କାଲିଠୁ ଜମିବ ଆଇପିଏଲ 2023ର ଆସର: ଜାଣନ୍ତୁ, ଏଥର କଣ ସବୁ ନୂଆ ?

Updated: Thursday, March 30, 2023, 21:11 [IST]

IPL 2023 Starts Tomorrow: ଆସନ୍ତାକାଲି ( ମାର୍ଚ୍ଚ 31, ଶୁକ୍ରବାର)ଠୁ ଆରମ୍ଭ ହେବାକୁ ଯାଉଛିବିଶ୍ୱର ବିତ୍ତଶାଳି ଲିଗ୍ ଆଇପିଏଲ 2023 । ଭାରତରେ କ୍ରିକେଟ୍ ପର୍ବ ଭାବେ ପରିଗଣିତ ହେଉଥିବା ଆଇପିଏଲର ଏହା ହେବ 16ତମ ସିଜନ୍ ।

ତେବେ ଚଳିତ ସିଜନର ପ୍ରଥମ ମ୍ୟାଚ ଚେନ୍ନାଇ ସୁପର କିଙ୍ଗ୍ସ ଓ ଡିଫେଣ୍ଡିଂ ଚାମ୍ପିଅନ୍ସ ଗୁଜୁରାଟ ଟାଇଟାନ୍ସ ମଧ୍ୟରେ ଖେଳାଯିବ । ଏହି ମ୍ୟାଚ ଅମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଅନୁଷ୍ଠିତ ହେବ । ସନ୍ଧ୍ୟା 7:30 ରେ ଆରମ୍ଭ ହେବା ମ୍ୟାଚ । ଏଥିପାଇଁ ସବୁ ପ୍ରକାରର ପ୍ରସ୍ତୁତି ଶେଷ ହୋଇଛି ।

ଗୁଜରାଟ ଗତବର୍ଷ ଆଇପିଏଲରେ ଡେବ୍ୟୁ କରିବା ସହ ଚାମ୍ପିୟନ ହୋଇଥିଲା । ଚେନ୍ନାଇ ଗତ ସଂସ୍କରଣରେ ଗୁଜରାଟକୁ ଭେଟିଥିଲେ ମଧ୍ୟ ଦଳକୁ ହାରିବାକୁ ପଡ଼ିଥିଲା। ତେଣୁ ହାର୍ଦ୍ଦିକ ପାଣ୍ତ୍ୟାଙ୍କ ଗୁଜରାଟ ଠାରୁ ଚେନ୍ନାଇ ଏଥର ପ୍ରତିଶୋଧ ନେବାକୁ ଲକ୍ଷ୍ୟ ରଖିଛି । ଅନ୍ୟପଟେ ଚେନ୍ନାଇ ସୁପର କିଙ୍ଗ୍ସ ମଧ୍ୟ ଚାରିଥର ଆଇପିଏଲ୍ ଚାମ୍ପିୟନ । ଏଥର ଅନେକ ବିସ୍ଫୋରକ ଖେଳାଳି ଚେନ୍ନାଇ ସୁପର କିଙ୍ଗ୍ସ ଦଳରେ ଯୋଗ ଦେଇଛନ୍ତି ।

ନୂଆ କଣ ?

ତେବେ ଆଇପିଏଲ 2023 ଚଳିତ ଥର ଦେଶର ଭିନ୍ନ ଭିନ୍ନ 10ଟି ସ୍ଥାନରେ ଆୟୋଜିତ ହେବ । କୋଭିଡ଼ ମହାମାରୀ ପରେ ଏହା ପ୍ରଥମ ଥର ପାଇଁ ଦେଶର ବିଭିନ୍ନ ସ୍ଥାନରେ ଆୟୋଜିତ ହେବକୁ ଯାଉଛି । ସମସ୍ତ 10ଟି ଦଳ ନିଜ ନିଜର ହୋମ ଗ୍ରାଉଣ୍ଡରେ ଓ ବିପକ୍ଷ ଗ୍ରାଉଣ୍ଡରେ ମ୍ୟାଚ ଖେଳିବେ । ତେବେ ଚଳିତଥର ଦୁଇଟି ଅଧିକ ଅର୍ଥାତ 12ଟି ଗ୍ରାଉଣ୍ଡରେ ଖେଳାଯିବ ଆଇପିଏଲ ।

