ଆଜିଠୁ ଫୁଟବଲ ମହାକୁମ୍ଭ ଫିଫା ବିଶ୍ୱକପ

ଆଜିଠୁ ଆରମ୍ଭ ହେଉଛି ଫୁଟବଲ ମହାକୁମ୍ଭ ଫିଫା ବିଶ୍ୱକପ । କାତାର ରହିଛି ଭେନ୍ୟୁ । ବିଶ୍ୱର ସବୁଠୁ ବଡ କ୍ରୀଡା ଇଭେଣ୍ଟ ପାଇଁ ଷ୍ଟାଡିୟମ୍ ଓ ଖେଳାଳିଙ୍କ ସହ ସାରା ବିଶ୍ୱବାସୀ ବି ପ୍ରସ୍ତୁତ।

ୱାଶିଂଟନ: ଆଜିଠୁ ଆରମ୍ଭ ହେଉଛି ଫୁଟବଲ ମହାକୁମ୍ଭ ଫିଫା ବିଶ୍ୱକପ । କାତାର ରହିଛି ଭେନ୍ୟୁ । ବିଶ୍ୱର ସବୁଠୁ ବଡ କ୍ରୀଡା ଇଭେଣ୍ଟ ପାଇଁ ଷ୍ଟାଡିୟମ୍ ଓ ଖେଳାଳିଙ୍କ ସହ ସାରା ବିଶ୍ୱବାସୀ ବି ପ୍ରସ୍ତୁତ । ଆଜି ରାତି ସାଢ଼େ ୯ଟାରେ ଫିଫା ବିଶ୍ୱକପର ଉଦଘାଟନୀ ମ୍ୟାଚ୍ ରହିଛି । ଏହି ମ୍ୟାଚରେ ମୁହାଁମୁହିଁ ହେବେ କାତାର ଏବଂ ଇକ୍ୱେଡର । ଟି-20 କ୍ରିକେଟ୍ ବିଶ୍ୱକପ୍ ବିଜେତାଙ୍କ ଠାରୁ ୨୬ ଗୁଣା ଅଧିକ ରହିଛି, ଏଥରର ଫିଫା ବିଶ୍ୱକଫର ପ୍ରାଇଜ୍ ମନି ।

ଏଥର ଫୁଟବଲ୍ ମହାକୁମ୍ଭରେ ଭାଗ ନେଉଛନ୍ତି ବିଶ୍ୱର ୩୨ଟି ବଡ ଟିମ୍ । ୮ଟି ଗ୍ରୁପରେ ଏହି ଟିମ୍‌କୁ ଭାଗ କରାଯାଇଛି । ଲିଗ୍‌ ପଯ୍ୟାୟରେ ମୋଟ ୩୮ଟି ମ୍ୟାଚ ଡିସେମ୍ବର ୨ ପର୍ଯ୍ୟନ୍ତ ଖେଳାଯିବ। ପ୍ରତି ଗ୍ରୁପର ଶ୍ରେଷ୍ଠ ଦୁଇଟି ଲେଖାଏଁ ଦଳ ରାଉଣ୍ଡ-୧୬କୁ ଉନ୍ନୀତ ହେବେ। ନକ୍ଆଉଟ୍‌ ପଯ୍ୟାୟ ବା ପ୍ରିକ୍ବାର୍ଟରଫାଇନାଲ ଡିସେମ୍ବର ୩ରୁ ୬ ପର୍ଯ୍ୟନ୍ତ ଖେଳାଯିବ। ଡିସେମ୍ବର ୯ ଓ ୧୦ରେ କ୍ବାର୍ଟରଫାଇନାଲ, ୧୩ ଓ ୧୪ରେ ସେମିଫାଇନାଲ, ୧୭ରେ ୩ୟ ସ୍ଥାନ ପାଇଁ ମ୍ୟାଚ ଓ ୧୮ ଲୁସେଲାର ଆଇକନିକ୍‌ ଷ୍ଟାଡିୟମରେ ଫାଇନାଲ ମ୍ୟାଚ ଖେଳାଯିବ। ପ୍ରତିଯୋଗିତାକୁ ସଫଳତାର ସହ ଆୟୋଜନ ପାଇଁ କାତାର ଆଗରେ ରହିଛି ଏକାଧିକ ଆହ୍ବାନ। ୨ୟ ଥର ଏସୀୟ ମହାଦେଶରେ ଏହି ଫୁଟବଲ ମହାକୁମ୍ଭ ଆ​‌ୟୋଜିତ ହେଉଛି।

