ଆଇପିଏଲ 2023: ଗୁଜୁରାଟକୁ ମାତ୍ ଦେଇ ପ୍ରଥମ ଫାଇନାଲିଷ୍ଟ ବନିଲା ଚେନ୍ନାଇ

Published: Tuesday, May 23, 2023, 23:27 [IST]

IPL 2023 Qualifier-1, CSK vs GT: ଚେନ୍ନାଇର ଏମ ଚିଦାମ୍ବରମ୍ ଷ୍ଟାଡିୟମରେ ଖେଳା ଯାଇଥିବା ଆଇପିଏଲ 2023ର ପ୍ରଥମ କ୍ୱାଲିଫାୟର ମ୍ୟାଚରେ ଗୁଜୁରାଟକୁ ମାତ୍ ଦେଇ ପ୍ରଥମ ଫାଇନାଲିଷ୍ଟ ବନିଛି ଚେନ୍ନାଇ ସୁପରକିଙ୍ଗ୍ସ ।

ଟସ୍ ହାରି ପ୍ରଥମେ ବ୍ୟାଟିଂ ଆମନ୍ତ୍ରଣ ପାଇଥିବା ଚେନ୍ନାଇ ଦୁଇ ଓପନର ଋତୁରାଜ ଗାଇକୱାଡ ଓ ଡେଭିନ୍ କନୱେଙ୍କ ଚମତ୍କାର ଆରମ୍ଭ ବଳରେ ଡିଫେଣ୍ଡିଂ ଚମ୍ପିୟନ ଗୁଜାରାଟ୍ ଟାଇଟନ୍ସ ଆଗରେ ମାତ୍ର 173 ରନର ଟାର୍ଗେଟ୍ ଠିଆ କରିଥିଲା । ତେବେ ଟାର୍ଗେଟକୁ ଗୋଡାଇ ନିର୍ଦ୍ଧାରିତ 20 ଓଭରରେ ମାତ୍ର 157 ରନ କରିପାରିଲା ଗୁଜୁରାଟ୍ । ଫଳରେ 15 ରନରେ ମ୍ୟାଚ ଜିତି ଚଳିତ ଆଇପିଏଲ ସିଜିନର ପ୍ରଥମ ଫାଇନାଲିଷ୍ଟ ବନିଛି ଚେନ୍ନାଇ ।

ପ୍ରଥମେ ବ୍ୟାଟିଂ କରିଥିବା ଚେନ୍ନାଇର ଦୁଇ ଓପନର ଡେଭିନ୍ କନୱେ ଓ ଋତୁରାଜ ଗାଇକୱାଡ ଦଳକୁ ଏକ ଦୃଢ ଆରମ୍ଭ ଦେଇଥିଲେ । ଋତୁରାଜ ଗାଇକୱାଡ 44 ବଲରେ 60 ରନ୍ ସହ ଦଳ ପାଇଁ ସର୍ବାଧିକ ସ୍କୋର କରିଥିଲେ। ଏହି ସମୟରେ ଗାଇକୱାଡ 7 ଚୌକା ଓ ଗୋଟିଏ ଛକା ମାରିଥିଲେ । ମୋହିତ ଶର୍ମା ଋତୁରାଜ ଗାଇକୱାଡଙ୍କ ୱିକେଟ୍ ନେଇ ଗୁଜରାଟକୁ ପ୍ରଥମ ସଫଳତା ଦେଇଥିଲେ । ଡେଭିଡ ମିଲରଙ୍କ ଦ୍ୱାରା ଋତୁରାଜ ଗାଇକୱାଡଙ୍କୁ ଧରାଇ ମୋହିତ ଚେନ୍ନାଇକୁ ଏକ ବଡ଼ ଝଟକା ଦେଇଥିଲେ ।