2020 ଏବଂ 2021 ମସିହାରେ ୟୁଏଇରେ ଏହି ଟୁର୍ଣ୍ଣାମେଣ୍ଟ ଆୟୋଜିତ ହୋଇଥିଲା । ସେହିପରି ଗତବର୍ଷ ଗ୍ରୁପ୍ ପର୍ଯ୍ୟାୟ ମ୍ୟାଚ୍ କେବଳ ମୁମ୍ବାଇରେ ସୀମିତ ରହିଥିବା ବେଳେ ପ୍ଲେ ଅଫ୍ ଏବଂ ଫାଇନାଲ୍ ଯଥାକ୍ରମେ କୋଲକାତା ଏବଂ ଅହମ୍ମଦାବାଦରେ ଖେଳା ଯାଇଥିଲା । ଦେଶର ସମସ୍ତ ପ୍ରାନ୍ତକୁ ଆଇପିଏଲ୍ ପ୍ରତ୍ୟାବର୍ତ୍ତନ ପ୍ରଶଂସକ ଏବଂ ଫ୍ରାଞ୍ଚାଇଜ୍ ପାଇଁ ଏକ ବଡ଼ କଥା ହେବ ।

କେଉଁଠି କାହାର ହୋମ ଗ୍ରାଉଣ୍ଡ ?

ଇଡେନ ଗାର୍ଡେନସ- କୋଲକାତା ନାଇଟ ରାଇଡର୍ସ
ଏମ ଚିଦାମ୍ବରମ ଷ୍ଟାଡିମ- ଚେନ୍ନାଇ ସୁପର କିଙ୍ଗ୍ସ
ଅଟଳ ବିହାରୀ ବାଜପେୟୀ ଇକନା କ୍ରିକେଟ ଷ୍ଟାଡିୟମ- ଲକ୍ଷ୍ନୌ ସୁପର ଜିଆଣ୍ଟସ
ରାଜୀବ ଗାନ୍ଧି ଅନ୍ତର୍ଜାତୀୟ ଷ୍ଟାଡିୟମ- ସନରାଇଜର୍ସ ହାଇଦ୍ରାବାଦ
ଅରୁଣ ଜେଟଲୀ ଷ୍ଟାଡିୟମ- ଦିଲ୍ଲୀ କ୍ୟାପିଟାଲ୍ସ
ୱାଙ୍ଖେଡେ ଷ୍ଟାଡିୟମ- ମୁମ୍ବାଇ ଇଣ୍ଡିଆନ୍ସ
ନରେନ୍ଦ୍ର ମୋଦି ଷ୍ଟାଡିୟମ- ଗୁଜରାଟ ଟାଇଟନ୍ସ
ଏମ ଚିନ୍ନାସ୍ୱାମୀ ଷ୍ଟାଡିୟମ- ରୟାଲ ଚ୍ୟାଲେଞ୍ଜର୍ସ ବାଙ୍ଗଲୋର

ଏହା ବ୍ୟତିତ ରାଜସ୍ଥାନ ରୟାଲ୍ସର ଦୁଇଟି ହୋମ ଗ୍ରାଉଣ୍ଡ ରହିଛି । ଗୋଟିଏ ହେଲା ଜୟପୁରର ସୱାଇ ମାନସିଂହ ଷ୍ଟାଡିୟମ ଓ ଗୌହାଟୀର ବର୍ଷାପରା ଷ୍ଟାଡିୟମ। ଜୟପୁରରେ 5ଟି ଓ ଗୌହାଟୀରେ 2ଟି ମ୍ୟାଚ୍‌ ଖେଳାଯିବ। ସେହିପରି ପଞ୍ଜାବ କିଙ୍ଗ୍ସ ର ଦୁଇଟି ହୋମ ଗ୍ରାଉଣ୍ଡ ହେଲା ମୋହାଲିରେ ଥିବା ଆଇଏସ୍‌ ବିନ୍ଦ୍ରା ଷ୍ଟାଡିୟମ ଓ ଧର୍ମଶାଳାରେ ଥିବା ହିମାଚଳପ୍ରଦେଶ ଆସୋସିଏସନ ଷ୍ଟାଡିୟମ। ମୋହାଲିରେ 5ଟି ଓ ଧର୍ମଶାଲାରେ 2ଟି ଆଇପିଏଲ ମ୍ୟାଚ୍‌ ପଞ୍ଜାବ ଖେଳିବ ।

