IPL 2025: ଆଜି ଲକ୍ଷ୍ନୌ ବନାମ ରୟାଲ୍ ଚ୍ୟାଲେଞ୍ଜର୍ସ, ଟେବୁଲ୍ ଟପ୍ପର ଲକ୍ଷ୍ୟରେ ଆରସିବି

ଚଳିତ ଆଇପିଏଲରେ ମଙ୍ଗଳବାର ଖେଳାଯିବ ଶେଷ ଲିଗ୍ ମ୍ୟାଚ୍ । ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଓ ଲକ୍ଷ୍ନୌ , ଏକାନ୍ନା ଷ୍ଟାଡ଼ିୟମରେ ସାମ୍ନା ସାମ୍ନି ହେବେ । ରୟାଲ୍ ଚ୍ୟାଲେଞ୍ଜର୍ସ ଏହି ମ୍ୟାଚ୍ ଜିତି ପଏଣ୍ଟ ତାଲିକାର ଶୀର୍ଷ ସ୍ଥାନ ଦଖଲ କରିବାକୁ ପ୍ରୟାସ କରିବ ।

ରୟାଲ ଚ୍ୟାଲେଞ୍ଜର୍ସ ଗତ ୨୩ ତାରିଖରେ ସନରାଇଜର୍ସ ହାଇଦ୍ରାବାଦ ଠାରୁ ପରାଜିତ ହୋଇଥିଲା । ଅନେକ ଖେଳାଳିଙ୍କ ପ୍ରଦର୍ଶନରେ ଅବନତି ଦେଖିବାକୁ ମିଳିଥିଲା । ବିରାଟ କୋହଲି ଓ ଫିଲ ସଲ୍ଟଙ୍କୁ ଛାଡ଼ିଦେଲେ ମଧ୍ୟ କ୍ରମରେ ଅନ୍ୟ କେହି ସଫଳ ହୋଇପାରିନଥିଲେ । ଜୋସ୍ ହାଜେଲଉଡଙ୍କ ଅନୁପସ୍ଥିତିରେ ବୋଲିଂ ବାହିନୀ ମଧ୍ୟ ଲକ୍ଷ୍ୟ ଚ୍ୟୁତ ହୋଇଥିଲା । ଏଥର ସମସ୍ତ ତ୍ରୁଟି ସୁଧାରି ରୟାଲ ଚ୍ୟାଲେଞ୍ଜର୍ସ ଗ୍ରାଉଣ୍ଡକୁ ଓହ୍ଳାଇବ ।

ସୁପରଜାଏଣ୍ଟ୍ସ ପୂର୍ବ ଲିଗ୍ ମ୍ୟାଚ୍ରେ ଟେବୁଲ ଟପ୍ପର ଗୁଜରାଟ ଟାଇଟନ୍ସକୁ ହରାଇଥିଲା । ମିଚେଲ ମାର୍ଶ, ଆଡେନ ମାରକ୍ରମ ଓ ନିକୋଲାସ ପୂରନ ଅର୍ଦ୍ଧଶତକ ଅର୍ଜନ କରିଥିଲେ । ପରେ ବୋଲରମାନେ ଟାଇଟନ୍ସ ବ୍ୟାଟରଙ୍କୁ କ୍ରିଜରେ ଜମିବାକୁ ସୁଯୋଗ ଦେଇ ନଥିଲେ । କ୍ରମାନ୍ୱୟରେ ୪ଟି ମ୍ୟାଚ୍ ପରାଜିତ ହୋଇ ପ୍ଲେ-ଅଫ୍ରୁ ବାଦ ପଡ଼ିବା ପରେ ସୁପରଜାଏଣ୍ଟସ ଉକ୍ତ ମ୍ୟାଚ୍ ଜିତିଥିଲା । ସବୁ ଖେଳାଳି ଫର୍ମକୁ ଫେରିବା ବେଳକୁ ବିଳମ୍ବ ହୋଇ ସାରିଥିଲା । ଟାଇଟନ୍ସ ବିପକ୍ଷ ମ୍ୟାଚ୍ର ପ୍ରଦର୍ଶନକୁ ଆଜି ରୟାଲ୍ ଚ୍ୟାଲେଞ୍ଜର୍ସ ବିପକ୍ଷରେ ଦୋହରାଇବା ପାଇଁ ଦଳ ପ୍ରସ୍ତୁତ ରହିଛି ।

ଆଜି ରୟାଲ ଚ୍ୟାଲେଞ୍ଜର୍ସ ଏକାଦଶରେ ପରିବର୍ତ୍ତନ କରିବ । ଦଳକୁ ଫେରିଥିବା ଜୋସ ହାଜେଲଉଡ୍ ଆସନ୍ତା କାଲି ଲୁଙ୍ଗି ଏନଗିଡ଼ିଙ୍କ ସ୍ଥାନରେ ଖେଳିବାର ଯଥେଷ୍ଟ ସମ୍ଭାବନା ରହିଛି । ଠିକ୍ ସେହିପରି ଆହତ ଟିମ ଡେଭିଡଙ୍କ ସ୍ଥାନରେ ଲାଏମ ଲିଭିଙ୍ଗଷ୍ଟୋନ କିମ୍ବା ଟିମ ସାଇଫର୍ଟଙ୍କ ମଧ୍ୟରୁ ଜଣଙ୍କୁ ସୁଯୋଗ ମିଳିପାରେ ।

