Champions Trophy 2025: ଭାରତ ଫାଇନାଲକୁ ଯିବା ପରେ ବଡ଼ କ୍ଷତି ସହିବ ପିସିବି

ଚାମ୍ପିଅନ୍ସ ଟ୍ରଫି ୨୦୨୫ର ଫାଇନାଲ ଲାହୋରରେ ଖେଳାଯିବାର ଥିଲା, କିନ୍ତୁ ଭାରତ ଫାଇନାଲରେ ପହଞ୍ଚିବା ଯୋଗୁ ଫାଇନାଲ ସ୍ଥାନକୁ ଲାହୋରରୁ ଦୁବାଇକୁ ପରିବର୍ତ୍ତନ କରାଯାଇଛି । ଏହି ପରିବର୍ତ୍ତନ ଯୋଗୁ ପାକିସ୍ତାନ କ୍ରିକେଟ ବୋର୍ଡ (PCB)କୁ ବଡ଼ କ୍ଷତି ସହିବାକୁ ପଡ଼ିପାରେ ।

ଚାମ୍ପିଅନ୍ସ ଟ୍ରଫି ପାଇଁ ମୋଟ ୫୮୬ କୋଟି ଟଙ୍କାର ବଜେଟ ଅନୁମୋଦନ କରିଥିଲା। ଟୁର୍ନାମେଣ୍ଟରେ ମୋଟ ୧୫ଟି ମ୍ୟାଚ ଖେଳାଯିବାକୁ ଥିଲା ଏବଂ ପ୍ରତ୍ୟେକ ମ୍ୟାଚ ପାଇଁ ପ୍ରାୟ ୩୯ କୋଟି ଟଙ୍କା ବଜେଟ ରଖାଯାଇଥିଲା। ଏପର୍ଯ୍ୟନ୍ତ ସେମିଫାଇନାଲ ସମେତ ଭାରତର ୪ଟି ମ୍ୟାଚ ଦୁବାଇରେ ଖେଳାଯାଇଛି।

ମୂଳ କାର୍ଯ୍ୟସୂଚୀ ଅନୁଯାୟୀ, ଏହି ଚାରିଟି ମ୍ୟାଚ ପାକିସ୍ତାନରେ ଖେଳାଯିବାର ଥିଲା। ଭାରତୀୟ ଦଳର ଚାରୋଟି ମ୍ୟାଚ ଯୋଗୁ ପିସିବି ଏପର୍ଯ୍ୟନ୍ତ ୧୫୬ କୋଟି ଟଙ୍କାର କ୍ଷତି ସହିଛି। ଭାରତ ଫାଇନାଲରେ ପହଞ୍ଚିଥିବାରୁ, ଏହା ଦୁବାଇରେ ମଧ୍ୟ ଖେଳାଯିବ। ଏହି କାରଣରୁ ପାକିସ୍ତାନର ମୋଟ କ୍ଷତି ୧୯୫ କୋଟି ଟଙ୍କାରେ ପହଞ୍ଚିବାକୁ ଯାଉଛି।

ପୂର୍ବରୁ ପାକିସ୍ତାନରେ ପଡ଼ିଆଗୁଡ଼ିକର ନବୀକରଣ କରାଯାଇଥିଲା। ପୂର୍ବରୁ ରାୱଲପିଣ୍ଡି, କରାଚୀ ଏବଂ ଲାହୋରର ପଡ଼ିଆର ନବୀକରଣ ପାଇଁ ୫୦୦କୋଟି ଟଙ୍କା ଖର୍ଚ୍ଚ କରିବାକୁ ଯୋଜନା କରାଯାଇଥିଲା। ପିସିବି ଆଶା କରୁଥିଲା ଯେ ନିର୍ମାଣ କାର୍ଯ୍ୟ ସମାପ୍ତ ହେବା ପରେ ପଡ଼ିଆ ଦର୍ଶକଙ୍କ ସହିତ ପରିପୂର୍ଣ୍ଣ ହେବ, କିନ୍ତୁ ଆଶାଠାରୁ କମ ଲୋକ ମ୍ୟାଚ ଦେଖିବାକୁ ଆସିଥିଲେ।

ଗ୍ରୁପ ପର୍ଯ୍ୟାୟରୁ ପାକିସ୍ତାନ ବିଦାୟ ନେବା ଏବଂ ବର୍ଷା ଯୋଗୁ ଦୁଇଟି ମ୍ୟାଚ ବାତିଲ ହେବା ଯୋଗୁଁ ପରିସ୍ଥିତି ଆହୁରି ଖରାପ ହୋଇଗଲା। ରାୱଲପିଣ୍ଡି ଗ୍ରାଉଣ୍ଡରେ ଟସ ବିନା ବାତିଲ ହୋଇଥିବା ମ୍ୟାଚ ପାଇଁ ପିସିବିକୁ ଟିକେଟ ଟଙ୍କା ମଧ୍ୟ ଫେରସ୍ତ କରିବାକୁ ପଡିଥିଲା।

ଚାମ୍ପିଅନ୍ସ ଟ୍ରଫି ୨୦୨୫ ଟୁର୍ଣ୍ଣାମେଣ୍ଟ ଆରମ୍ଭ ହେବା ପୂର୍ବରୁ ଭାରତ ଏବଂ ପାକିସ୍ତାନ ମଧ୍ୟରେ କଥା କଟାକଟି ଚାଲିଥିଲା। ଶେଷରେ ଟିମ ଇଣ୍ଡିଆ ପାଇଁ ହାଇବ୍ରିଡ ମଡେଲ ଗ୍ରହଣ କରାଯାଇଥିଲା। ଫଳରେ ଭାରତର ମ୍ୟାଚ ଦୁବାଇରେ ଅନୁଷ୍ଠିତ ହୋଇଥିଲା।