IPL 2025: ୨୮,୩୯୦ କୋଟି ଟଙ୍କାର ମାଲିକକୁ ଜବାବ ଦେଲେ କେ ଏଲ ରାହୁଲ

କେ ଏଲ ରାହୁଲଙ୍କ ବିସ୍ଫୋରକ ଅର୍ଦ୍ଧଶତକ ବଳରେ ଗତକାଲି ଦିଲ୍ଲୀ କ୍ୟାପିଟାଲ୍ସ (ଡିସି) ୬ ଉଇକେଟରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆରସିବି)କୁ ପରାସ୍ତ କରିଥିଲା । ଦିଲ୍ଲୀ ଚଳିତ ଲିଗ୍‌ର ଏକମାତ୍ର ଦଳ ଭାବେ ତା'ର ଅପରାଜେୟ ଧାରା ଜାରି ରଖିଛି। ଦିଲ୍ଲୀ ପାଇଁ କ୍ରମାଗତ ଚତୁର୍ଥ ବିଜୟ ହୋଇଥିବା ବେଳେ ବେଙ୍ଗାଲୁରୁ ଲାଗି ଏହା ଦ୍ୱିତୀୟ ପରାଜୟ। ଏହି ପ୍ରଦର୍ଶନ ସହିତ ରାହୁଲ ୨୮,୩୯୦ କୋଟି ଟଙ୍କାର ମାଲିକଙ୍କୁ ଉଚିତ ଜବାବ ଦେଇଛନ୍ତି।

କେଏଲ ରାହୁଲଙ୍କ ପୁରୁଣା ଫ୍ରାଞ୍ଚାଇଜ ଏଲଏସଜିର ମାଲିକ ସଞ୍ଜିବ ଗୋଏଙ୍କାଙ୍କ ସମ୍ପତ୍ତି ୨୮,୩୯୦ କୋଟି ଟଙ୍କା। LSG ସହିତ IPLର ଗତ ସିଜିନ କେଏଲ ରାହୁଲଙ୍କ ପାଇଁ ବହୁତ ଚାପପୂର୍ଣ୍ଣ ଥିଲା। ରାହୁଲ LSGର ଅଧିନାୟକ ମଧ୍ୟ ଥିଲେ। ହେଲେ ଦଳର ପରାଜୟ ପରେ, ସଞ୍ଜିବ ଗୋଏଙ୍କା ତାଙ୍କ ଉପରେ ରାଗିଥିବାର ଅନେକ ଫଟୋ ପଡ଼ିଆରୁ ଭାଇରାଲ ହୋଇଥିଲା।

ସେତେବେଳେ କେଏଲ ରାହୁଲ କୌଣସି ଉତ୍ତର ଦେଇ ନଥିଲେ। କିନ୍ତୁ, IPL 2025 ରେ ତାଙ୍କର ପ୍ରଦର୍ଶନ ସହିତ, ସେ LSG ର ମାଲିକଙ୍କୁ ଏକ ଉପଯୁକ୍ତ ଜବାବ ଦେଉଥିବା ପରି ମନେ ହେଉଛି।

ଦିଲ୍ଲୀ କ୍ୟାପିଟାଲ୍ସ ଆଇପିଏଲ ୨୦୨୫ରେ ଏପର୍ଯ୍ୟନ୍ତ ୪ଟି ମ୍ୟାଚ ଖେଳିଛି, ଯେଉଁଥିରୁ ରାହୁଲ କେବଳ ତିନୋଟି ମ୍ୟାଚ ଖେଳିଛନ୍ତି। ରାହୁଲ ସେହି ୩ଟି ମ୍ୟାଚ ମଧ୍ୟରୁ ୨ଟିରେ ୫୦ରୁ ଅଧିକ ସ୍କୋର କରିଛନ୍ତି। ସେ ଏହି ଦୁଇଟି ସ୍କୋର ଲଗାତାର କରିଛନ୍ତି।

ସେ ବିଭିନ୍ନ ପୋଜିସନରେ ଖେଳି ନିଜର ଛାପ ସୃଷ୍ଟି କରିଛନ୍ତି। ସେ CSK ବିପକ୍ଷରେ ଓପନର ଭାବରେ ୭୭ ରନ କରିଥିଲେ ଏବଂ ପରବର୍ତ୍ତୀ ମ୍ୟାଚ୍ରେ ସେ RCB ବିପକ୍ଷରେ ୪ ନମ୍ବରରେ ଖେଳି ଅପରାଜିତ ୯୩ ରନ କରିଥିଲେ।

IPL 2025 ରେ ଏପର୍ଯ୍ୟନ୍ତ ଖେଳାଯାଇଥିବା ୩ଟି ମ୍ୟାଚ ରେ, ରାହୁଲ ୧୬୯.୭୨ ଷ୍ଟ୍ରାଇକ ରେଟରେ ୧୮୫ ରନ କରିଛନ୍ତି। ତାଙ୍କର ସର୍ବଶ୍ରେଷ୍ଠ ସ୍କୋର ହେଉଛି ଅପରାଜିତ ୯୩ ରନ । ସେ ୨୦୨୫ ଆଇପିଏଲରେ ଦିଲ୍ଲୀ କ୍ୟାପିଟାଲ୍ସ ପାଇଁ ଏପର୍ଯ୍ୟନ୍ତ ସର୍ବାଧିକ ରନ ସ୍କୋରର। ସଞ୍ଜିବ ଗୋଏଙ୍କା ଆଇପିଏଲ ୨୦୨୫ ପାଇଁ ରିଷଭ ପନ୍ତଙ୍କୁ ୨୭ ଲକ୍ଷ ଟଙ୍କାରେ କିଣିଥିଲେ।