ଘରେ ପ୍ରଥମଥର ଖେଳିବ ଲକ୍ଷ୍ନୌ

ତେବେ ଲକ୍ଷ୍ନୌ ସୁପର ଜିଆଣ୍ଟସ୍ ହେଉଛି ଏକମାତ୍ର ଦଳ ଯିଏକି ଏପର୍ଯ୍ୟନ୍ତ ନିଜ ଗ୍ରାଉଣ୍ଡରେ ଆଇପିଏଲ୍ ମ୍ୟାଚ୍ ଖେଳି ନାହାଁନ୍ତି । ପ୍ରଥମ ଥର ପାଇଁ ସେମାନେ ନିଜ ଘରୋଇ ସମର୍ଥନ ଏବଂ ଘରୋଇ ଗ୍ରାଉଣ୍ଡର ସ୍ୱାଦ ପାଇବେ । କେଏଲ୍ ରାହୁଲଙ୍କ ନେତୃତ୍ୱାଧୀନ ଦଳ ଏପ୍ରିଲ୍ 1 ତାରିଖରେ ଦିଲ୍ଲୀ କ୍ୟାପିଟାଲ୍ସ ବିପକ୍ଷରେ ନିଜ ହୋମ୍ ଗ୍ରାଉଣ୍ଡରେ ଡେବ୍ୟୁ କରିବ। LSG ଫ୍ରାଞ୍ଚାଇଜ୍ ଗତ ସିଜନରେ ମୁମ୍ବାଇ ଏବଂ କୋଲକାତାରେ ସେମାନଙ୍କର ମ୍ୟାଚ୍ ଖେଳିଥିଲା ।

ବଦଳିଛି ଲାଇଭ୍ ଷ୍ଟ୍ରିମିଂ ଡେଷ୍ଟିନେସନ

ସେପଟେ ବଦଳିଛି ଆଇପିଏଲର ଲାଇଭ୍ ଷ୍ଟ୍ରିମିଂ ଡେଷ୍ଟିନେସନ । ଆପଣଙ୍କୁ ମୋବାଇଲରେ ଆଇପିଏଲର ଲାଇଭ୍ ଷ୍ଟ୍ରିମିଂ ଦେଖିବା ପାଇଁ ଡିଜନି + ହଟଷ୍ଟାର ବଦଳରେ ଜିଓ ସିନେମାକୁ ଯିବାକୁ ପଡିବ । ଯଦିଓ ଷ୍ଟାର୍ ସ୍ପୋର୍ଟସ୍ ନେଟୱାର୍କ ଟିଭିରେ ଟେଲିକାଷ୍ଟ ଯୋଗାଇବ । ତେବେ ମୋବାଇଲରେ ଆଇପିଏଲ୍ ଲାଇଭ୍ ଷ୍ଟ୍ରିମିଂ ପାଇଁ ଆପଣଙ୍କୁ କୌଣସି ମେମ୍ବରସିପ୍ ନେବୀକୁ ପଡିବ ନାହିଁ । ଏହା ମଧ୍ୟ ପ୍ରଥମ ଥର ପାଇଁ ଆଇପିଏଲ୍ ମ୍ୟାଚରେ 4K ଭିଡିଓ ରିଜୋଲ୍ୟୁସନ୍ ହେବ । ଯାହା ଫଳରେ ଷ୍ଟ୍ରିମିଂ ସମୟରେ ପ୍ରଶଂସକମାନେ ଅଧିକ ଉଚ୍ଚ ମାନର ଭିଡିଓ ଉପଭୋଗ କରିପାରିବେ ।

