ଆଇପିଏଲ 2023: ଏହି ଦଳ ପାଖରେ ରହିଛି ଶକ୍ତିଶାଳୀ ବ୍ୟାଟିଂ ଲାଇନ୍ ଅପ୍

Updated: Tuesday, March 28, 2023, 23:10 [IST]

IPL 2023 Batting Line Up: ଆଇପିଏଲ 2023 ମାର୍ଚ୍ଚ 31ରୁ ଆରମ୍ଭ ହେବ । ଭାରତରେ କ୍ରିକେଟ୍ ପର୍ବ ଭାବେ ପରିଗଣିତ ଆଇପିଏଲରେ ଚଳିତ ସିଜନର ପ୍ରଥମ ମ୍ୟାଚ ଚେନ୍ନାଇ ସୁପର କିଙ୍ଗ୍ସ ଓ ଡିଫେଣ୍ଡିଂ ଚାମ୍ପିଅନ୍ସ ଗୁଜୁରାଟ ଟାଇଟାନ୍ସ ମଧ୍ୟରେ ଖେଳାଯିବ । ଏହି ମ୍ୟାଚ ଅମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଅନୁଷ୍ଠିତ ହେବ । ମେ 28 ରେ ଆଇପିଏଲ ଫାଇନାଲ ଖେଳାଯିବ ।

ମୋଟ 74ଟି ମ୍ୟାଚ ଖେଳିଯିବାକୁ ଥିବା ବେଳେ ଇଣ୍ଡିଆନ୍ ପ୍ରିମିୟର ଲିଗର ସିଜନ 16ରେ ସମସ୍ତ 10ଟି ଫ୍ରାଞ୍ଚାଇଜରେ ବଡ଼ ବଡ଼ ଷ୍ଟାର ଖେଳାଳିଙ୍କୁ ଦେଖିବାକୁ ମିଳିବ । ହେଲେ ଆଜି ଆମେ ଆପଣଙ୍କୁ କହିବୁ ଚଳିତ ସିଜନ ପାଇଁ କେଉଁ ଦଳ ପାଖରେ ରହିଛି ଶକ୍ତିଶାଳୀ ବ୍ୟାଟିଂ ଲାଇନ୍ ଅପ୍...

ବ୍ୟାଟିଂ ବୋଧହୁଏ ଟି-20 ଫର୍ମାଟର ଏକ ମୁଖ୍ୟ ଉପାଦାନ । ଯେହେତୁ ଦର୍ଶକମାନେ ମନୋରଞ୍ଜନ ଆଶାରେ ଷ୍ଟାଡିୟମରେ ଏକତ୍ରିତ ହୁଅନ୍ତି । ତେବେ ସମସ୍ତ 10ଟି ଆଇପିଏଲ୍ ଦଳ ମଧ୍ୟରେ କେତେକ ଦଳଙ୍କର ଚଳିତ ବର୍ଷ ବ୍ୟାଟିଂ ଲାଇନ୍ଅପ୍ ଦମଦାର ରହିଛି । ମାତ୍ର ବୋଧହୁଏ ସବୁଠାରୁ ଶକ୍ତିଶାଳୀ ହେଉଛି ବ୍ୟାଟିଂ ଲାଇନ୍ ଅପ୍ ରଖିଥିବା ଦଳ ହେଉଛି ଲକ୍ଷ୍ନୌ ସୁପର ଜିଆଣ୍ଟସ୍ । ଏହି ଆଇପିଏଲରେ ଲକ୍ଷ୍ନୌ ସୁପର ଜିଆଣ୍ଟସ୍ ର ଏକ ଚମତ୍କାର ବ୍ୟାଟିଂ ଲାଇନ୍ ଅପ୍ ସହ ପଡିଆକୁ ଓହ୍ଲାଇବ । ସେମାନଙ୍କର ବ୍ୟାଟିଂ କ୍ରମ ଅତ୍ୟନ୍ତ ଚମତ୍କାର ରହିଛି ।

LSG ବ୍ୟାଟିଂ ଲାଇନ୍ ଅପ୍:

କେଏଲ ରାହୁଲ ଏବଂ ଡି କକ୍ ଲକ୍ଷ୍ନୌ ସୁପର ଜିଆଣ୍ଟ୍ସର ଟପ୍ ଓପନର । ଉଭୟ ଖେଳାଳିଙ୍କ ନିଜ ନିଜ କ୍ଲାସ ରହିଛି । ଉଭୟଙ୍କ ଭିତରୁ କେହି ବି ବ୍ୟାଟ୍ ସହ ମ୍ୟାଚ୍ ଜିତିବାର କ୍ଷମତା ରଖିଛନ୍ତି । ଯଦିଓ ଗତ କିଛି ମାସ ଧରି କେଏଲ ରାହୁଲଙ୍କ ଫର୍ମ ଖରାପ ଚାଲୁଛି । କିନ୍ତୁ ଆଇପିଏଲ କଥା ଆସିଲେ ଏହି ବ୍ୟାଟ୍ସମ୍ୟାନ୍ ସବୁବେଳେ ନିଜର କ୍ଲାସ୍ ଦେଖାଇଥାନ୍ତି । ଏହି 30 ବର୍ଷୀୟ ବ୍ୟାଟ୍ସମ୍ୟାନ୍ ଗତ ଦୁଇ ଋତୁରେ ପ୍ରଚୁର ରନ୍ ସ୍କୋର କରିଥିଲେ ଏବଂ ଦଳର ଏକ ବୃହତ୍ ସ୍ତମ୍ଭ ଅଟନ୍ତି । ମିଳିତ ଭାବରେ, ଏହି ଯୋଡିର LSG କୁ ଏକ ସ୍ଥିର ଆରମ୍ଭ ଦେବାର କ୍ଷମତା ରଖିଛି ।

