Ind vs Eng Lords Test: ଟସ୍‌ ଜିତିଲା ଇଂଲଣ୍ଡ, ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି

ଭାରତ ଏବଂ ଇଂଲଣ୍ଡ ମଧ୍ୟରେ ୫ ମ୍ୟାଚ ବିଶିଷ୍ଟ ଟେଷ୍ଟ ସିରିଜର ତୃତୀୟ ମ୍ୟାଚ ଆଜିଠାରୁ ଆରମ୍ଭ ହୋଇଛି। ଏହି ମ୍ୟାଚ୍‌ରେ ଇଂଲଣ୍ଡ ଟସ୍‌ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଛି। ଏହି ମ୍ୟାଚ୍‌ରେ ଗୋଟିଏ ପରିବର୍ତ୍ତନ କରାଯାଇଛି। ପ୍ରସିଦ୍ଧ କ୍ରିଷ୍ଣାଙ୍କ ସ୍ଥାନରେ ଜଶପ୍ରୀତ ବୁମ୍‌ରା ଦଳରେ ସାମିଲ ହୋଇଛନ୍ତି।

ଲିଡ୍ସରେ ଖେଳାଯାଇଥିବା ପ୍ରଥମ ମ୍ୟାଚ ଇଂଲଣ୍ଡ ଜିତିଥିଲା। ଭାରତ ବର୍ମିଂହାମରେ ଖେଳାଯାଇଥିବା ଦ୍ୱିତୀୟ ଟେଷ୍ଟ ଜିତି ସିରିଜକୁ ୧-୧ରେ ସମାନ କରିଥିଲା। ଏବେ ଉଭୟ ଦଳ ନେତୃତ୍ୱ ନେବା ଉଦ୍ଦେଶ୍ୟରେ ଲର୍ଡସରେ ଓହ୍ଲାଇଛନ୍ତି। ଭାରତର ଅଧିନାୟକ ଶୁବମନ ଗିଲ ବିସ୍ଫୋରକ ଫର୍ମରେ ଅଛନ୍ତି ଏବଂ ଏହାକୁ ଜାରି ରଖିବାକୁ ଚାହିଁବେ। ଇଂଲଣ୍ଡ ଅଧିନାୟକ ବେନ ଷ୍ଟୋକ୍ସ ଫର୍ମ ଫେରି ପାଇବାକୁ ଚାହିଁବେ।

ଭାରତୀୟ କ୍ରିକେଟର କରୁଣ ନାୟାରଙ୍କ ପାଇଁ ଲର୍ଡସ୍‌ରେ ଆଜି ଆରମ୍ଭ ହେଉଥିବା ତୃତୀୟ ଟେଷ୍ଟ ମ୍ୟାଚ୍ ଏକ ଗୁରୁତ୍ୱପୂର୍ଣ୍ଣ ସମୟ। ୨୦୨୨ ଡିସେମ୍ବରରେ ନାୟାର ତାଙ୍କ ଏକ୍ସ ଆକାଉଣ୍ଟରେ ଲେଖିଥିଲେ, "ପ୍ରିୟ କ୍ରିକେଟ, ମୋତେ ଆଉ ଏକ ସୁଯୋଗ ଦିଅ।" ୩୩ ବର୍ଷୀୟ ଏହି ବ୍ୟାଟର ଘରୋଇ କ୍ରିକେଟରେ ଚମତ୍କାର ପ୍ରଦର୍ଶନ ପରେ ଇଂଲଣ୍ଡ ଗସ୍ତ ପାଇଁ ଭାରତୀୟ ଦଳରେ ସ୍ଥାନ ପାଇଛନ୍ତି। ଇଂଲଣ୍ଡ ଗସ୍ତରେ ଏକ ଟୁର୍ ମ୍ୟାଚରେ ଦୁଇଶତକ ସହ ନିଜର ଦାବିଦାରୀକୁ ଆହୁରି ସୁଦୃଢ଼ କରିଥିଲେ।