ଚଳିତ ସିଜନରେ ବ୍ୟାଟ୍ ସହ ଚେନ୍ନାଇ ପାଇଁ କ୍ରମାଗତ ପ୍ରଦର୍ଶନ କରିଥିବା ଶିବମ୍ ଦୁବେ ଏହି ମ୍ୟାଚ୍ ରେ ଫ୍ଲପ୍ ହୋଇଥିଲେ । ତିନି ବଲରେ ଗୋଟିଏ ରନ୍ ସ୍କୋର କରିବା ପରେ ଦୁବେ ଆଉଟ୍ ହୋଇଥିଲେ । ନୁର ଅହମ୍ମଦ କ୍ଲିନ୍ ଦୁବେଙ୍କୁ ବୋଲିଂ କରି ପାଭିଲିୟନକୁ ପଠାଇଲେ । ଚଳିତ ସିଜନରେ ତାଙ୍କର ପ୍ରଥମ ମ୍ୟାଚ୍ ଖେଳିଥିବା ଦର୍ଶନ ନାଲକାଣ୍ଡେ ଅଜିଙ୍କ୍ୟ ରାହାଣେଙ୍କ ୱିକେଟ୍ ନେଇଥିଲେ।

ସେହିପରି ଅମ୍ବାତି ରାୟିଡୁ 9 ବଲରୁ 17 ରନ ଓ ରବିନ୍ଦର ଜାଡେଜା 16 ବଲରୁ 22 ରନ ସ୍କୋର କରିଥିଲେ । ଧୋନି ମଧ୍ୟ ସେମିତି କିଛି ଖାସ୍ ପ୍ରଦର୍ଶନ କରି ପାରିନଥିଲେ । ସେ ଦୁଇଟି ବଲ ଖେଳି 1 ରନ କରି ପାଭିଲିୟନ ଫେରିଥିଲେ । ଏହାପରେ ମୋଇନ ଅଲ୍ଲି 4 ବଲରୁ 9 ରନ କରି ଅପରାଜିତ ରହିଥିଲେ । ଗୁଜୁରାଟ୍ ପାଇଁ ମହମ୍ମଦ ଶାମି ଓ ମୋହିତ ଶର୍ମା ଦୁଇଟି ଲେଖାଏଁ ୱିକେଟ୍ ନେଇଥିବା ବେଳେ ଦର୍ଶନ ନାଲକଣ୍ଡେ, ରସିଦ ଖାନ ଓ ନୁର୍ ଅହମ୍ମଦ ଗୋଟିଏଁ ଲେଖାଏଁ ୱିକେଟ୍ ନେଇଥିଲେ ।

ପରେ ଟାର୍ଗେଟ୍ କୁ ପିଛା କରୁଥିବା ଡିଫେଣ୍ଡିଂ ଚାମ୍ପିଅନ ଗୁଜୁରାଟ୍ ଭଲ ଆରମ୍ଭ ଦେଇ ପାରିନଥିଲେ ଦୁଇ ଓପନର ଶୁଭମନ ଗିଲ୍ ଓ ରିଦ୍ଧିମାନ ଶାହା । 11 ବଲରୁ 12 ରନ କରି ଆଉଟ୍ ହୋଇଥିଲେ ଶାହା । ଅନ୍ୟପଟେ ୱିକେଟ ରକ୍ଷା ପାଇଁ ଖୁବ ସଜାଗର ସହ ଖେଳିଥିବା ଶୁଭମନ 38 ବଲରୁ ମାତ୍ର 42 ରନ ସଂଗ୍ରହ କରି ପାରିଥିଲେ । ତାଙ୍କ ବ୍ୟତିତ ଅନ୍ୟ କୌଣସି ଖେଳାଳି ବଡ ସ୍କୋର କରି ପାରିନଥିଲେ । ଶେଷ ଆଡକୁ ରସିଦ ଖାନ 16 ବଲରୁ ଦୃତ 30 ରନ ସ୍କୋର କରିଥିଲେ ମଧ୍ୟ ଦଳକୁ ବିଜୟ ଦେବାରେ ସକ୍ଷମ ହୋଇପାରି ନଥିଲେ ।
ଚେନ୍ନାଇ ପକ୍ଷରୁ ଦୀପକ ଚହର, ମହେଶ ତୀକ୍ଷଣା ଓ ରବିନ୍ଦ୍ର ଜାଡେଜା ଦୁଇଟି ଲେଖାଏଁ ୱିକେଟ୍ ନେଇଥିଲେ ।

Published On May 23, 2023