Bordrer Gavaskar Trophy 2024: ୪ର୍ଥ ଟେଷ୍ଟରେ କାହାକୁ କାହାକୁ ଖେଳାଇବେ ରୋହିତ?

ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଜାରି ରହିଛି ବର୍ଡର ଗାଭାସ୍କର ଟ୍ରଫି ସିରିଜ । ୫ ଟିକିଆ ଟେଷ୍ଟ ସିରିଜ୍‌ର ୩ଟି ମୁକାବିଲା ଶେଷ ହୋଇଥିବା ବେଳେ ସିରିଜ୍‌ ୧-୧ରେ ବରାବର ରହିଛି । ଡିସେମ୍ବର ୨୬ ତାରିଖ ଅର୍ଥାତ ଗୁରୁବାର ଠାରୁ ୪ର୍ଥ ଟେଷ୍ଟ ଆରମ୍ଭ ହେବାକୁ ଥିବା ବେଳେ ସିରିଜରେ ଆଗୁଆ ରହିବାକୁ ଜୋରଦାର କସରତ୍ କରୁଛି ଭାରତୀୟ ଦଳ । ସିରିଜ୍‌ର ୪ର୍ଥ ମ୍ୟାଚ ବକ୍ସିଂ ଡେ ଟେଷ୍ଟ ହେବାକୁ ଯାଉଛି ।

ପ୍ରଥମ ଟେଷ୍ଟରେ ଟିମ୍ ଇଣ୍ଡିଆ ବିଶାଳ ବ୍ୟବଧାନରେ ଜିତିଥିବା ବେଳେ ୨ୟ ଟେଷ୍ଟରେ ଦମଦାର କମ୍‌ବ୍ୟାକ୍ କରିଥିଲା କଙ୍ଗାରୁ ଟିମ୍ । ଆଉ ଭାରତକୁ ବଡ ବ୍ୟବଧାନରେ ହରାଇଥିଲା । ସେହିଭଳି ୩ୟ ମ୍ୟାଚରେ ବର୍ଷା ବାଧକ ସାଜିବାରୁ ଡ୍ର ଭାବେ ଶେଷ ହୋଇଥିଲା ।

ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ୪ର୍ଥ ଟେଷ୍ଟ ମୁକାବିଲା ମେଲବର୍ଣ୍ଣ କ୍ରିକେଟ ଗ୍ରାଉଣ୍ଡ (MCB)ରେ ଖେଳାଯିବ । ଭାରତୀୟ ସମୟ ଅନୁସାରେ ଭୋର ୫ଟା ରୁ ଆରମ୍ଭ ହେବ ମୁକାବିଲା । ତେବେ ସବୁଠୁ ବଡ କଥା ହେଉଛି ୪ ର୍ଥ ଟେଷ୍ଟ ପାଇଁ ଭାରତୀୟ ଦଳର ଚୂଡାନ୍ତ ଏକାଦଶ କିଭଳି ରହିବ ତାହା ଉପରେ ସମସ୍ତଙ୍କ ନଜର ରହିଛି ।

ଗାବା ଟେଷ୍ଟ ଡ୍ର' ଭାବେ ଶେଷ ହେବା ପରେ ଟିମ୍ ଇଣ୍ଡିଆର ଭେଟେରାନ୍‌ ଅଲରାଉଣ୍ଡର ରବିଚନ୍ଦ୍ରନ ଅଶ୍ବିନ ଅନ୍ତର୍ଜାତୀୟ କ୍ରିକେଟକୁ ଅଲବିଦା କହିଥିଲେ । କିନ୍ତୁ ଏହାର ପ୍ରଭାବ ମେଲବର୍ଣ୍ଣ ଟେଷ୍ଟରେ ପଡିବାର ସମ୍ଭାବନା ଖୁବ କମ୍‌ । କାରଣ ଗାବା ଟେଷ୍ଟରେ ଭାରତୀୟ ଦଳରେ ଏକମାତ୍ର ଅଲରାଉଣ୍ଡର ଭାବେ ରବିନ୍ଦ୍ର ଜାଡେଜା ସାମିଲ ଥିଲେ ।