ମିଡିଲ୍ ଅର୍ଡରରେ କାରିବିଆନ୍ ଷ୍ଟାର୍:

ଗତ ଋତୁରେ LSG ର ଏକ ଶକ୍ତିଶାଳୀ ମଧ୍ୟମ ଅର୍ଡର ରହିଥିଲା । ସେହି ସେଟଅପରେ ଦୀପକ ହୁଡା ଏକ ମୂଳଦୁଆ ହୋଇଥିବା ବେଳେ କ୍ରୁନାଲ ପାଣ୍ଡ୍ୟା, ମନନ ଭୋରା ଏବଂ ମାର୍କସ ଷ୍ଟୋଇନିସଙ୍କ ପରି ଏହି ଭୂମିକା ଗ୍ରହଣ କରିଥିଲେ। ଷ୍ଟୋଇନିସ୍ ଜଣେ ବିସ୍ଫୋରକ ଟି-20 ଖେଳାଳି ।

ସେହିପରି ଯୁବ ଆୟୁଷ ବାଡୋନି ମଧ୍ୟ ଗତ ସିଜନରେ କିଛି ସ୍ମରଣୀୟ ନକ୍ ଖେଳି 161 ରନ୍ ସଂଗ୍ରହ କରିଥିଲେ । ତେବେ ଚଳିତଥର ଅକ୍ସନରେ LSG କାଇଲ୍ ମାୟର୍ସ ଏବଂ ନିକୋଲାସ୍ ପୁରନଙ୍କୁ ନିଜ କ୍ୟାମ୍ପରେ ସାମିଲ କରିଛି । ଯାହା ଫଳରେ ବ୍ୟାଟିଂ ୟୁନିଟର ଡେପ୍ଥ ଆହୁରି ଲମ୍ଭା ହୋଇଯାଇଛି ।

ନିମ୍ନ ମଧ୍ୟକ୍ରମ ବି ବେଶ୍ ଶକ୍ତିଶାଳୀ:

ଲକ୍ଷ୍ନୌର ବ୍ୟାଟିଂ ଅର୍ଡର ସେମାନଙ୍କ ନିମ୍ନ ମଧ୍ୟ କ୍ରମରେ ବି ବେଶ୍ ଶକ୍ତିଶାଳୀ ନଜର ଆସୁଛି । ସେମାନଙ୍କ ପାଖରେ କିଛି ଟପ୍ ନଚ୍ ହିଟର୍ ରହିଛନ୍ତି । ଯେଉଁମାନେ ଲମ୍ବା ହ୍ୟାଣ୍ଡଲ୍ ସହିତ ଅପରିଚିତ ନୁହଁନ୍ତି । ରୋମାରିଓ ଶେଫର୍ (T20 SR 149) ଜଣେ ବିନାଶକାରୀ ପାୱାର ହିଟର୍ । ତାଙ୍କ ବ୍ୟତୀତ କୃଷ୍ଣପ୍ପା ଗୋଥମ୍ ଆଉ ଜଣେ ଚମତ୍କାର ହିଟର୍ । ସେହିପରି ଡାନିଏଲ୍ ସାମସ୍ ମଧ୍ୟ ରହିଛନ୍ତି ।

ତେବେ ଲକ୍ଷ୍ନୌ ବ୍ୟାଟିଂ ଗଭୀରତା ଦେଖିଲେ ଟିମ୍ ଏକ ମହାଶକ୍ତି ପରି ନଜର ଆସୁଛି । ଗତ ଋତୁରେ ଶ୍ରେଷ୍ଠ ଦଶଟି ରନ୍ ସଂଗ୍ରହକାରୀଙ୍କ ମଧ୍ୟରୁ ତିନିଜଣ LSG ରୁ ଆସିଥିଲେ । ଏହି ତାଲିକାରେ କେଏଲ ରାହୁଲ (616 ରନ୍) ଦ୍ୱିତୀୟ ସ୍ଥାନରେ ରହିଥିଲେ । ସେହିପରି ତୃତୀୟ ସ୍ଥାନରେ କ୍ୱିଣ୍ଟନ୍ ଡି କକ୍ (508 ରନ୍) ଏବଂ ଦଶମ ସ୍ଥାନରେ ଦୀପକ ହୁଡା (451 ରନ୍) ରହିଥିଲେ ।