍ତି ଭାବେ ବ୍ୟବହାର କରିଥିବାରୁ ଏହାକୁ ବିସିସିଆଇ ତୀବ୍ର ସମାଲୋଚନା କରିଥିଲା।