କିନ୍ତୁ, ପ୍ରଥମ ଟେଷ୍ଟରେ ନାୟାର ମାତ୍ର ୪ ବଲରେ ଶୂନ୍ୟ ରନରେ ଆଉଟ ହୋଇଥିଲେ ଓ ଦ୍ୱିତୀୟ ଇନିଂସରେ ୫୪ ବଲରେ ୨୦ ରନ କରି ନିରାଶ କରିଥିଲେ। ଦ୍ୱିତୀୟ ଟେଷ୍ଟରେ ମଧ୍ୟ ସେ ପ୍ରଥମ ଇନିଂସରେ ୩୧ ଓ ଦ୍ୱିତୀୟ ଇନିଂସରେ ୨୬ ରନ କରି ବ୍ରାଇଡନ କାର୍ସଙ୍କ ବାଉନ୍ସରରେ ଆଉଟ ହୋଇଥିଲେ। ଏହି ନିରାଶାଜନକ ପ୍ରଦର୍ଶନ ପରେ ସୋସିଆଲ ମିଡିଆରେ ତାଙ୍କୁ ତୀବ୍ର ସମାଲୋଚନାର ସମ୍ମୁଖୀନ ହେବାକୁ ପଡ଼ିଛି।

୨୦୨୪-୨୫ ରଣଜୀ ଟ୍ରଫିରେ ନାୟାର ବିଦର୍ଭ ପାଇଁ ୧୬ ଇନିଂସରେ ୮୬୩ ରନ କରି ୪ଟି ଶତକ ଓ ୨ଟି ଅର୍ଦ୍ଧଶତକ ସହ ଚତୁର୍ଥ ସର୍ବାଧିକ ରନ ସଂଗ୍ରହକାରୀ ଥିଲେ। ବିଜୟ ହଜାରେ ଟ୍ରଫିରେ ସେ ୮ ଇନିଂସରେ ୭୭୯ ରନ କରି ୩୮୯.୫୦ ହାରାହାରି ଓ ୧୨୪.୦୪ ଷ୍ଟ୍ରାଇକ ରେଟରେ ୫ଟି ଶତକ ଓ ଗୋଟିଏ ଅର୍ଦ୍ଧଶତକ ହାସଲ କରିଥିଲେ।

ଲର୍ଡସ୍‌ରେ ତୃତୀୟ ଟେଷ୍ଟରେ ନାୟାରଙ୍କ ପାଇଁ ଏହା ଏକ ମହତ୍ତ୍ୱପୂର୍ଣ୍ଣ ସୁଯୋଗ। ଅଭିମନ୍ୟୁ ଈଶ୍ୱରନ ଓ ସାଇ ସୁଦର୍ଶନ ଭଳି ଯୁବ ଖେଳାଳି ବେଞ୍ଚରେ ଅପେକ୍ଷା କରୁଥିବା ବେଳେ ନାୟାରଙ୍କ ପାଇଁ ଏହା ନିଜର ଦକ୍ଷତା ପ୍ରମାଣ କରିବାର ଶେଷ ସୁଯୋଗ ହୋଇପାରେ। ଦଳ ପରିଚାଳନା ତାଙ୍କୁ ସମର୍ଥନ କରିଥିଲେ ମଧ୍ୟ, କମ୍ ସ୍କୋର ଯୋଗୁଁ ତାଙ୍କ ସ୍ଥାନ ଉପରେ ପ୍ରଶ୍ନ ଉଠୁଛି।

ଲର୍ଡସ୍ ଅନେକ ଖେଳାଳିଙ୍କ ପାଇଁ ସୌଭାଗ୍ୟ ଆଣିଛି। ନାୟାରଙ୍କୁ ଏହି ଐତିହାସିକ ମଞ୍ଚରେ ନିଜର ଶ୍ରେଷ୍ଠତା ପ୍ରଦର୍ଶନ କରି ଭାରତକୁ ସିରିଜରେ ଆଗୁଆ କରିବା ସହ ନିଜ କ୍ୟାରିୟରକୁ ନୂଆ ଦିଗ ଦେବାକୁ ହେବ। ଅନ୍ୟଥା, ତାଙ୍କ ଦ୍ୱିତୀୟ ସୁଯୋଗର ସମୟ ଶେଷ ହୋଇପାରେ।