ଭାରତ-ୱେଷ୍ଟଇଣ୍ଡିଜ୍ ପ୍ରଥମ ଟେଷ୍ଟ, 162 ରନ‌ରେ ଭାରତ ଆଗୁଆ

Updated: Friday, July 14, 2023, 10:47 [IST]

ଡୋମିନିକା: ଯୁବ ତାରକା ବ୍ୟାଟର ଯଶସ୍ବୀ ଜୈସ୍ବାଲ ଓ ଅଧିନାୟକ ରୋହିତ ଶର୍ମାଙ୍କ ଚମତ୍କାର ଶତକୀୟ ପାଳି ବଳରେ ଭାରତ ୱେଷ୍ଟଇଣ୍ଡିଜ ବିପକ୍ଷ ପ୍ରଥମ ଟେଷ୍ଟରେ ଦୃଢ ସ୍ଥିତିରେ ରହିଛି । ପ୍ରଥମ ପାଳିରେ ଭାରତ 162 ରନରେ ଆଗୁଆ ରହିଛି । ପ୍ରଥମ ଦିବସରେ ଘ‌ରୋଇ ଦଳ ମାତ୍ର 150 ରନ‌ରେ ସମସ୍ତ ୱିକେଟ୍ ହରାଇଥିଲା । ଜବାବରେ ଦ୍ୱିତୀୟ ଦିନରେ ଭାରତ 312ରେ ଦୁଇ ୱିକେଟ୍‌ ହରାଇଛି । ଅଧିନାୟକ ରୋହିତ ଶର୍ମା ଏବଂ ପଦାର୍ପଣକାରୀ ଯଶସ୍ୱୀ ଜୟସଓ୍ୱାଲ୍‌ଙ୍କ ଦ୍ବିଶତକ ଭାଗୀଦାରି କରିଛନ୍ତି ।

ଏହି ଶତକ ସହ ଜୟସଓ୍ୱାଲ ଅନେକ ମାଇଲଖୁଣ୍ଟରେ ସାମିଲ ହୋଇଛନ୍ତି। ଟେଷ୍ଟ ପଦାର୍ପଣରେ ଓପନର୍‌ ଭାବେ ଶତକ ଅର୍ଜନ କରିବା‌ରେ ସେ ତୃତୀୟ ଭାରତୀୟ ହୋଇଛନ୍ତି । ଜୟସଓ୍ୱାଲ୍‌ 143ରେ ଅପରାଜିତ ଥିବା ବେଳେ ବିରାଟ କୋହଲି 36 ରନ କରି କ୍ରିଜରେ ଅଛନ୍ତି ।

ଦ୍ବିତୀୟ ଦିନ ବିନା ୱିକେଟରେ 80ରନରୁ ଖେଳ ଆରମ୍ଭ କରିଥିଲା ଭାରତ । ଦୁଇ ଓପନର ଦର୍ଶନୀୟ ସଟ ଖେଳି ଭାରତୀୟ ରନ ଗାଡିକୁ ଆଗକୁ ନେଇଥିଲେ । ଲଞ୍ଚ ବ୍ରେକ ପୂର୍ବରୁ ଭାରତର ସ୍କୋର 146 ରହିଥିଲା । 68.6 ଓଭରରେ ଶତକ ହାସଲ କରିଥିଲେ ଯଶସ୍ବୀ । ଏହା ପରେ 72 ଓଭରରେ ରୋହିତ ଶର୍ମା ଶତକ ହାସଲ କରିଥିଲେ । ଏହା ପରେ ଦଳୀୟ ସ୍କୋର 229ରେ ପହଞ୍ଚିଥିଲା । 75ତମ ଓଭରରେ ରୋହିତ ବ୍ୟକ୍ତିଗତ 221 ବଲରୁ 103 ରନ କରି ଏଲିକ ଆଥାଞ୍ଜିଙ୍କ ଶିକାର ହୋଇଥିଲେ । ଏହା ପରେ ତୃତୀୟ ନମ୍ବରରେ ବ୍ୟାଟିଂ କରିବାକୁ ଆସିଥିଲେ ଶୁଭମନ ଗିଲ୍‌ । ପୂଜାରାଙ୍କ ସ୍ଥାନ ନେଇ ଗିଲ ସଫଳ ହୋଇନଥିଲେ । ମାତ୍ର 6 ରନ କରି ଆଉଟ ହୋଇଥିଲେ ଶୁଭମନ । ଏହାପରେ ବ୍ୟାଟିଂ କରିବାକୁ ଆସିଥିଲେ ବିରାଟ କୋହଲି ।