ବିଶ୍ୱକପ୍ ପାଇଁ ବଡ ଧରଣର ଆୟୋଜନ କରିଛି କତାର । ଖେଳାଳି ଓ ସେମାନଙ୍କ ପରିବାର ରହିବା ପାଇଁ ହୋଇଛି ଲଗଜୁରୀ କ୍ରୁଜର ବ୍ୟବସ୍ଥା । ସେଭେନ୍ ଷ୍ଟାର ହୋଟେଲରୁ କମ୍ ନୁହେଁ ଏହି ଷ୍ଟାର କ୍ରୁଜ୍ ସୁଇମିଂ ପୁଲରୁ ସପିଂ ମଲ୍ , ସବୁକିଛି ରହିଛି ଏହି କ୍ରୁଜରେ । ବିଶ୍ୱକପ୍ ଆଯୋଜନ ପାଇଁ ୩ଶହ ବିଲିୟନ୍ ଡଲାର ଖର୍ଚ୍ଚ କରିଛି କତାର । ତେବେ କାତାର ଭଳି ଏକ ଛୋଟ ଦେଶରେ ଏତେ ବଡ କ୍ରୀଡା ଇଭେଣ୍ଟର ଆୟୋଜନ ପାଲିଟିଛି ବଡ ଚ୍ୟାଲେଞ୍ଜ୍ ।

ସେପଟେ ବିଶ୍ୱକପ୍ ମ୍ୟାଚ୍ ବେଳେ ଷ୍ଟାଡିୟମ୍ ପରିସରରେ ମଦ ବିକ୍ରି ନକରିବାକୁ ନିଷ୍ପତ୍ତି ନେଇଛି କତାର । ଏହାରି ଭିତରେ ଫିଫାର ପୂର୍ବତନ ଅଧ୍ୟକ୍ଷ ସେପ୍ ବ୍ଲାଟର କହିଛନ୍ତି, କତାରକୁ ବିଶ୍ୱକପ୍ ଆୟୋଜନ ଅଧିକାର ଦେବା ଭୁଲ୍ ନିଷ୍ପତ୍ତି ଥିଲା । ୧୮ କ୍ୟାରେଟ୍ ସୁନାର ଚକଚକ୍ ଟ୍ରଫି ସହ ବିଜେତା ଟିମ୍ ଉପରେ ହେବ ଡଲାରର ବର୍ଷା । ଏଥର ବିଶ୍ୱକପ୍ ଚାମ୍ପିଅନ ଟିମକୁ ମିଳିବ ୪୨ ମିଲିୟନ୍ ଡଲାର ଅର୍ଥାତ୍ ୩୪୩ କୋଟି ଟଙ୍କାର ପୁରସ୍କାର ।

ନଜର ପକାନ୍ତୁ ଫିଫା ବିଶ୍ୱକପ୍ର ଟିମ୍ ଏବଂ ଗ୍ରୁପ୍ ଉପରେ ..

