ଚହଲ ଓ ଧନଶ୍ରୀଙ୍କ ପରେ ପରସ୍ପରକୁ ଅନଫଲୋ କଲେ ମନୀଷ ପାଣ୍ଡେ ଓ ତାଙ୍କ ପତ୍ନୀ ଆଶ୍ରିତା

ନିକଟ ଅତୀତରେ ଭାରତୀୟ ଦଳର ଅନେକ କ୍ରିକେଟରଙ୍କ ଛାଡପତ୍ର ହୋଇଛି । ଶିଖର ଧାୱନ ଏବଂ ଆୟେଶା ମୁଖାର୍ଜୀଙ୍କ ପରେ, ହାର୍ଦ୍ଦିକ ପାଣ୍ଡ୍ୟା ଏବଂ ନତାଶା ଷ୍ଟାନକୋଭିକଙ୍କ ଛାଡପତ୍ର ହୋଇଛି । ଟିମ ଇଣ୍ଡିଆର ଲେଗ ସ୍ପିନର ୟୁଜବେନ୍ଦ୍ର ଚହଲ ଏବଂ ଧନଶ୍ରୀ ବର୍ମାଙ୍କ ଛାଡପତ୍ରର ଖବର ମଧ୍ୟ ଆସୁଛି। ଦୁହେଁ ସୋସିଆଲ ମିଡିଆ ପ୍ଲାଟଫର୍ମ ଇନଷ୍ଟାଗ୍ରାମରେ ପରସ୍ପରକୁ ଅନଫଲୋ କରିଦେଇଛନ୍ତି। ଚହଲ ଧନଶ୍ରୀଙ୍କ ସହ ଫଟୋ ମଧ୍ୟ ହଟାଇ ଦେଇଛନ୍ତି।

ତେବେ ଏହି ସମୟରେ, ଆଉ ଜଣେ ଭାରତୀୟ କ୍ରିକେଟର ମନୀଷ ପାଣ୍ଡେ ଏବଂ ତାଙ୍କ ପତ୍ନୀ ଆଶ୍ରିତା ସେଟ୍ଟୀଙ୍କ ମଧ୍ୟରେ ତିକ୍ତତା ଥିବା ଖବର ଆସିଛି।

ଭାରତୀୟ ଦଳରୁ ବାହାରେ ଥିବା ଅଭିଜ୍ଞ ବ୍ୟାଟସମ୍ୟାନ ମନୀଷ ପାଣ୍ଡେଙ୍କ ଇନଷ୍ଟାଗ୍ରାମ ପ୍ରୋଫାଇଲରେ ତାଙ୍କ ସ୍ତ୍ରୀ ଆଶ୍ରିତା ଶେଟ୍ଟୀଙ୍କ ଫଟୋ ଗାଏବ ହୋଇଯାଇଛି । ମନୀଷ ସୋସିଆଲ ମିଡିଆରେ ବହୁତ କମ ସକ୍ରିୟ । କିନ୍ତୁ ସେ ତାଙ୍କ ସ୍ତ୍ରୀଙ୍କ ସହ ଅନେକ ଫଟୋ ସେୟାର କରିଥିଲେ । ଏବେ ସବୁକିଛି ହଟାଇ ଦେଇଛନ୍ତି । ଆଶ୍ରିତା ଶେଟ୍ଟୀ ତାଙ୍କ ପ୍ରୋଫାଇଲରୁ ମନୀଷ ପାଣ୍ଡେଙ୍କ ଫଟୋ ମଧ୍ୟ ହଟାଇ ଦେଇଛନ୍ତି। ଦୁହେଁ ଆଉ ସୋସିଆଲ ମିଡିଆରେ ପରସ୍ପରକୁ ଫଲୋ କରୁ ନାହାନ୍ତି ।

୨୦୧୫ରେ ଭାରତ ପାଇଁ ଡେବ୍ୟୁ କରିଥିବା ମନୀଷ ପାଣ୍ଡେ ୨୦୧୯ରେ ଆଶ୍ରିତା ସେଟ୍ଟୀଙ୍କୁ ବିବାହ କରିଥିଲେ। ଆଶ୍ରିତାଙ୍କ ପରିବାର କର୍ନାଟକର ଏବଂ ସେ ଜଣେ ତାମିଲ ଚଳଚ୍ଚିତ୍ର ଅଭିନେତ୍ରୀ। ବିବାହ ପରେ, ତାଙ୍କୁ ଭାରତୀୟ ଦଳର ମ୍ୟାଚ ଏବଂ IPL ସମୟରେ ମଧ୍ୟ ଦେଖିବାକୁ ମିଳୁଥିଲା। କିନ୍ତୁ ତାଙ୍କୁ IPL 2024 ସମୟରେ ଦେଖାଯାଇ ନଥିଲା। ମନୀଷ ପାଣ୍ଡେ କୋଲକାତା ନାଇଟ ରାଇଡର୍ସର ଅଂଶ ଥିଲେ ଏବଂ ଦଳ ମଧ୍ୟ ଚାମ୍ପିଅନ ହୋଇଥିଲା। ଚାମ୍ପିଅନ ହେବା ପରେ ମଧ୍ୟ, ଆଶ୍ରିତା କିଛି ପୋଷ୍ଟ କରିନଥିଲେ।

ମନୀଷ ପାଣ୍ଡେ ଆଇପିଏଲରେ ଶତକ ହାସଲ କରିଥିବା ପ୍ରଥମ ଭାରତୀୟ ବ୍ୟାଟସମ୍ୟାନ। ସେ ୨୦୦୯ ମସିହାରେ RCB ପାଇଁ ଖେଳିବା ସମୟରେ ଏକ ଶତକ ହାସଲ କରିଥିଲେ। ୨୦୨୧ ପରେ ତାଙ୍କୁ ଭାରତୀୟ ଦଳ ପାଇଁ ଖେଳିବାର ସୁଯୋଗ ମଧ୍ୟ ମିଳିନାହିଁ। ସେ ଭାରତ ପାଇଁ ୨୯ଟି ଦିନିକିଆରେ ୫୬୬ ରନ ଏବଂ ୩୯ଟି ଟି-୨୦ରେ ୭୦୯ ରନ କରିଛନ୍ତି ।