ଆଜି ଭାରତ-ଦକ୍ଷିଣ ଆଫ୍ରିକା ତୃତୀୟ ଦିନିକିଆ, ସିରିଜ୍ କବାଜ ଲକ୍ଷ୍ୟରେ ଉଭୟ ଟିମ୍
ପ୍ରଥମ ମ୍ୟାଚ୍ରେ ଭାରତ ଜିତିଥିବା ବେଳେ ୨ୟ ମୁକାବିଲାରେ ରୋମାଞ୍ଚକର ବିଜୟ ହାସଲ କରିଥିଲା ଦକ୍ଷିଣ ଆଫ୍ରିକା । ସିରିଜ୍ ଏବେ ୧-୧ରେ ବରାବର ରହିଛି । ଆଜି ୩ୟ ତଥା ଅନ୍ତିମ ଦିନିକିଆ ମ୍ୟାଚ୍ ଖେଳାଯିବ । ଯାହାକି ଉଭୟ ଦଳ ପାଇଁ କର ବା ମର ସ୍ଥିତିରେ ରହିଛି । ପ୍ରଥମ ଦୁଇଟି ଯାକ ମୁକାବିଲା ହାଇ ସ୍କୋରିଂ ରହିଥିବା ବେଳେ ୩ୟ ମ୍ୟାଚ୍ ବି ସେହିଭଳି ହେବା ନେଇ ଆଶା କରାଯାଉଛି । ତେବେ ୩ୟ ଦିନିକିଆରେ ଭାରତୀୟ ଦଳର ଚୂଡାନ୍ତ ଏକାଦଶ ବା ପ୍ଲେଇଂ ଇଲେଭେନ୍ କିଭଳି ରହିବ? ତାହା ଉପରେ ସମସ୍ତଙ୍କର ନଜର ରହିଛି।
ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ୩ୟ ଦିନିକିଆ ମୁକାବିଲା ବିଶାଖାପାଟଣାରେ ଖେଳାଯିବ । ପ୍ରଥମ ଓ ଦ୍ବିତୀୟ ଦିନିକିଆ ଭଳି ୩ୟ ମୁକାବିଲା ବି ହାଇ ସ୍କୋରିଂ ମୁକାବିଲା ହେବା ନେଇ ଆଶା କରାଯାଉଛି । ଲୋକେସ ରାହୁଲଙ୍କ ନେତୃତ୍ବରେ ଟିମ୍ ଇଣ୍ଡିଆ ପଡିଆକୁ ଓହ୍ଲାଇବ । ରୋହିତ ଶର୍ମା ଏବଂ ଯଶସ୍ବୀ ଜୟସ୍ବାଲ ଓପନିଂ କରିବା ଏକାପ୍ରକାର ନିଶ୍ଚିତ । ଜୟସ୍ବାଲଙ୍କ ଫର୍ମକୁ ନେଇ ଦଳ ସାମାନ୍ୟ ଚିନ୍ତାରେ ଥିବା ବେଳେ ରୋହିତ ପ୍ରଥମ ମ୍ୟାଚ୍ରେ ଅର୍ଦ୍ଧଶତକୀୟ ଇନିଂସ ଖେଳିଥିଲେ ।
ସେହିଭଳି ବ୍ୟାକ୍ ଟୁ ବ୍ୟାକ୍ ଶତକ ମାରି ସମାଲୋଚକଙ୍କ ମୁହଁ ବନ୍ଦ କରିଦେଇଛନ୍ତି ବିରାଟ କୋହଲି । ସେ ୩ୟ ସ୍ଥାନରେ ବ୍ୟାଟିଂ କରିବେ । ସେହିଭଳି ୨ୟ ମୁକାବିଲାରେ ଧମାକାଦାର ଶତକ ହାସଲ କରିଥିବା ଋତୁରାଜ ଗାୟକ୍ବାଡ ୪ର୍ଥ ସ୍ଥାନରେ ବ୍ୟାଟିଂ କରିବା ନିଶ୍ଚିତ । ଅଧିନାୟକ ଲୋକେସ ରାହୁଲ ୫ମ ସ୍ଥାନରେ ଖେଳିବାକୁ ଆସିବେ । ୨ୟ ମ୍ୟାଚ୍ରେ ଦର୍ଶନୀୟ ଅର୍ଦ୍ଧଶତକ ହାସଲ କରିଥିଲେ ଲୋକେସ ରାହୁଲ । ସେହିଭଳି ଅତିରିକ୍ତ ଜଣେ ବ୍ୟାଟରଙ୍କୁ ଖେଳାଇପାରେ ଭାରତ ।
ତିଲକ ବର୍ମାଙ୍କୁ ଶେଷ ଦିନିକିଆରେ ମିଳିପାରେ ସୁଯୋଗ । ଓ୍ବାଶିଂଟନ ସୁନ୍ଦରଙ୍କୁ ବାଦ୍ ଦେଇ ତିଲକ ବର୍ମାଙ୍କୁ ପ୍ଲେଇଂ ଇଲେଭେନରେ ସାମିଲ କରାଯାଇପାରେ । ଅଲରାଉଣ୍ଡର ରବିନ୍ଦ୍ର ଜାଡେଜାଙ୍କ ସହ ନୀତିଶ କୁମାର ରେଡ୍ଡୀ ନଜର ଆସିପାରନ୍ତି । ୨ୟ ମୁକାବିଲା ଖରାପ ବୋଲିଂ କରିଥିବା ପ୍ରସିଦ୍ଧ କ୍ରିଷ୍ଣାଙ୍କୁ ବାଦ୍ ଦିଆଯାଇ ତାଙ୍କ ସ୍ଥାନରେ ନୀତିଶଙ୍କୁ ମିଳିପାରେ ସୁଯୋଗ । ସେହିଭଳି ମୁଖ୍ୟ ସ୍ପିନର ଭାବେ କୁଲଦୀପ ଯାଦବ ଦଳରେ ରହିବେ । ଦ୍ରୁତ ବୋଲର ଭାବେ ହର୍ଷିତ ରାଣା ଏବଂ ଅର୍ଶଦୀପ ସିଂହଙ୍କୁ ପ୍ଲେଇଂ ଇଲେଭେନରେ ସ୍ଥାନ ମିଳିବ ।
ଭାରତର ସମ୍ଭାବ୍ୟ ଏକାଦଶ: ଯଶସ୍ବୀ ଜୟସ୍ବାଲ, ରୋହିତ ଶର୍ମା, ବିରାଟ କୋହଲି, ଋତୁରାଜ ଗାୟକ୍ବାଡ, ଲୋକେସ ରାହୁଲ (ଅଧିନାୟକ), ରବିନ୍ଦ୍ର ଜାଡେଜା, ନୀତିଶ ରେଡ୍ଡୀ, ହର୍ଷିତ ରାଣା, କୁଲଦୀପ ଯାଦବ ଏବଂ ଅର୍ଶଦୀପ ସିଂହ।
Click it and Unblock the Notifications
Sign in with Google