ଇମ୍ପାକ୍ଟ ପ୍ଲେୟାର

ଆଇପିଏଲ୍ ଇତିହାସରେ ପ୍ରଥମ ଥର ପାଇଁ ଏକ ଦଳ ମ୍ୟାଚ୍ ରେ ଏକ ଇମ୍ପାକ୍ଟ ପ୍ଲେୟାର ଭାବରେ ଏକ ବଦଳ ଖେଳାଳି ଫିଲ୍ଡ କରିପାରିବ । ଇମ୍ପାକ୍ଟ ପ୍ଲେୟାର ହେଉଛି ଏକ ଖେଳାଳି, ଯାହା ପ୍ରତ୍ୟେକ ଦଳ ସେମାନଙ୍କ ମ୍ୟାଚ୍ ପୂର୍ବରୁ ଏକ ବିକଳ୍ପ ତାଲିକାରୁ ବାଛି ପାରିବେ । ଯିଏ ମ୍ୟାଚ୍ ସମୟରେ ଯେକୌଣସି ସମୟରେ ଅନ୍ୟ ଖେଳାଳିଙ୍କ ବଦଳରେ ଆସିପାରିବେ । କାରଣ ଏହି ନୂତନ ନିୟମର ପ୍ରବର୍ତ୍ତନ ସହିତ ମ୍ୟାଚଗୁଡ଼ିକର ଗତିଶୀଳତା ବୃଦ୍ଧି ପାଇବ । କିନ୍ତୁ ଏକ ପ୍ରଭାବ ଖେଳାଳି କେବଳ ଜଣେ ଭାରତୀୟ ଖେଳାଳି ହୋଇପାରିବେ ।

ଗ୍ରୁପ୍ ପର୍ଯ୍ୟାୟ ମ୍ୟାଚରେ ଅଦଳ ବଦଳ

10 ଟି ଆଇପିଏଲ୍ ଦଳକୁ ଦୁଇଟି ଦଳରେ ବିଭକ୍ତ କରାଯାଇଛି ।

ଗ୍ରୁପ୍ ଏ: ମୁମ୍ବାଇ ଇଣ୍ଡିଆନ୍ସ , ରାଜସ୍ଥାନ ରୟାଲ୍ସ , କୋଲକାତା ନାଇଟ୍ ରାଇଡର୍ସ, ଦିଲ୍ଲୀ କ୍ୟାପିଟାଲ୍ସ, ଲକ୍ଷ୍ନୌ ସୁପର ଜଏଣ୍ଟସ୍ ।
ଗ୍ରୁପ୍ ବି: ଚେନ୍ନାଇ ସୁପର କିଙ୍ଗ୍ସ , ପଞ୍ଜାବ କିଙ୍ଗ୍ସ , ସନରାଇଜର୍ସ ହାଇଦ୍ରାବାଦ , ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର , ଗୁଜୁରାଟ ଟାଇଟାନ୍ସ ।

ତେବେ ପୂର୍ବବର୍ଷ ସମାନ ଗ୍ରୁପର ଦଳ ପରସ୍ପର ସହିତ ଦୁଇଥର, ଅନ୍ୟ ଗ୍ରୁପର ଗୋଟିଏ ଦଳ ସହିତ ଦୁଇଥର ଓ ଅବଶିଷ୍ଟ ଚାରିଟି ଦଳ ବିରୁଦ୍ଧରେ ଗୋଟିଏ ମ୍ୟାଚ୍ ଖେଳୁଥିଲେ । କିନ୍ତୁ ଏହା ଚଳିତ ବର୍ଷ ଓଲଟା ହୋଇଛି । ଯେହେତୁ ଗ୍ରୁପ୍ ଏ ର ଦଳଗୁଡିକ ଗ୍ରୁପ୍ ବି ର ସମସ୍ତ ଦଳ ବିରୁଦ୍ଧରେ ଦୁଇଥର ଖେଳିବେ ଏବଂ ସେମାନେ ନିଜ ଦଳର ଅବଶିଷ୍ଟ ଚାରିଟି ଦଳ ବିରୁଦ୍ଧରେ ଗୋଟିଏ ମ୍ୟାଚ ଖେଳିବେ ।