ଗ୍ରୁପ୍-A- କତାର, ଇକ୍ୱେଡର, ସିନେଗାଲ, ନେଦରଲ୍ୟାଣ୍ଡସ

ଗ୍ରୁପ-B- ଇଂଲଣ୍ଡ, ଇରାନ, ଆମେରିକା, ୱେଲସ

ଗ୍ରୁପ-C- ଆର୍ଜେଣ୍ଟିନା, ସାଉଦି ଆରବ, ମେକ୍ସିକୋ, ପୋଲାଣ୍ଡ

ଗ୍ରୁପ-D- ଫ୍ରାନ୍ସ, ଅଷ୍ଟ୍ରେଲିଆ, ଡେନମାର୍କ, ଟ୍ୟୁନିସିଆ

ଗ୍ରୁପ-E- ସ୍ପେନ୍, କୋଷ୍ଟାରିକା, ଜର୍ମାନୀ, ଜାପାନ

ଗ୍ରୁପ-F- ବେଲଜିୟମ୍, କାନାଡା, ମୋରକ୍କୋ, କ୍ରୋଏସିଆ

ଗ୍ରୁପ୍-G- ବ୍ରାଜିଲ୍, ସର୍ବିୟା, ସ୍ୱିଜରଲାଣ୍ଡ, କେମରୁନ୍

ଗ୍ରୁପ-H- ପର୍ତ୍ତୁଗାଲ, ଘାନା, ଉରୁଗୁଏ, କୋରିଆ ରିପବ୍ଲିକ୍

ପ୍ରଥମ ଥର ମ୍ୟାଚ ପରିଚାଳନା ଦାୟିତ୍ବରେ ମହିଳା ରେଫରୀ ରହିବେ। ପ୍ରତିଯୋଗିତାରେ ବ୍ରାଜିଲର ନୈମାର, ଆର୍ଜେଣ୍ଟିନାର ଲିଓନେଲ ମେସି, ପର୍ତ୍ତୁଗାଲର କ୍ରିଷ୍ଟିଆନୋ ରୋନାଲଡୋ , ଇଂଲଣ୍ଡର ହାରି କେନ୍‌ଙ୍କ ଭଳି ତାରକା ମୁଖ୍ୟ ଆକର୍ଷଣ ରହିଛନ୍ତି। ଅନ୍ୟପକ୍ଷରେ ୪ଥର ଚମ୍ପିଆନ ଇଟାଲି ,କଲମ୍ବିଆ , ଚିଲି, ପାରାଗୁଏ ଭଳି ଦଳ ପ୍ରତିଯୋଗିତା ଲାଗି ଯୋଗ୍ୟତା ଅର୍ଜନ କରିପାରିନଥିବାରୁ ବ୍ରାଜିଲ, ଜର୍ମାନୀ,ଆର୍ଜେଣ୍ଟିନା, ଫ୍ରାନ୍‌ସ, ନେଦରଲାଣ୍ଡ୍‌ସ ଓ ସ୍ପେନକୁ ଟାଇଟଲର ପ୍ରମୁଖ ଦାବିଦାର ଭାବେ ବିବେଚନା କରାଯାଉଛି।

ଉଲ୍ଲେଖଥାଉ କି, ୧୯୩୦ରୁ ଆରମ୍ଭ ହୋଇଥିବା ଏହି ଫୁଟବଲ ମହାକୁମ୍ଭରେ ବ୍ରାଜିଲ ସର୍ବାଧିକ ୫ଥର ଚମ୍ପିଅାନ ହୋଇଥିବା ବେ​​ଳେ ଜର୍ମାନୀ ଓ ଇଟାଲି ୪ଥର ଲେଖାଏଁ, ଆର୍ଜେଣ୍ଟିନା, ଉରୁଗୁଏ ଓ ଫ୍ରାନ୍‌ସ ୨ ଥର ଲେଖାଏଁ, ସ୍ପେନ ଓ ଇଂଲଣ୍ଡ ଥରେ ଲେଖାଏଁ ଚମ୍ପିଆନ ହୋଇଛନ୍ତି । ୨୦୧୮ରେ ବିଶ୍ବକପ୍‌ର ୨୧ତମ ସଂସ୍କରଣରେ ଫ୍ରାନ୍‌ସ ଚମ୍ପିଆନ ଓ କ୍ରୋଏସିଆ ରନର୍ସଅପ ହୋଇଥିଲା।

୨୧ ଟି ସଂସ୍କରଣ , ୮ ବିଜେତା

ଫୁଟବଲ ବିଶ୍ବକପର ୯୨ ବର୍ଷ ଇତିହାସରେ ୨୧ଟି ସଂସ୍କରଣ ଶେଷ ହୋଇଛି। ଏଥିରେ ମୋଟ ୮ଟି ଦେଶ ଟ୍ରଫି ଜିତିଛନ୍ତି। ବ୍ରାଜିଲ ସର୍ବାଧିକ ୫ଥର (୧୯୫୮, ୧୯୬୨, ୧୯୭୦, ୧୯୯୪ ଓ ୨୦୦୨)ରେ ଚମ୍ପିଆନ ହୋଇଥିଲା । ଜର୍ମାନୀ (୧୯୫୪, ୧୯୭୪, ୧୯୯୦, ୨୦୧୪) ଓ ଇଟାଲୀ (୧୯୩୪, ୧୯୩୮, ୧୯୮୨, ୨୦୦୬)ରେ ୪ଥର ଲେଖାଏଁ, ଆର୍ଜେଣ୍ଟିନା (୧୯୭୮, ୧୯୮୬), ଫ୍ରାନ୍‌ସ (୧୯୯୮, ୨୦୧୮), ଉରୁଗୁଏ (୧୯୩୦ ଓ ୧୯୫୦)ରେ ୨ ଥର ଲେଖାଏଁ, ଇଂଲଣ୍ଡ ୧୯୬୬ ଓ ସ୍ପେନ ୨୦୧୦ରେ ଥରେ ଲେଖାଏଁ ବିଶ୍ବକପ ଜିତିଛନ୍ତି । ନେଦରଲାଣ୍ଡ୍‌ସ ସର୍ବାଧିକ ୩ଥର ୧୯୭୪, ୧୯୭୮ ଓ ୨୦୧୦ରେ, ହଙ୍ଗେରୀ ୧୯୩୮ ଓ ୧୯୫୪ ଓ ଚେକ୍‌ ଗଣରାଜ୍ୟ ୧୯୩୪ ଓ ୧୯୬୨ରେ ୨ ଥର ଲେଖାଏଁ, ସ୍ବିଡେନ ୧୯୫୮ ଓ କ୍ରୋଏସିଆ ୨୦୧୮ରେ ଥରେ ଲେଖାଏଁ ରନର୍ସଅପ ହୋଇଛନ୍ତି ।

English summary

FIFA World Cup 2022 Starts From Today, Know Match, Group Details