ଇନ୍ଦୋର ଟେଷ୍ଟ: ଧରାଶାୟୀ ଭାରତୀୟ ବ୍ୟାଟର, ୧୦୯ ରନରେ ଅଲଆଉଟ୍

ବର୍ଡର ଗାଭାସ୍କର ଟ୍ରଫିର ତୃତୀୟ ଟେଷ୍ଟ ମ୍ୟାଚରେ ଘରୋଇ ଭାରତୀୟ ଦଳ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଛି । ପ୍ରଥମ ଦିନରେ କଙ୍ଗାରୁ ଦଳର ବୋଲରଙ୍କ ସାମ୍ନା କରିବାରେ ବିଫଳ ହୋଇଛନ୍ତି ଭାରତୀୟ ବ୍ୟାଟର ।

Published: Wednesday, March 1, 2023, 13:46 [IST]

ଇନ୍ଦୋର: ଆଜିଠୁ ଆରମ୍ଭ ହୋଇଥିବା ଭାରତ ବନାମ ଅଷ୍ଟ୍ରେଲିଆ , ବର୍ଡର ଗାଭାସ୍କର ଟ୍ରଫିର ତୃତୀୟ ଟେଷ୍ଟ ମ୍ୟାଚରେ ଘରୋଇ ଭାରତୀୟ ଦଳ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଛି । ପ୍ରଥମ ଦିନରେ କଙ୍ଗାରୁ ଦଳର ବୋଲରଙ୍କ ସାମ୍ନା କରିବାରେ ବିଫଳ ହୋଇଛନ୍ତି ଭାରତୀୟ ବ୍ୟାଟର । ଲଗାତର ୱିକେଟ ହରାଇ ମାତ୍ର ୧୦୯ ରନ ଅଲଆଉଟ ହୋଇଛି ଟିମ୍ ଇଣ୍ଡିଆ । ଟିମ୍‌ ଇଣ୍ଡିଆର କୌଣସି ବ୍ୟାଟସମ୍ୟାନ ୩୦ ରନ୍‌ କରିପାରି ନାହାନ୍ତି ।

ଆଜିର ମ୍ୟାଚରେ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା ଘରୋଇ ଭାରତୀୟ ଦଳ । ଭାରତର ଚୂଡ଼ାନ୍ତ ଏକାଦଶରେ ୨ଟି ପରିବର୍ତ୍ତନ ହୋଇଥିଲା । କେଏଲ ରାହୁଲଙ୍କ ସ୍ଥାନରେ ଶୁଭମନ ଗିଲ ଓ ମହମ୍ମଦ ସାମିଙ୍କ ସ୍ଥାନରେ ଉମେଶ ଯାଦବ ଖେଳୁଛନ୍ତି । ତେବେ ଭାରତକୁ ଏହି ନିଷ୍ପତ୍ତି ମହଙ୍ଗା ସାବ୍ୟସ୍ତ ହୋଇଛି । ମ୍ୟାଚର ପ୍ରଥମ ଘଣ୍ଟାରେ ହିଁ ଅଧା ଟିମ୍‌ ପାଭେଲିୟନ୍‌ ଫେରିଥିଲା । ଲଞ୍ଚ ବ୍ରେକ୍ ସୁଦ୍ଧା ଭାରତୀୟ ଦଳ ୭ ୱିକେଟ୍‌ ହରାଇ ମାତ୍ର ୮୪ ରନ କରି ପାରିଥିଲା । ଟିମ ଇଣ୍ଡିଆର ବ୍ୟାଟରମାନେ କଙ୍ଗାରୁ ବୋଲିଂ ଆଟାକକୁ ସାମ୍ନା କରିପାରି ନାହାନ୍ତି । ରୋହିତ ଶର୍ମା ୧୨, ଶୁଭମନ୍‌ ଗିଲ୍‌ ୨୧, ଚେତେଶ୍ୱର ପୂଜାରା ୧, ବିରାଟ କୋହଲି ୨୨, ରବିନ୍ଦ୍ର ଜାଡେଜା ୪, ଶ୍ରେୟସ ଆୟର ୦, ଶ୍ରିକର ଭାରତ ୧୭ ରନ୍‌ କରି ପ୍ୟାଭିଲିୟନ୍‌ ଫେରିଥିଲେ ।

ପରେ ଅକ୍ଷର ଓ ଅଶ୍ବିନୀ ସ୍ଥିତି ସମ୍ଭାଳିଥିଲେ । ମାଥ୍ୟୁ କୁନେମାନଙ୍କ ଶିକାର ହୋଇଥିଲେ ଅଶ୍ବିନୀ । ମାତ୍ର ୩ ରନ କରି ଆଉଟ ହୋଇଥିଲେ । ପରେ ପରେ ଉମେଶ ଯାଦବଙ୍କୁ ଏଲବିଡବ୍ଲ୍ୟୁ କରିଥିଲେ ମାଥ୍ୟୁ କୁନେମାନ । ପରେ ମହମ୍ମଦ ସିରାଜ ରନ ଆଉଟ ହୋଇଥିଲେ । ଭାରତ ୧୦୯ ରନ କରି ଆଲଆଉଟ ହୋଇଥିଲା । ମ୍ୟାଚକୁ ଫେରିବାକୁ ହେଲେ ଭାରତକୁ ବୋଲିଂରେ ଭଲ ପ୍ରଦର୍ଶନ କରିବାକୁ ହେବ । ଅଷ୍ଟ୍ରେଲିଆର ମାଥ୍ୟୁ କୁନେମାନ ସର୍ବାଧିକ ୫ଟି, ଲେଏନ ୩ଟି, ମୁର୍ଫି ଗୋଟିଏ ୱିକେଟ ନେଇଛନ୍ତି ।

Published On March 1, 2023