ସୁପରଜାଏଣ୍ଟ୍ସ ଦଳରେ ଏକାଧିକ ପରିବର୍ତ୍ତନ ହେବା ଆଶା କରାଯାଉଛି । ଗୋଟିଏ ମ୍ୟାଚ୍ରୁ ନିଲମ୍ବିତ ହୋଇଥିବା ଦିଗବେଶ ରାଠି ଆଜି ଖେଳିବା ନିଶ୍ଚିତ । ଏହା ବ୍ୟତୀତ ୩ ଯୁବ ଅଲରାଉଣ୍ଡର ଆର୍ସିନ କୁଲକର୍ଣ୍ଣୀ, ରାଜବର୍ଦ୍ଧନ ହଙ୍ଗରଗେକର ଓ ଯୁବରାଜ ଚୌଧୁରୀଙ୍କ ମଧ୍ୟରୁ ଜଣଙ୍କୁ ଏକାଦଶରେ ସ୍ଥାନ ମିଳିପାରେ ।

ଆଜି କୋହଲିଙ୍କ ଉପରେ ନଜର ରହିବ । ସେ ଆଉ ୨୪ ରନ୍ କଲେ ରୟାଲ୍ ଚ୍ୟାଲେଞ୍ଜର୍ସ ପକ୍ଷରୁ ୯୦୦୦ ରନ ପୂରଣ କରିବେ । ଆଉ ଏକ ବିଜୟ ସହ ରୟାଲ୍ ଚ୍ୟାଲେଞ୍ଜର୍ସ ରେକର୍ଡ କରିବା ସମ୍ଭାବନା ରହିଛି । ଆଇପିଏଲ୍ ଇତିହାସରେ ପ୍ରଥମ ଦଳ ଭାବେ ରୟାଲ ଚ୍ୟାଲେଞ୍ଜର୍ସ ବାହାର ଗ୍ରାଉଣ୍ଡ୍ରେ ସମସ୍ତ ମ୍ୟାଚ୍ ଜିତିବାରେ ସଫଳ ହେବ ।

ଏକାନ୍ନା ଷ୍ଟାଡିୟମ୍ରେ ଆଜିର ମ୍ୟାଚ୍ ପାଇଁ ପ୍ରସ୍ତୁତ କରାଯାଇଥିବା ପିଚ୍ ବ୍ୟାଟିଂ ପାଇଁ ଅନୁକୂଳ ଥିଲେ ହେଁ ସାମାନ୍ୟ ମନ୍ଥର ରହିବ । ଫଳରେ ସ୍ପିନରମାନେ ପିଚ୍ର ଫାଇଦା ଉଠାଇ ପାରିବେ । ଏହି ପିଚ୍ରେ ପୂର୍ବରୁ ଏକ ମ୍ୟାଚ୍ ଖେଳାଯାଇଥିଲା ଓ ଚେନ୍ନାଇ ସୁପରକିଙ୍ଗ୍ସ ୫ୱିକେଟ୍ରେ ସୁପରଜାଏଣ୍ଟ୍ସକୁ ପରାସ୍ତ କରିଥିଲା । ଆଜି ମଧ୍ୟ ଟସ୍ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।

ସମ୍ଭାବ୍ୟ ଦ୍ୱାଦଶ

ରୟାଲ୍ ଚ୍ୟାଲେଞ୍ଜର୍ସ: ଫିଲ ସଲ୍ଟ, ବିରାଟ କୋହଲି, ମୟଙ୍କ ଅଗରୱାଲ୍, ରଜତ ପାତିଦାର (ଅଧିନାୟକ),ଲାଏମ ଲିଭିଙ୍ଗଷ୍ଟୋନ, ଜିତେଶ ଶର୍ମା, ରୋମାରିଓ ସେଫର୍ଡ, କୃନାଲ୍ ପାଣ୍ଡ୍ୟା, ଭୁବନେଶ୍ୱର କୁମାର, ଜୋସ ହାଜେଲଉଡ୍, ୟଶ ଦୟାଲ, ସୂୟାଶ ଶର୍ମା ।

ସୁପରଜାଏଣ୍ଟ୍ସ: ଆଡେନ ମାରକ୍ରମ, ମିଚେଲ ମାର୍ଶ, ନିକୋଲାସ ପୂରନ, ରିଷଭ ପନ୍ତ(ଅଧିନାୟକ), ଆୟୂଷ ବାଦୋନି, ଅବଦୁଲ ସମଦ, ହିମତ ସିଂହ, ଦିଗବେଶ ରାଠି, ଅଭେଶ ଖାନ, ଆକାଶ ଦୀପ, ୱିଲ ଓ'ରୁର୍କ, ଆକାଶ ସିଂହ।