ପ୍ରଥମ ଟି-20: ଡିଫେଣ୍ଡ ହେଲାନି 208 ରନ, ହାରିଲା ଭାରତ

ମଙ୍ଗଳବାର ଖେଳାଯାଇଥିବା ପ୍ରଥମ ଟି-20 ମ୍ୟାଚରେ ଅଷ୍ଟ୍ରେଲିଆ ଭାରତକୁ 4 ୱିକେଟରେ ପରାସ୍ତ କରିଛି । ପ୍ରଥମେ ବ୍ୟାଟିଂ କରି ଭାରତୀୟ ଦଳ ଦ୍ୱାରା 208 ରନ୍ ସଂଗ୍ରହ କରିଥିଲା।

ମୋହାଲି: ବୋର୍ଡରେ ଲାଗିଥିଲା 200 ପ୍ଲସ୍ ରନ । ମୁଣ୍ଡ ଉପରେ ଟି-20 ବିଶ୍ୱକପ । ହେଲେ ୟାଙ୍କ ଦ୍ୱାରା ହେଲାନି ଡିଫେଣ୍ଡ । ପୁଣି ସେଇ ଭୁଲ କଲେ ଭୁବି, ରଙ୍ଗହୀନ ହୋଇଗଲେ ଚହଲ । ଓଠରେ ହସ ଫୁଟେଇ ପାରିଲେନି ହର୍ଷଲ । ଆଉ ଶେଷରେ ଏମିତି ଲାଗିଲା.. ବୁମରା ନଥିଲେ ତ କିଛି ହେବନି ଆଉ ।

ମଙ୍ଗଳବାର ଖେଳାଯାଇଥିବା ପ୍ରଥମ ଟି-20 ମ୍ୟାଚରେ ଅଷ୍ଟ୍ରେଲିଆ ଭାରତକୁ 4 ୱିକେଟରେ ପରାସ୍ତ କରିଛି । ପ୍ରଥମେ ବ୍ୟାଟିଂ କରି ଭାରତୀୟ ଦଳ ଦ୍ୱାରା 208 ରନ୍ ସଂଗ୍ରହ କରିଥିଲା। ତେବେ ମୋହଲି କ୍ରିକେଟ୍ ଗ୍ରାଉଣ୍ଡରେ ଭାରତୀୟ ବୋଲରମାନେ ଅସହାୟ ପ୍ରମାଣିତ ହୋଇଥିଲେ। କ୍ୟାପଟେନ୍ ଆରୋନ୍ ଫିଞ୍ଚ, କ୍ୟାମେରନ୍ ଗ୍ରୀନ୍, ଷ୍ଟିଭ୍ ସ୍ମିଥ୍ ଏବଂ ଶେଷରେ ମାଥ୍ୟୁ ୱେଡ୍ ଅଷ୍ଟ୍ରେଲିଆ ପାଇଁ ଚମତ୍କାର ଇନିଂସ ଖେଳିଥିଲେ।

ଅଷ୍ଟ୍ରେଲିଆ ପକ୍ଷରୁ ଆରୋନ ଫିଞ୍ଚ 22, କ୍ୟାମେରନ ଗ୍ରୀନ 61 ଷ୍ଟିଭ ସ୍ମିଥ 35, ଗ୍ଲେନ ମ୍ୟାକ୍ସୱେଲ 1, ଜୋଶ ଇଙ୍ଗଲିସ 17, ଟିମ୍‌ ଡାଭିଡ 18, ମାଥ୍ୟୁ ୱେଡ 45, ପ୍ୟାଟ କମିନ୍ସ 4 ରନ୍ କରିଥିଲେ। ଭାରତ ପକ୍ଷରୁ ହାର୍ଦ୍ଦିକ ପାଣ୍ଡ୍ୟା, ଅକ୍ଷର ପଟେଲ, ଭୁବନେଶ୍ୱର କୁମାର, ହର୍ଷଲ ପଟେଲ, ଉମେଶ ଯାଦବ ଓ ୟୁଜି ଚହଲ ବୋଲିଂ କରିଥିଲେ। ହେଲେ ଅକ୍ଷର ପଟେଲଙ୍କୁ 3, ଉମେଶ ଯାଦବଙ୍କୁ 2 ଓ ୟୁଜି ଚହଲ ଗୋଟିଏ ୱିକେଟ ମିଳିଥିଲା।

ଏହାପୂର୍ବରୁ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା (71 ରନ୍ ଆଉଟ୍) ଏବଂ ଓପନର୍ କେ.ଏଲ୍ ରାହୁଲ (55 ରନ୍) ବଳରେ ତିନି ମ୍ୟାଚ୍ ବିଶିଷ୍ଟ ସିରିଜର ପ୍ରଥମ ମ୍ୟାଚରେ ଭାରତ ମୋଟ 208 କରିପାରିଥିଲା। ହାର୍ଦ୍ଦିକ ଏବଂ ରାହୁଲଙ୍କ ବ୍ୟତୀତ ସୂର୍ଯ୍ୟକୁମାର ଯାଦବ (46 ରନ୍) ବ୍ୟାଟିଂ ଅନୁକୂଳ ପିଚ୍‌ର ସମ୍ପୂର୍ଣ୍ଣ ଫାଇଦା ଉଠାଇ ଦର୍ଶକଙ୍କୁ ଚମତ୍କାର ଶଟ ଦେଇ ମନୋରଞ୍ଜନ କରିଥିଲେ।

English summary

IND vs AUS 1st T20I: Australia Won by 4 Wickets