ତେଣୁ ଯଦି ୪ର୍ଥ ଟେଷ୍ଟରେ ରୋହିତ ଶର୍ମା ଦଳରେ କିଛି ପରିବର୍ତ୍ତନ କରନ୍ତି ତେବେ ଦ୍ବିତୀୟ ସ୍ପିନ୍ ଅପସନ୍ ଭାବେ ଓ୍ବାଶିଂଟନ ସୁନ୍ଦରଙ୍କୁ ଚୂଡାନ୍ତ ଏକାଦଶରେ ସାମିଲ କରିପାରନ୍ତି । ଆଉ ଯଦି କିଛି ପରିବର୍ତ୍ତନ ନହୁଏ ତେବେ ପୁଣି ଦେଖିବାକୁ ମିଳିପାରେ ନିତୀଶ ରେଡ୍ଡୀଙ୍କ ଜଲଓ୍ବା ।

ସେହିଭଳି ବ୍ୟାଟିଂ ବାହିନୀ କଥା କହିବାକୁ ଗଲେ ଯଶସ୍ବୀ ଜୟସ୍ବାଲ ଓ ଲୋକେସ ରାହୁଲଙ୍କ ହାତରେ ରହିବ ଓପନିଂ ଭାର । ଆଉ ପୂର୍ବ ଭଳି ପୁଣି ୬ନଂରେ ବ୍ୟାଟିଂ କରିବେ କ୍ୟାପଟେନ୍ ରୋହିତ ଶର୍ମା ।

ସେହିଭଳି ବୋଲିଂ ବାହିନୀର ନେତୃତ୍ବ ଜସପ୍ରୀତ ବୁମରାହଙ୍କ ହାତରେ ରହିବ । ବୁମରାହଙ୍କ ସହିତ ଆକାଶ ଦୀପ, ମହମ୍ମଦ ସିରାଜ ଦେଖାଇବେ ଜଲଓ୍ବା । ଓ୍ବାଶିଂଟନ ସୁନ୍ଦରଙ୍କୁ ଯଦି ସୁଯୋଗ ମିଳେ ତେବେ ଏହି ୩ ଜଣ ଦ୍ରୁତ ବୋଲରଙ୍କୁ ନେଇ ପଡିଆକୁ ଓହ୍ଲାଇବ ଭାରତ । ନଚେତ୍ ନିତୀଶ ରେଡ୍ଡୀଙ୍କୁ ୪ର୍ଥ ଦ୍ରୁତ ବୋଲର ଭାବେ ସ୍ଥାନ ମିଳିପାରେ ।

୪ର୍ଥ ଟେଷ୍ଟ ପାଇଁ ଭାରତର ସମ୍ଭାବ୍ୟ ଏକାଦଶ: ଯଶସ୍ବୀ ଜୟସ୍ବାଲ, ଲୋକେସ ରାହୁଲ, ଶୁଭମନ ଗିଲ୍‌, ବିରାଟ କୋହଲି, ଋଷଭ ପନ୍ତ, ରୋହିତ ଶର୍ମା (ଅଧିନାୟକ), ନୀତିଶ କୁମାର ରେଡ୍ଡୀ, ରବିନ୍ଦ୍ର ଜାଡେଜା, ଆକାଶ ଦୀପ, ଜସପ୍ରୀତ ବୁମରାହ ଏବଂ ମହମ୍ମଦ ସିରାଜ

ଅଷ୍ଟ୍ରେଲିଆର ସମ୍ଭାବ୍ୟ ଏକାଦଶ: ଉସମାନ ଖ୍ବାଜା, ସାମ୍ କୋଣ୍ଟାସ୍, ମାର୍ନସ ଲାବୁସେନ, ଷ୍ଟିଭ ସ୍ମିଥ, ଟ୍ରାଭିସ ହେଡ୍, ମିଚେଲ ମାର୍ଶ, ଆଲେକ୍ସ କ୍ୟାରୀ, ପାଟ୍ କମିନ୍ସ (ଅଧିନାୟକ), ମିଚେଲ ଷ୍ଟାର୍କ, ନାଥନ ଲାୟନ ଏବଂ ସ୍କଟ୍ ବୋଲାଣ୍ଡ